ប្រិយមិត្តដឹងទេ! ទម្រាំស្វែងរកជើងឯក «អ្នកចម្បាំង» ត្រូវប្រើពេលផលិតចូល៣ខែ

2022-04-18 09:40:17
ចំនួនមតិ 0 | ចំនួនចែករំលែក 0

ចន្លោះមិនឃើញ

ការផលិតតាំងពីថ្ងៃចាប់ផ្ដើមក្នុងការរៀបចំព្រឹត្តិការណ៍ «អ្នកចម្បាំង» នាអំឡុងខែកុម្ភៈ រហូតអាចស្វែងរកជើងឯកកាលពីម្សិលមិញនេះគឺត្រូវប្រើពេលចូលជិត៣ខែ ក្នុងចំណោមអ្នកចម្បាំងជិត៥០នាក់បានចូលខ្លួនប្រកួតប្រជែង។

លោក ច័ន្ទឫទ្ធិ អ្នកនិពន្ធនាយកវិបសាយ Sabay និងជាអ្នកដឹកនាំគម្រោងកម្មវិធី «អ្នកចម្បាំង » ផ្ទាល់បានលើកឡើងថា ទម្រាំកម្មវិធីមួយនេះបានកើតឡើង មិនមែនជារឿងងាយស្រួលនោះទេ ត្រូវការកម្លាំងក្រុមការងារជាច្រើននាក់មកពីគ្រប់ផ្នែកពាក់ព័ន្ធទាំងអស់។ ជាពិសេសការស្វែងរក Concept ដែលថ្មីហើយប្លែក ដូចជាលក្ខន្តិកៈក្នុងហ្គេមពីមួយវគ្គទៅមួយវគ្គ គឺត្រូវជួបពិភាក្សាគ្នាជាច្រើនលើកច្រើនសារ ។ មុនឈានដល់ថ្ងៃថតក្រុមការងារពាក់ព័ន្ធគ្រប់ផ្នែកទាំងអស់ត្រូវជួបប្រជុំគ្នាជាច្រើនដង ដើម្បីពិនិត្យមើលឡើងវិញទាំងអស់ថា ខ្វះខាតអីខ្លះ អ្វីខ្លះដែលត្រូវតុបតែង ត្រូវទិញបន្ថែម។

«និយាយទៅមួយកម្មវិធីនេះ ទាំងខ្ញុំទាំងក្រុមការងារ គឺហត់ខ្លាំង តែពួកយើងពិតជាសប្បាយចិត្តខ្លាំង នៅពេលដែលឃើញអ្វីដែលពួកយើងខិតខំប្រឹងប្រែងបានចេញជាលទ្ធផល។ នេះជាលើកទី១ សម្រាប់ពួកយើងក្នុងការបង្កើតកម្មវិធីបែបនេះឡើង ហើយក្រុមការងារទាំងអស់នឹងខិតខំរិះរកអ្វីដែលថ្មីមកផ្ដល់ជូនអ្នកគាំទ្រទាំងអស់របស់ Sabay»។

ឆ្លងកាត់ការប្រកួតចំនួន៨វិញ្ញាសាដ៏តានតឹង និងស្វិតស្វាញ បានរកឃើញជើងឯកពាក់ស្លាកលេខ ២១ មានសមត្ថភាព ១ផ្ដួល៥០នាក់ ក្លាយជាកំពូលអ្នកចម្បាំងពិតៗ ដែលលោកនឹងមកជំនួសតំណែងបងខ្លា ដើម្បីដឹកនាំក្រុមខ្លាបន្ត ក្នុងឆ្នាំខាល ២០២២លោកមានឈ្មោះថា នួន ស៊ីណា មានវ័យ ៣៦ឆ្នាំ មកពីខេត្តកណ្ដាល៕