Edward Jenner អ្នកបង្កើតវ៉ាក់សាំងដំបូងក្នុងប្រវត្តិសាស្ត្រមនុស្សជាតិ ចំពេលជំងឺអុតធំ ដ៏កាចសាហាវរាលដាលទូទាំងសកល
- 2023-03-30 03:57:54
- ចំនួនមតិ 0 | ចំនួនចែករំលែក 0
Edward Jenner អ្នកបង្កើតវ៉ាក់សាំងដំបូងក្នុងប្រវត្តិសាស្ត្រមនុស្សជាតិ ចំពេលជំងឺអុតធំ ដ៏កាចសាហាវរាលដាលទូទាំងសកល
ចន្លោះមិនឃើញ
វ៉ាក់សាំងត្រូវបានបង្កើតឡើងដំបូងបង្អស់ នៅក្នុងឆ្នាំ១៧៩៦ ដោយលោក Edward Jenner ដែលជាវេជ្ជបណ្ឌិតសញ្ជាតិអង់គ្លេស នៅទីក្រុងឡុងដ៍។ យ៉ាងណាមិញ ការបង្កើតវ៉ាក់សាំងដំបូងនេះមិនទាន់មានការទទួលស្គាល់ឲ្យទូលំទូលាយឡើយ រហូតទាល់តែក្រោយមកមានការស្រាវជ្រាវបន្ថែមពីលោក Louis Pasteur ទៅលើផ្នែកមីក្រូជីវវិទ្យា និងប្រព័ន្ធភាពស៊ាំ ទើបធ្វើឲ្យមានទំនើបកម្មវ៉ាក់សាំងជាផ្លូវការ។
វ៉ាក់សាំងដែលលោក Jenner ផលិតគឺយកមកបង្ការជំងឺអុតធំ ដែលវាជាជំងឺដ៏កាចសាហាវមួយនៅក្នុងប្រវត្តិសាស្ត្រ។ នៅក្នុងឆ្នាំ១៧៧៣ ស្រុកកំណើតរបស់លោក Jenner ដែលស្ថិតនៅភូមិ Berkeley ក្នុងតំបន់ Gloucestershire បានរងគ្រោះយ៉ាងធ្ងន់ធ្ងរដោយសារតែការឆ្លងជំងឺអុតធំ។
ជំងឺនេះបានកើតនៅលើមនុស្ស និងពពួកសត្វពាហនៈ។ រោគសញ្ញារបស់វាដំបូងឡើយមានលក្ខណៈជាកន្តួលរមាស់ ហើយរាលដាលដល់គ្រប់ផ្នែកនៃរាងកាយ ភ្ជាប់ជាមួយនឹងអាការៈគ្រុនក្ដៅ បើធ្ងន់អាចឈានដល់ខ្វាក់ភ្នែក និងស្លាប់។ អុតធំនេះអាចចម្លងយ៉ាងឆាប់រហ័សតាមរយៈផ្លូវដង្ហើម និងការប៉ះពាល់ផ្ទាល់ជាមួយអ្នកជំងឺ។ ឃើញដូច្នេះ លោក Jenner បានចំណាយពេលស្រាវជ្រាវរកថ្នាំព្យាបាលជាច្រើនឆ្នាំ តែមិនជោគជ័យសោះ។
ការតេស្តវ៉ាក់សាំងមុនគេរបស់លោក Jenner បានធ្វើឡើងទៅលើក្មេងប្រុសម្នាក់អាយុ៨ឆ្នាំ ឈ្មោះ James Phipps ដែលរស់នៅភូមិស្រុកជាមួយគ្នា។ ក្រោយចាក់វ៉ាក់សាំង លោកសង្កេតឃើញថា ក្មេងនោះមិនបានឆ្លងជំងឺអុតធំពីនរណាម្នាក់ទេ។ បន្ទាប់មក លោកបានសាកល្បងម្ដងទៀត តែលើកនេះចាក់ឲ្យកូនប្រុសរបស់លោក ដែលមានអាយុត្រឹម ១០ខែប៉ុណ្ណោះ។ ចំណែកឯលទ្ធផលវិញក៏ល្អដូចលើកមុន។
ផ្អែកតាមការពិសោធជោគជ័យនេះ លោក Jenner ក៏បានផលិតចេញជាវ៉ាក់សាំងការពារជំងឺអុតធំតាំងពីពេលនោះមក។ លោកបានដាក់ឈ្មោះឲ្យការបង្កើតថ្មីរបស់ខ្លួនថា "Vaccination" ដែលជាពាក្យគេប្រាស់ប្រាស់មកដល់សព្វថ្ងៃ៕