គីម ជុងអ៊ុន ជិះរថភ្លើងទៅជួបពូទីន ដល់រុស្ស៊ី! រថភ្លើងនេះ មើលពីក្រៅសាមញ្ញៗ តែពោរពេញដោយភាពប្រណីត និងអាចការពារគ្រាប់កាំភ្លើង-គ្រាប់បែក

2023-09-12 09:31:29
ចំនួនមតិ 0 | ចំនួនចែករំលែក 0

ចន្លោះមិនឃើញ

មេដឹកនាំកូរ៉េខាងជើង លោក គីម ជុងអ៊ុន បានធ្វើដំណើរទស្សនកិច្ចនៅប្រទេសរុស្ស៊ី នៅថ្ងៃទី១២ ខែកញ្ញា ឆ្នាំ២០២៣នេះ ប៉ុន្តែលោកធ្វើដំណើរតាមរថភ្លើងប្រចាំត្រកូលរបស់លោកតែប៉ុណ្ណោះ។

ការពិតទៅ វាពុំមែនជារឿងថ្មីសម្រាប់មេដឹកនាំកូរ៉េខាងជើង ដែលជិះតែរថភ្លើងនេះឡើយ ពោលគឺកន្លងមក លោក គីម ជុងអ៊ុន តែងតែជិះរថភ្លើងសម្រាប់ទស្សនកិច្ចនៅក្រៅប្រទេសជានិច្ច ដូចជាកាលទៅប្រទេសចិនផងដែរ។ មូលហេតុនោះគឺដោយសារតែ ការធ្វើដំណើរតាមរថភ្លើងនេះ គឺមានសុវត្ថិភាពជាងមធ្យោបាយណាៗទាំងអស់។

យោងតាមរបាយការណ៍របស់ក្រសួងផ្សះផ្សារជាតិកូរ៉េខាងត្បូង បានឱ្យដឹងថា រថភ្លើងរបស់លោក គីម ជុងអ៊ុន មានបង្អួចកញ្ចក់ដ៏រឹងមាំដែលអាចការពារគ្រាប់កាំភ្លើងបាន។ លើសពីនេះ ជញ្ជាំង និងបាតរថភ្លើង គឺសុទ្ធតែអាចការពារពីការបំផ្ទុះគ្រាប់បែកទៀតផង។ ជាមួយគ្នានេះ វាក៏បំពាក់អាវុធសម្រាប់វាយប្រហារ និងឧទ្ធម្ភាគចក្រមួយសម្រាប់រត់គេចក្នុងករណីមានអាសន្ន។

ក្រៅពីសុវត្ថិភាពខ្ពស់ រថភ្លើងនេះ ក៏មានភាពប្រណីតខ្ពស់ផងដែរ។ យោងតាមរបាយការណ៍មួយចេញផ្សាយដោយ Reuters ក្នុងអំឡុងដំណើររបស់លោក គីម ជុងអ៊ុន ទៅកាន់វៀតណាម កាលពីឆ្នាំ២០១៩ ឱ្យដឹងថា រថភ្លើងនេះ មានទូចំនួន ២១ ដែលរួមមាន បន្ទប់សន្និសីទ បន្ទប់ទទួលទានអាហារ និងសម្រាក។ រថភ្លើងនេះ ក៏មានទូរសព្ទដែលភ្ជាប់ជាមួយផ្កាយរណបផងដែរ ដែលមេដឹកនាំផ្តាច់ការរូបនេះ នៅតែអាចគ្រប់គ្រងប្រទេសពីចម្ងាយ។ ក្រៅពីនេះ វាក៏មានផ្ទុករថយន្ត Mercedes-Benz limousines ទៅជាមួយលោកផងដែរ៕