Nevilleគិតថា Pochettino នឹងចាកចេញពី PSG ទៅ Man Utd ស្អែកតែម្ដង បើឲ្យឱកាសដឹកនាំ

2021-11-22 12:03:56
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Gary Neville បាននិយាយទៅកាន់សារព័ត៌មាន Sky Sports នៅក្នុងថ្ងៃនេះថា លោកគិតថា លោក Mauricio Pochettino នឹងចាកចេញពីតំណែងគ្រូបង្គោលក្លឹប Paris Saint Germain ទៅដឹកនាំក្លឹប Manchester United ស្អែកតែម្ដង បើក្លឹបបិសាចក្រហមនេះផ្ដល់ឱកាស។

លោក Neville បាននិយាយថា៖" ទោះជា Pochettino មិនដែលនិយាយរឿងហ្នឹងក៏ដោយ តែខ្ញុំគិតថាគេនឹងចាកចេញទៅដឹកនាំក្លឹប Manchester United នៅថ្ងៃស្អែកនេះជាមួយកុងត្រារយៈពេល ៥ឆ្នាំជាមួយក្លឹបហ្នឹង។ គេមើលឃើញពីកីឡាករ និងក្លឹបហ្នឹងទាំងមូល ហើយយល់ថាគេនឹងអាចសាងស្នាដៃបានច្រើននៅក្លឹបហ្នឹង "។

លោកបានបន្តថា៖" បើនៅក្លឹប PSG វិញគឺថាមួយរដូវកាល ទៅមួយរដូវកាល គ្រូបង្គោលត្រូវតែធ្វើម៉េចឲ្យឈ្នះ UCL ឲ្យក្លឹបឲ្យបាន បើមិនអញ្ចឹងទេគឺនឹងអស់តំណែងពីក្លឹបមួយហ្នឹងហើយ។ របៀបអញ្ចឹង វាអត់សមនឹង Pochettino ទេ។ អញ្ចឹងហើយខ្ញុំគិតថា បើខាង Man Utd ផ្ដល់ឱកាសឲ្យ គេនឹងទៅភ្លាមជាមួយនឹងកុងត្រារយៈពេល ៥ឆ្នាំ "។

នៅខណៈនេះសារព័ត៌មានជាច្រើនចុះផ្សាយថា Pochettino ជាបេក្ខជនមួយដែល Man Utd ចង់បានមកធ្វើជាអ្នកចាត់ការថ្មីរបស់ខ្លួន ហើយគ្រូ PSG រូបនេះក៏នឹងមកដឹកនាំផងដែរ បើខាងក្លឹបនេះផ្ដល់ឱកាស៕

ប្រភព៖ Goal អត្ថបទ៖ សេរី មង្គល