ស្រួង ភាវី សម្រេច ជាមួយក្រុមហ៊ុនអាកាចរណ៍មួយ ក្នុងការនាំអ្នកជំងឺទៅព្យាបាលនៅកូរ៉េមិនគិតប្រាក់

2023-05-31 04:41:55
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាការិនីកីឡាកប៊ែយែការ៉ុម ស្រួង ភាវី បានឈានមួយជំហានទៀតក្នុងបេសកម្មសប្បុរសធម៌របស់ខ្លួន ក្រោយពីបានចុះកិច្ចព្រមព្រៀងជាមួយក្រុមហ៊ុនអាកាសចរណ៍ SKY ANGKOR ឈានទៅដឹកជញ្ជូនអ្នកជំងឺកុមារទៅព្យាបាលនៅប្រទេសកូរ៉េដោយមិនយកប្រាក់។ នេះបើតាមការជូនដំណឹងរបស់កីឡាការិនីនៅលើបណ្ដាញសង្គមរបស់ខ្លួន។

កិច្ចព្រមព្រៀងរវាងកីឡាការិនី និងក្រុមហ៊ុនអាកាសចរណ៍ គឺកីឡាការិនី ទទួលធ្វើជាទូតសុច្ឆន្ទៈរបស់ក្រុមហ៊ុន។ ក្នុងការងារនេះ ភាវី ប្រាប់ថា នាងមិនយកប្រាក់សម្រាប់ប្រើជាប្រយោជន៍ខ្លួនឯងនោះទេ ប៉ុន្តែបានបង្វិលទៅក្នុងការងារសប្បុរសធម៌វិញ។

ភាវី ថ្លែងថា "ប្រសិនបើខ្ញុំត្រូវមានកិច្ចការសប្បុរសធម៌ត្រូវធ្វើ ឬមានប្អូនៗ ក៏ដូចជាប្រជាជនខ្មែរយើងដែលមានជីវភាពខ្វះខាត ហើយត្រូវបានអង្គការសប្បុរសធម៌របស់នាងខ្ញុំធានាពួកគាត់មកព្យាបាលជំងឺនៅប្រទេសកូរ៉េ គឺមិនតម្រូវឱ្យយកប្រាក់ពីពួកគាត់ឡេីយ"។ ការស្នើលក្ខខណ្ឌនេះ ត្រូវបានខាងក្រុមហ៊ុនទទួលយល់ព្រមដោយសេចក្ដីសោមនស្សទាំងអស់គ្នា។

នៅក្នុងកិច្ចការនេះដែរ ភាវី ប្រាប់ Sabay បន្ថែមថា ការផ្ដល់ជូន គឺផ្ដោតតែលើម្ដាយឪពុកក្រខ្សត់ និងមានកូនតូចមានជំងឺបេះដូងចំហរ។ យ៉ាងណា លក្ខខណ្ឌលម្អិតថែមទៀតពាក់ព័ន្ធនឹងការព្រមទទួលឲ្យទៅព្យាបាលនៅប្រទេសកូរ៉េ គឺត្រូវពិនិត្យជាក់ស្ដែងដោយអង្គការរបស់នាង លើស្ថានភាពអ្នកកុមារ។ ប្រសិនបើឃើញថា អ្នកជំងឺកុមារ មានស្ថានភាពត្រូវនឹងលក្ខខណ្ឌ គឺអង្គការព្រមទទួល។

អ្នកនាង ស្រួង ភាវី ប្រាប់ថាសម្រាប់ការធ្វើដំណើរតាមអាកាសចរណ៍ SKY ANGKOR និងការព្យាបាលនៅប្រទេសកូរ៉េ គឺរាប់រងដោយក្រុមហ៊ុនអាកាសចរណ៍ និងអង្គការជាដៃគូរបស់នាង។ នេះជាជំហានថ្មីទៀត ដើម្បីជួយពលរដ្ឋកម្ពុជារបស់នាង។ កីឡាការិនី ស្រួង ភាវី ប្រាប់ថា ការទៅព្យាបាលនៅកូរ៉េ គឺជារឿងដ៏ពិបាក ដូច្នេះសម្រាប់ប្រតិបត្តិការលើកនេះ អ្នកនាង សង្ឃឹមថា នឹងជួយកុមារកម្ពុជាបានច្រើន ហើយថា អ្នកនាងធ្វើកិច្ចការនេះម្ដងមួយជំហានៗ។

នេះមិនមែនជាលើកទី១នោះទេ ដែលកីឡាការិនី ស្រួង ភាវី បានចំណាយកម្លាំងកាយ និងធនធានទៅក្នុងការងារសប្បុរសធម៌។ ប៉ុន្តែនាង បានធ្វើវាជាច្រើនឆ្នាំ និងបានជួយពលរដ្ឋកម្ពុជាជួបការលំបាកមកពីកត្តាផ្សេងៗ ពិសេសភាពក្រីក្រ ជាច្រើននាក់មកហើយ។ អ្នកនាង ប្រាប់ថា សហប្រតិបត្តិការខាងលើ អាចមានយូរអង្វែង ហើយបេសកម្មសប្បុរសធម៌ផ្ទាល់ខ្លួនអ្នកនាង ក៏យូរអង្វែងដូចគ្នាដែរ។

អ្នកនាង ស្រួង ភាវី គឺជាអ្នកខេត្តត្បូងឃ្មុំ តែបានទៅរស់នៅប្រទេសកូរ៉េជាមួយស្វាមី។ នៅទីនោះ អ្នកនាងបានសាងកេរ្តិ៍ឈ្មោះល្បីរន្ទឺក្នុងនាមជាកីឡាការិនីប៊ីយែការ៉ុមឆ្នើមតំណាងកូរ៉េ និងកម្ពុជា។ ថ្មីៗនេះ ទើបនឹងបង្កើតឲ្យមានមោទនភាពថ្មីទៀតឲ្យប្រទេសកំណើត ក្រោយពីបានតំណាងកម្ពុជា ប្រកួតក្នុងព្រឹត្តិការណ៍ស៊ីហ្គេមលើកទី៣២។

ភាវី ទទួលបានមេដាយមាស១ សំរិទ្ធ ១ ក្នុងព្រឹត្តិការណ៍នោះ។ ចំណុចគួរកត់សម្គាល់ អ្នកនាងមិនទទួលយកប្រាក់រង្វាន់នោះទេ តែបានបង្វែរថវិកាទាំងអស់ទៅកិច្ចការសប្បុរសធម៌ ជួយអ្នកទីទ័ល ក៏ដូចជាកុមាររងគ្រោះផ្សេងៗដូចករណីខាងលើដែរ៕

អត្ថបទ៖ ទារិកា