ប្រសើរណាស់! យុវជនប្រមាណ ៥០០០នាក់ ស្ម័គ្រចិត្តជួយរៀបចំសង្ក្រាន្ត

2023-04-10 06:36:38
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមព័ត៌មាន កម្មវិធី "អង្គរសង្ក្រាន្ត" សម្រាប់អបអរបុណ្យចូលឆ្នាំប្រពៃណីជាតិខ្មែរឆ្នាំនេះ នឹងធំ គគ្រឹកគគ្រេងជាងឆ្នាំណាៗទាំងអស់ ដូច្នេះហើយក៏ត្រូវប្រើកម្លាំងពលកម្មច្រើនផងដែរ ក្នុងនោះតាមតួលេខចេញដោយរដ្ឋបាលខេត្តសៀមរាប មានយុវជនកម្ពុជាប្រមាណ ៥០០០នាក់បានស្ម័គ្រចូលរួមជួយព្រឹត្តិការណ៍នេះ។

ខេត្តសៀមរាបដែលម្ចាស់ផ្ទះនៃការរៀបចំកម្មវិធី "អង្គរសង្ក្រាន្ត" បាន និងកំពុងមមាញឹករៀបចំ ក៏ដូចជាសាងសង់ហេដ្ឋារចនាសម្ព័ន្ធជាច្រើន។ កិច្ចការនេះ គឺដើម្បីអបអរខួប ១០ឆ្នាំនៃកម្មវិធី "អង្គរសង្ក្រាន្ត" ក្រោយពេលដែលបានចាប់ដំណើរការដំបូងនៅឆ្នាំ ២០១៣ ។

តាមរដ្ឋបាលខេត្តសៀមរាប ក្រុមការងារនៃសហភាពសហព័ន្ធយុវជនកម្ពុជា បានពង្រីកទីតាំងលេងកម្សាន្តដល់ទៅ៦ទីតាំង និងមានល្បែងលេងកម្សាន្តដល់ទៅ ៤៤ប្រភេទឯណោះ ច្រើនជាងបណ្ដាឆ្នាំកន្លងទៅ សម្រាប់ទទួលអ្នកមកកម្សាន្តក្នុងខេត្តសៀមរាប ក៏ដូចជា "អង្គរសង្ក្រាន្ត" ក្នុងឱកាសបុណ្យចូលឆ្នាំប្រពៃណីជាតិខ្មែរដែលនឹងមកដល់ប៉ុន្មានថ្ងៃទៀតនេះ។

រូបភាព៖ រដ្ឋបាលខេត្តសៀមរាប

ក្រៅពីអង្គរសង្ក្រាន្ត នៅមុខប្រសាទអង្គរវត្តឯណោះវិញ បេះដូងក្រដាសដែលបត់ដោយដៃពលរដ្ឋប្រមាណ ១លាន បានរៀបចំដាក់ដោតតម្រៀបរួចស្រេចបង្កើតបានជាទស្សនីយដ្ឋានគួរឲ្យជក់ចិត្តមួយ។ ព្រឹត្តិការណ៍បត់បេះដូងរបស់ពលរដ្ឋខ្មែរនេះ គ្រោងបំបែកកំណត់ពិភពលោកថ្មី ដោយការរាប់ នឹងចាប់ផ្ដើមនៅវេលាម៉ោង ៤រសៀលនេះ។ ដោយឡែកលទ្ធផលនឹងប្រកាសនៅថ្ងៃស្អែក៕

អត្ថបទ៖ ទារិកា