មើលអត្តសញ្ញាណបណ្ណផង! បើអស់ ឬជិតអស់សុពលភាព អាចទៅសុំប្តូរយកថ្មីបាននៅទីតាំងចំនួន៣

2023-02-21 07:33:32
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គនាយកដ្ឋានអត្តសញ្ញាណកម្ម បានប្រកាសឱ្យដឹងថា អត្តសញ្ញាណបណ្ណដែលបានផ្តល់ជូនតាំងពីខែមិថុនា ឆ្នាំ២០១២ បានអស់សុពលភាពប្រើប្រាស់ជាបណ្តើរៗ ចាប់តាំងពីខែមិថុនា ឆ្នាំ២០២២មក។ ជារួមគិតពីខែមិថុនា ឆ្នាំ២០២២ ដល់ខែកក្កដា ឆ្នាំ២០២៣ មានអត្តសញ្ញាណបណ្ណសញ្ជាតិខ្មែរចំនួនជាង ១,៧លាននាក់ នឹងត្រូវអស់សុពលភាព។

ដើម្បីប្រើប្រាស់អត្តសញ្ញាណបណ្ណដែលមានសុពលភាពសម្រាប់ការបោះឆ្នោតជ្រើសរើសតំណាងរាស្រ្តនាខែកក្កដា ឆ្នាំ២០២៣ខាងមុខនេះ អគ្គនាយកដ្ឋានអត្តសញ្ញាណកម្ម បានអំពាវនាវឱ្យប្រជាពលរដ្ឋដែលមានអត្តសញ្ញាណបណ្ណអស់សុពលភាព ឬសុពលភាពនៅសល់តិចជាង ឬត្រឹម ៩០ថ្ងៃ គឺសូមអញ្ជើញទៅបំពេញបែបបទសុំប្តូរយកអត្តសញ្ញាណបណ្ណសញ្ជាតិខ្មែរថ្មី (ទុតិយតា) នៅតាមបណ្តាទីតាំងណាមួយដូចខាងក្រោម ដោយភ្ជាប់ជាមួយអត្តសញ្ញាណបណ្ណដែលអស់ ឬជិតអស់សុពលភាព៖

១. ប៉ុស្តិ៍នគរបាលរដ្ឋបាលឃុំ សង្កាត់ ឬអធិការដ្ឋាននគរបាលក្រុង ស្រុក ខណ្ឌ ឬច្រកចេញចូលតែមួយក្រុង ស្រុក ខណ្ឌ ឬស្នងការដ្ឋាននគរបាលរាជធានី ខេត្ត នៃលំនៅឋានអចិន្រ្តៃយ៍របស់ខ្លួន។

២. នាយកដ្ឋានអត្តសញ្ញាណបណ្ណសញ្ជាតិខ្មែរ (សង្កាត់និរោធ)

៣. ទីស្នាក់ការផ្តល់អត្តសញ្ញាណបណ្ណសញ្ជាតិខ្មែរ ប្រចាំនៅផ្សារទំនើបអ៊ីអនម៉ល២ សែនសុខ៕