នៅក្នុងពេលបច្ចុប្បន្ន មានមហាសេដ្ឋីចំនួន ២៦៦៩ នាក់នៅលើពិភពលោក។ នេះបើយោងតាមការចុះផ្សាយរបស់ទស្សនាវដ្តី Forbes។ មហាសេដ្ឋីទាំងនោះ មកពី ៧៥ប្រទេស ហើយមានទ្រព្យសម្បត្តិសរុបចំនួន ១២,៧ ទ្រីលានដុល្លារ។

ដើម្បីកំណត់ប្រទេសដែលមានមហាសេដ្ឋីច្រើនជាងគេ សូមពិនិត្យមើលទិន្នន័យដែលចុះផ្សាយដោយទស្សនាវដ្តី Forbes សម្រាប់អ្នកមានជាងគេបំផុតនៅលើពិភពលោកសម្រាប់ឆ្នាំ ២០២២នេះ។ ចំនួនមហាសេដ្ឋី ទ្រព្យសម្បត្តិសរុបរបស់មហាសេដ្ឋីទាំងអស់ និងអត្តសញ្ញាណរបស់មហាសេដ្ឋីដែលមានជាងគេក្នុងប្រទេសនីមួយៗ សុទ្ធតែបានមកពីបញ្ជី Forbes។

សហរដ្ឋអាមេរិកមានមហាសេដ្ឋីច្រើនជាងប្រទេសដទៃទៀត ពោលគឺមានមហាសេដ្ឋីចំនួន ៧៣៥នាក់ដែលមានទ្រព្យសម្បត្តិសរុប ៤,៧ ទ្រីលានដុល្លារ។ ចំណែកអ្នកដែលមានជាងគេគឺលោក Elon Musk មានទ្រព្យសម្បត្តិសរុប ២១៩ពាន់លានដុល្លារ ដោយសព្វថ្ងៃលោកគឺជាម្ចាស់ក្រុមហ៊ុន ​Space X, Tesla ​ និងទើបទិញបានក្រុមហ៊ុនបណ្តាញសង្គមយក្ស Twitter កាលពីថ្មីៗនេះ៕

ប្រភព៖ MSN   ប្រែសម្រួល ៖ សង្ហា