អង្គការផ្កាយសមុទ្រកម្ពុជា និងAIA បើកប្រកួតបាល់ទាត់កុមារ និងយុវជន AIA - ISF Youth League នៅខេត្តកំពង់ស្ពឺ

2022-05-24 05:55:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍ប្រកួតបាល់ទាត់កុមារ និងយុវជន AIA - ISF Youth League លើកទីប្រាំបានប្រព្រឹត្តទៅនៅថ្ងៃអាទិត្យទី២២ ខែឧសភា ក្នុងខេត្តកំពង់ស្ពឺ នៅវេលាម៉ោង៨.៣០នាទីព្រឹក ដែលជាការរៀបចំឡើងដោយកិច្ចសហការជាមួយនឹងក្រុមហ៊ុន AIA Cambodia អង្គការផ្កាយសមុទ្រកម្ពុជា (ISF)។

កម្មវិធីខាងលើបង្កើតឡើងក្នុងគោលបំណងបង្កើនការពង្រីកវិសាលភាពនៃកម្មវិធីបាល់ទាត់ របស់ខ្លួនទៅកាន់ខេត្ត-ក្រុងនានាដូចជា ក្រុងកំពត, ក្រុងសៀមរាប និងខេត្តកំពង់ស្ពឺជាដើម ។

ព្រឹត្តិការណ៍ប្រកួតបាល់ទាត់កុមារ និងយុវជន AIA - ISF Youth League នៅខេត្តកំពង់ស្ពឺ នឹងប្រព្រឹត្តទៅ រយៈពេលប្រាំបួនសប្តាហ៍ជាប់ៗគ្នា ដែលនឹងមានវត្តមានរបស់កីឡាករ-កីឡាការនីចំនួន ៣៦០នាក់ ដែលបែងចែកទៅតាមប្រភេទអាយុចំនួនបួនផ្សេងៗគ្នាដូចជា ក្រុមកុមារាកុមារីអាយុក្រោម១០ឆ្នាំ អាយុក្រោម១៤ឆ្នាំ និងអាយុក្រោម១៨ឆ្នាំ ។ ក្រុមឈ្នះក្នុងការប្រកួតនៅតាមខេត្តទាំងអស់ នឹងត្រូវមកចូលរួម ប្រកួតប្រជែងយកពានរង្វាន់នៅវគ្គផ្តាច់ព្រ័ត្រ AIA - ISF Grand Championship League នៅថ្ងៃអាទិត្យ ទី១៤ ខែសីហា នៅទីលានបាល់ទាត់អង្គការផ្កាយសមុទ្រកម្ពុជានៅរាជធានីភ្នំពេញ ។

ព្រឹត្តិការណ៍ប្រកួតបាល់ទាត់កុមារ និងយុវជន AIA - ISF Youth League គឺជាព្រឹត្តិការណ៍ប្រកួតបាល់ ទាត់ថ្នាក់មូលដ្ឋានធំជាងគេបង្អស់មួយនៅក្នុងប្រទេសកម្ពុជា ។ តាមរយៈភាពជាដៃគូជាមួយសាលា រៀន និងអង្គការក្រៅរដ្ឋាភិបាលនានានៅទូទាំងប្រទេស ព្រឹត្តិការណ៍ប្រកួតបាល់ទាត់នេះបានផ្តល់ ឱកាសប្រកួតប្រជែងកីឡាទៅដល់កុមារ និងយុវជនកម្ពុជាជាច្រើន ដែលជួបប្រទះនូវភាពក្រីក្រ និងការ រើសអើងយេនឌ័រ ។

កីឡាករ-កីឡាការិនី ដែលចូលរួមប្រកួតក្នុងព្រឹត្តិការណ៍ប្រកួតកន្លងទៅបានកត់សម្គាល់ឃើញនូវភាព ល្អប្រសើរចំពោះរាងកាយ និងសុខភាពរបស់ខ្លួន ។ កីឡាការិនីឈ្មោះ លក្ខណា មកពីក្រុងកំពត បានឲ្យដឹងថា៖ «បាល់ទាត់បានជួយឲ្យខ្ញុំស្គាល់ពីភាពខ្លាំងរបស់ខ្លួនឯង ហើយវាក៏ជួយឲ្យខ្ញុំមាន ភាពស្វាហាប់ និងរឹងមាំជាងមុន និងកសាងទំនុកចិត្ត ការស្រលាញ់ខ្លួនឯង និងកាត់បន្ថយភាពតប់ ប្រមល់ទៀតផង»។

ជាមួយគ្នានោះអ្នកស្រី ជួប វិច្ឆិកា ប្រធានគ្រប់គ្រងប្រចាំប្រទេសរបស់អង្គការផ្កាយសមុទ្រកម្ពុជាបានលើកឡើងដែរថា៖ “តាមរយៈកិច្ចសហការជាមួយ នឹងក្រុមហ៊ុន AIA Cambodia ពួកយើងពិតជាអាចនាំ យកការរៀនសូត្រជំនាញបំណិនជីវិតសំខាន់ៗដូចជាស្មារតីស្រលាញ់គាំទ្រកីឡា ការធ្វើការងារជាក្រុម និងសាមគ្គីភាពទាំងនៅក្នុង និងក្រៅទីលាន ។ អ្វីដែលកាន់តែសំខាន់ទៅទៀតនោះ ព្រឹត្តិការណ៍ប្រកួត បាល់ទាត់បែបនេះបានផ្តល់ដល់កុមារ និងយុវជនក្រីក្រទាំងនោះនូវឱកាសលេងកំសាន្ត ក៏ដូចជាបង្កើត សហគមន៍រួមគ្នា និងកសាងមិត្តភាពដ៏យូរអង្វែងទៀតផង»។

កម្មវិធីបើកការប្រកួតនៅខេត្តកំពង់ស្ពឺនៅថ្ងៃអាទិត្យខាងមុខនេះគឺជាការចាប់ផ្តើមនៃការប្រកួតលើកទីប្រាំនៃព្រឹត្តិការណ៍ប្រកួតបាល់ទាត់កុមារ និងយុវជន AIA - ISF Youth League ប្រចាំឆ្នាំ២០២២ ។ សម្រាប់ឆ្នាំទីប្រាំនៃការរៀបចំព្រឹត្តិការណ៍ប្រកួតបាល់ទាត់នេះ អង្គភាពទាំងពីរគឺពិតជាមានមោទនភាព យ៉ាងខ្លាំង ដែលបានឃើញពីការផ្លាស់ប្តូរជាវិជ្ជមាននៅក្នុងជីវិតកុមារ និងយុវជនជាច្រើន តាមរយៈការ ប្រកួតកីឡាប្រចាំឆ្នាំបែបនេះ៕