រដ្ឋបាល​រាជធានីភ្នំពេញ បាន​ចេញ​សេចក្តីណែនាំ​​ពីការ​បញ្ចៀស​ចរាចរ​ក្នុងអំឡុងពេល​សាងសង់​ស្ពាន​អាកាស​ព្រះមុនីវង្ស ​ថ្មីមួយទៀត បន្ទាប់​ពី​​សង្កេតឃើញ​ថា នៅ​ចំណុចការដ្ឋាននេះ នៅពេលខ្លះ​មានការ​កកស្ទះចរាចរណ៍​កើតឡើង។

ក្នុង​សេចក្តីជូនដំណឹង​នេះ រដ្ឋបាល​រាជធានីភ្នំពេញ បាន​ណែនាំ​ឱ្យអ្នកដែល​ធ្វើដំណើរ​ចូលរាជធានីភ្នំពេញ តាមផ្លូវជាតិលេខ១ បង្វែរ​ទិសតាមផ្លូវថៃហ្គ័រ តាមស្ពន​ព្រែកសំរោង ឬតាមសាឡាង​ចម្លងកោះនរាជាដើម។ ចំណែក​អ្នកមកពីផ្លូវជាតិលខ២ ត្រូវបង្វែរទិស​​តាមផ្លូវ ៣០ម៉ែត្រ និងផ្លូវ ៦០ម៉ែត្រ បត់តាមផ្សារជីបម៉ុង រួចចេញតាមផ្លូវ ២៧១ ជាដើម។

ចំពោះ​អ្នកធ្វើដំណើរ​ចេញ​រាជធានីភ្នំពេញ ទៅ​ផ្លូវជាតិលេខ២ ត្រូវបានណែនាំឱ្យបង្វែរទិស​តាមផ្លូវលេខ៤៨៨ ឆ្ពោះទៅ​រង្វង់​មូលផ្សារដើមថ្កូវ ឆ្ពោះទៅលេខ២៧១ សំដៅទៅផ្លូវលេខ៣៧១ ឬតាមផ្លូវផ្សារជីបម៉ុង ចេញតាមផ្លូវ ៦០ម៉ែត្រ និង​តាមផ្លូវ ៣០ម៉ែត្រ។ ឯអ្នកមានគោលដៅទៅផ្លូវជាតិលេខ១ អាចធ្វើដំណើរ​តាមផ្លូវនរោត្តម ឡើងស្ពាន​អាកាសក្បាលថ្នល់បត់ត្រលប់ក្រោយ រួចឆ្លងស្ពានព្រះមុនីវង្ស ឬតាមសាឡាងចម្លងពីកោះពេជ្រ ទៅកោះនរា ឬពីសាឡាងពីសណ្ឋាគារសុខា ទៅកោះនរា នៅពេល​ដាក់ឱ្យដំណើរការ​សាកល្បង។

ជាមួយគ្នានេះ មន្ទីរសាធារណការ និងដឹកជញ្ជូន​រាជធានីភ្នំពេញ ក៏ត្រូវពិនិត្យលទ្ធភាព​​ក្នុងការពង្រីកទ្រូងផ្លូវឱ្យធំ​ជាបណ្តោះអាសន្នសិន​ផងដែរ៕

អត្ថបទ៖ សំភី