ឯកឧត្តម ស៊ុន ចាន់ថុល ទោះលែងជារដ្ឋមន្រ្តីក្រសួងសាធារណការ តែបន្តទទួលបន្ទុកជួយនាយករដ្ឋមន្រ្តី លើវិស័យនេះដដែល

2023-08-23 04:42:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្តម ស៊ុន ចាន់ថុល ដែលជាអតីតរដ្ឋមន្រ្តីក្រសួងសាធារណការ និងដឹកជញ្ជូន ក្នុងនីតិកាលទី៦ នឹងនៅតែបន្តទទួលបន្ទុកលើការងារនេះដដែលក្នុងឋានៈជាឧបនាយករដ្ឋមន្រ្តី ជួយដល់នាយករដ្ឋមន្រ្តីក្នុងនីតិកាលទី៧នេះ។

យោងតាមសេចក្តីសម្រេចស្តីពី ការកំណត់របៀបរបបការងារ និងការបែងចែកភារកិច្ចរបស់ថ្នាក់ដឹកនាំរាជរដ្ឋាភិបាល ចុះហត្ថលេខាដោយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្រ្តីកម្ពុជា នៅថ្ងៃទី២២ ខែសីហា ឆ្នាំ២០២៣ បង្ហាញឱ្យដឹងថា ឯកឧត្តម ស៊ុន ចាន់ថុល ឧបនាយករដ្ឋមន្រ្តី គឺត្រូវបានសម្រេចឱ្យ៖

-ទទួលបន្ទុកជួយនាយករដ្ឋមន្រ្តីលើការងារទាក់ទាញការវិនិយោគឯកជន និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា

-ទទួលបន្ទុកជាសហប្រធានខាងភាគីកម្ពុជា នៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ដើម្បីអនុវត្តកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ

-ជួយនាយករដ្ឋមន្រ្តីលើការងារគមនាគមន៍ដឹកជញ្ជូន និងភស្តុភារកម្ម ទាំងការដឹកជញ្ជូនផ្លូវគោក ផ្លូវទឹក និងផ្លូវអាកាស និងជាប្រធានក្រុមប្រឹក្សាជាតិភស្តុភារកម្ម

-ទទួលបន្ទុកអនុវត្តការងារពិសេស ឬបេសកកម្មពិសេសផ្សេងទៀត ដែលនាយករដ្ឋមន្រ្តីប្រគល់ជូន៕