កុំឲ្យ Fan ចេះតែចាប់គូច្រើនរឿង សុខ ធី ឧកញ៉ា ស្រី ចាន់ថន បង្ហោះសារពន្យល់បែបនេះ

2023-07-25 06:58:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីវត្តមានរបស់ សុខ ធី ដល់ទឹកដីកម្ពុជាគឺមានអ្នកគាំទ្រជជែកច្រើនអំពីទម្ងន់ ៦០គីឡូក្រាម និងរឿងចង់ឲ្យរូបគេប៉ះគ្នាជាមួយកីឡាករខ្មែរដែលខ្លាំងៗជាច្រើននៅកម្ពុជា។ មានអ្នកគាំទ្រខ្លះចង់ឲ្យ សុខ ធី ប្រកួតដណ្ដើមខ្សែក្រវាត់ ឬប្រកួតម៉ារ៉ាតុងទៀតផង។

រូបភាពលើហ្វេសបុកឧកញ៉ា ស្រី ចាន់ថន

ពាក់ព័ន្ធរឿងខាងនេះដែរម្ចាស់ក្លឹប Kun Khmer International Fight Gym (KKIF) លោក ឧកញ៉ា ស្រី ចាន់ថន បានបង្ហោះសារនៅហ្វេសបុកផេករបស់លោកដោយបញ្ជាក់ថា៖ ទី១ នៅអំឡុងខែសីហា ឆ្នាំ២០២៣ នេះកីឡាករ សុខ ធី នឹងត្រូវប្រកួតក្នុងវិធីធំមួយនៅប្រទេសថៃ។ ទី២ តាមគំនិតរួមរបស់ថ្នាក់ដឹកនាំក្លឹប KKIF គឺមិនចង់ឲ្យកីឡាករខ្មែរប៉ះខ្មែរគ្នាឯងនោះទេ ពិសេសចំពោះកីឡាករដែលស្ថិតក្នុងកម្រិតប្រកួតអន្តរជាតិតែម្ដង។ ទី៣ គោលដៅរបស់ក្លឹបចំពោះការនាំយកកីឡាករ សុខ ធី មកពីថៃវិញនេះគឺចង់ឲ្យរូបគេប្រកួតជាមួយកីឡាករបរទេសដណ្ដើមជ័យជម្នះ និងលើកទង់ជាតិខ្មែរលើកឆាកអន្តរជាតិជូនកម្ពុជា និងជួយផ្សព្វផ្សាយអំពីគុនខ្មែរបន្ថែមទៀតផងដែរ។

រូបភាពលើហ្វេសបុកឧកញ៉ា ស្រី ចាន់ថន

ចុងក្រោយនេះដែរលោកឧកញ៉ាបានសុំការយោគយល់ដោយក្ដីអនុគ្រោះអំពីរឿងដែលកំពុងក្ដៅពាក់ព័ន្ធទៅនិងការផ្គូផ្គងកីឡាករ សុខ ធី នេះផងដែរ។ រំលឹកដែរថា សុខ ធី ជាកីឡាករខ្មែរមួយរូបដែលល្បីឈ្មោះទាំងនៅស្រុកថៃ និងនៅក្នុងប្រទេសកម្ពុជា។ បច្ចុប្បន្ននេះរូបគេបានផ្ទេរ និងរួមរស់ជាមួយក្លឹបថ្មី Kun Khmer International Fight Gym (KKIF) ដែលជារបស់លោកឧកញ៉ា ស្រី ចាន់ថន ហើយ៕