ខ្សែប្រយុទ្ធក្លឹបភ្នំពេញក្រោនរូបនេះរំពឹងថា ខ្លួននឹងអាចជា Top Scorers រដូវកាលនេះ

2022-03-02 07:21:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធចំណូលថ្មីរបស់ក្លឹបភ្នំពេញក្រោន Fareed Sadat រំពឹងថា រូបគេនឹងអាចក្លាយជាកីឡាកររកបានគ្រាប់បាល់ច្រើនជាងគេ (Top Scorers ) នារដូវកាលនេះ ក្រោយបង្ហាញខ្លួនការប្រកួតផ្លូវការរកបានពីរគ្រាប់កាលពីម្សិលមិញ ដើម្បីជួយក្រុមរបស់ខ្លួនយកឈ្នះទៅលើវិសាខា ២-១ ក្នុងជំនួប Cambodian Super Cup 2022 ។

រូបថត ៖ ភ្នំពេញក្រោន

ខ្សែប្រយុទ្ធអតីតជម្រើសជាតិអាហ្វហ្គានីស្ថានរូបនេះបានឲ្យដឹងថា គេមិនទាន់ដឹងរឿងរ៉ាវច្រើនទេ អំពីលីគបាល់ទាត់កម្ពុជា ប៉ុន្តែក្រោយរកបានពីរគ្រាប់យប់មិញគេជឿជាក់ថា នឹងអាចរកបានគ្រាប់បាល់ច្រើនទៀត ហើយក៏អាចក្លាយជាកីឡាករដែលរកបានគ្រាប់បាល់ច្រើនជាងគេនៅរដូវកាលនេះដែរ។ ជាងនេះទៅទៀតគេជឿថា ខ្លួននឹងអាចជួយភ្នំពេញក្រោន ឈ្នះពានលីគកំពូលកម្ពុជារដូវកាលនេះបានថែមទៀតផង។

ខ្សែប្រយុទ្ធដដែលមើលឃើញថាមិនមានបញ្ហាអ្វីច្រើនទេ សម្រាប់ការសម្របខ្លួនក្នុងក្រុមថ្មី ត្បិតអីសមត្ថភាពរបស់កីឡាករកម្ពុជាមើលទៅក៏មិនអន់ដែរ។ រំលឹកថា ពីរគ្រាប់របស់ Sadat យប់មិញបានបង្ហាញឲ្យឃើញពីកម្រិតបច្ចេកទេសខ្ពស់របស់គេ មិនថាការបញ្ចប់ទី, ល្បឿន និងការសម្រេចចិត្តលើទីលាន ពោលគេពិតជាខ្សែប្រយុទ្ធដ៏មានសក្ដានុពលរបស់ក្លឹបសឹងក្រហមរដូវកាលនេះ៕