កីឡាករដែលក្រសោប​បាន​កេរ្តិ៍ឈ្មោះល្បីល្បាញក្នុងវិស័យបាល់ទះក្រៅផ្លូវការ វ៉េត សុវណ្ណនាថ នឹងចាកចេញពីប្រទេស​កម្ពុជាទៅរស់នៅសហរដ្ឋអាមេរិកនា​ថ្ងៃទី១៤ ខែ​ធ្នូ ឆ្នាំ​២០២១ ក្រោយបានរៀបចំបំពេញឯកសារ និងសម្ភាសន៍ជាប់រួចរាល់មក។

មុនលាពីប្រទេសកំណើតកីឡាករសហស្សនាមប្ដូរចង្កេះលើអាកាស បានបង្ហាញអារម្មណ៍ពិតរបស់ខ្លួនលើក្រុមគ្រួសារនិងកីឡា ដែលធ្វើ​ឱ្យ​គេមាន​ភាពល្បីល្បាញរហូតដល់បច្ចុប្បន្ន។

ដៃគូចាក់ទឹកមិនលេចរបស់សឺវីសឥតស្រមោលម៉ាប់ឆ្វេង បានលើកឡើងលើផេកផ្លូវការរបស់ខ្លួនថា ៖«លាហើយពុកម៉ែបងប្អូនជាទីស្រលាញ់ អរគុណខ្លាំងណាស់សម្រាប់ការស្រលាញ់ចូលចិត្តខ្ញុំបាទសុវណ្ណនាថ ដើម្បីអនាគតខ្ញុំត្រូវបែកពីប្រពន្ធកូន ជាពិសេសកីឡាដែលខ្ញុំស្រលាញ់ទៅរស់នៅសហរដ្ឋអាមេរិក តែទោះជាយ៉ាងណាក៏ខ្ញុំនៅតែព្យាយាមលេងកីឡាអោយបានច្រើន មិនអោយភ្លេចទេព្រោះខ្ញុំស្រលាញ់វា #បាល់ទះ»។

គួរ​បញ្ជាក់​ថា​ ស្មាត់​មាន​ដើម​កំណើត​មក​ពី​ខេត្ត​កណ្ដាលទទួល​បាន​ការ​គាំទ្រ និង​គោរពស្រលាញ់​យ៉ាងខ្លាំង​ពី​អ្នកស្នេហា​វិស័យ​កីឡា​បាល់ទះ។ មិន​ថា​នៅ​ទី​ណា​ឡើយ​ឱ្យ​តែ​មាន​ក្រុម​ដាវ​ញីឈ្មោល​ប្រកួត​ ទីនោះ​ដឹង​តែ​មាន​អ្នកទស្សនា​ទៅ​គាំទ្រ​ភ្លូកទឹក​ផ្លូក​ដី​សឹង​រក​កន្លែង​ឈរនិង​អង្គុយ​គ្មាន៕

អត្ថបទ៖ អ៊ុំ សុភក្តិ