បងប្អូនខ្មែររស់នៅក្រៅប្រទេស មានប័ណ្ណចាស់អាចដូរប័ណ្ណថ្មី ចូលពិធីបិទ SEA Games លើកទី៣២

2023-05-12 11:47:57
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ (CAMSOC-CAMAPGOC) បានចេញសេចក្ដីជូនដំណឹងនៅក្នុងថ្ងៃនេះ ដោយឲ្យបងប្អូនប្រជាពលរដ្ឋខ្មែរដែលចុះឈ្មោះ និងបានយកប័ណ្ណចាស់ អាចមកយកប័ណ្ណថ្មីដើម្បីចូលពិធីបិទ SEA Games លើកទី៣២ ពីបញ្ជរប្ដូរបណ្ណដែលមានទីតាំងនៅពហុកីឡដ្ឋានជាតិមរតកតេជោ នៅក្នុងរាជធានីភ្នំពេញ ចាប់ពីថ្ងៃទី១៥ ខែឧសភា រហូតដល់ថ្ងៃទី១៧ ខែឧសភា ឆ្នាំ២០២៣ នៅរៀងរាល់ម៉ោងធ្វើការពេលព្រឹក ចាប់ពីម៉ោង ៨៖៣០នាទី ដល់ម៉ោង ១១៖៣០នាទីព្រឹក និងពេលរសៀល ចាប់ពីម៉ោង ២៖៣០នាទី ដល់ម៉ោង ៥៖៣០នាទីល្ងាច។

គួរបញ្ជាក់ផងដែរថា CAMSOC-CAMAPGOC សម្រេចកាលពីម្សិលមិញចាត់ទុកប័ណ្ណចាស់សម្រាប់ចូលទស្សនាពិធី បើក និងបិទព្រមទាំងប័ណ្ណរថយន្ត SEA Games លើកទី៣២ ជាមោឃៈ ព្រោះតែដើម្បីធានាសន្តិសុខ សុវត្ថិភាព និងសណ្ដាប់ធ្នាប់ ជាពិសេសរក្សាឲ្យសមស្របនូវចំនួនកៅអីនៃពហុកីឡាដ្ឋានជាតិមរតកតេជោ ខណៈប័ណ្ណថ្មីសម្រាប់ទស្សនាបិទ និងប័ណ្ណរថយន្ត សម្រាប់ថ្ងៃទី១៧ ខែឧសភា ឆ្នាំ២០២៣ នឹងត្រូវបោះពុម្ពថ្មីសម្រាប់ជំនួសប័ណ្ណចាស់។

ពិធីបើក SEA Games លើកទី៣២ កាលពីថ្ងៃទី០៥ ខែឧសភាកន្លងទៅ មានថ្នាក់ដឹកនាំ ប្រជាពលរដ្ឋ និងភ្ញៀវអន្ដរជាតិរាប់ម៉ឺននាក់ បានចូលរួមទស្សនាផ្ទាល់ នៅពហុកីឡដ្ឋានជាតិមរតកតេជោ ដោយទទួលបានការកោតស្ញប់ស្ញែងជាខ្លាំង នូវការរៀបចំនូវទស្សនីយភាពដ៏អស្ចារ្យជាច្រើន រហូតទទួលបានការកោតសរសើរ និងល្បីល្បាញលើឆាកអន្ដរជាតិ៕