អ្នកគ្រប់គ្រង Kim Kardashian និង Nicki Minaj ត្រូវគេសម្លាប់រួចញាត់ចូលឡាន សង្ស័យស្នាដៃសង្សារក្មេង

2021-12-30 06:06:40
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅថ្ងៃទី២៩ ខែធ្នូ (ម៉ោងនៅសហរដ្ឋអាមេរិក) វិបសាយ TMZ បានរាយការណ៍ព័ត៌មានក្ដៅគគុកមួយ ដោយឲ្យដឹងថា សាកសព Angela Kukawski (អ្នកដែលត្រូវបានគេស្គាល់ច្បាស់ថាជាអ្នកចាត់ការទូទៅរបស់តារាល្បីៗមានដូចជា Kim Kardashian និង Nicki Minaj ជាដើម) ត្រូវបានរកឃើញក្នុងគូទឡានខាងក្រោយនៅ Simi Valley កាលីហ្វ័រនីញ៉ា។

បើតាមការធ្វើកោសល្យវិច័យរួច ប៉ូលីសបានឲ្យដឹងថាជនរងគ្រោះ មានស្នាមចាក់ និងកាប់ជាច្រើនកន្លែងលើខ្លួន ហើយបានស្លាប់នៅអាយុ ៥៥ឆ្នាំ។ ងាកទៅថ្ងៃទី២២ ខែធ្នូ Angela ត្រូវបានគេរាយការណ៍ថា បានបាត់ខ្លួន ប៉ុន្តែរហូតថ្ងៃទី២៩ ខែធ្នូ ស្រាប់តែគេប្រទះឃើញសាកសពនាងតែម្ដង។ ភ្លាមៗប៉ូលីសបានចាប់ខ្លួន Jason Barker មុនគេ (បុរសអាយុ ៣៩ឆ្នាំ) ដែលជាមិត្តប្រុសរបស់ជនរងគ្រោះ ហើយបុរសម្នាក់នេះហើយដែលគេសង្ស័យ ថាជាឃាតករ។

TMZ នៅបានផ្តល់ព័ត៌មានបន្ថែមថា Jason ត្រូវបានគេសង្ស័យថាបានសម្លាប់ Angela នៅផ្ទះរបស់នាងនៅ Sherman Oaks បន្ទាប់មកក៏យកសពដាក់ចូលឡាន ហើយបើកទៅកាន់ Simi Valley។ ព្រះរាជអាជ្ញាចោទថា Jason បានប្រើកាំបិត និងកាំភ្លើង ដើម្បីប្រព្រឹត្តអំពើឃាតកម្មដ៏ព្រៃផ្សៃនេះកាលពីថ្ងៃទី ២១ ឬ ២២ ខែធ្នូ។ ចំណែកមូលហេតុនៃការសម្លាប់មិនទាន់មានការបញ្ជាក់នៅឡើយ។

គួរដឹងដែរថា Angela Kukawski គឺជាអ្នកគ្រប់គ្រងផ្នែកហិរញ្ញវត្ថុកំពូលម្នាក់របស់ហូលីវូដ ដោយបានធ្វើការជាមួយ តារាហូលីវូដលំដាប់ A ជាច្រើននាក់ដូចជាគ្រួសារ Kardashian, Nicki Minaj, Kanye West, តារារ៉េប Tupac... បច្ចុប្បន្ន Angela គឺជាអ្នកគ្រប់គ្រងអាជីវកម្មសម្រាប់ Kim Kardashian៕