កោះ​ដ៏ធំជាងគេបំផុតក្នុងពិភពលោក គឺ​កោះ Greenland ដែលជាកម្មសិទ្ធិរបស់​ប្រទេសដាណឺម៉ាក។

កោះ Greenland ​ស្ថិតនៅ​ក្នុងតំបន់មហាសមុទ្រ​អាត្លង់ទិកខាងជើង មាន​ផ្ទៃដីជាង ២,១៧លានគីឡូម៉ែត្រការ៉េ។ កោះនេះ មានចម្ងាយ​ត្រឹមតែ ២៦គីឡូម៉ែត្រ​ពី​កោះ Ellesmere របស់​កាណាដា និង​ចម្ងាយពីប្រទេស​អ៊ីស្លង់ប្រមាណ ៣២០គីឡូម៉ែត្រ។

ថ្វីបើជាផ្នែកមួយ​នៃប្រទេសដាណឺម៉ាកពិតមែន ប៉ុន្តែ​វាជាកោះស្វយ័ត ពោលគឺ​មានរដ្ឋអំណាច​គ្រប់គ្រងផ្ទាល់ខ្លួន ក្នុងនោះ​មាននាយករដ្ឋមន្រ្តី​ផងដែរ។ កោះ​ធំជាងគេបំផុតនេះ មានប្រជាជនរស់នៅប្រមាណជាង ៥ម៉ឺន ៦ពាន់នាក់ និង​មាន​រដ្ឋធានីឈ្មោះ Nuuk។

ខាងក្រោមនេះ​ជាប្រវត្តិខ្លះៗរបស់​កោះ Greenland:

• ឆ្នាំ៩៨២៖ រកឃើញដោយជនជាតិន័រវេម្នាក់ឈ្មោះ Erik Thorvaldsson ឬ Erik the Red។ លោក​បាន​ហៅកោះនេះថា «Greenland» ដើម្បីឱ្យកាន់តែមានការទាក់ទាញ។ ក្នុងឆ្នាំ​ ៩៨៦ លោកត្រឡប់ទៅកោះនេះវិញជាមួយមនុស្សផ្សេងទៀតហើយតាំងទី​ជម្រកតែម្តង។ ប៉ុន្តែត្រឹមឆ្នាំ១៦០០ គឺមានតែក្រុមកុលសម្ព័ន្ធ Inuit ដែលជាក្រុមមនុស្ស​ផ្សេងប៉ុណ្ណោះ រស់នៅលើកោះនេះ។

• ឆ្នាំ១៧២១៖ ជនជាតិដាណឺម៉ាក ចាប់ផ្តើម​តាំងទីលំនៅលើកោះនេះ នៅតំបន់​ដែលបច្ចុប្បន្ន​គឺស្ថិតនៅ​ជិត​រដ្ឋធានី Nuuk។

• ឆ្នាំ​១៩៤០៖ ពេលនោះដាណឺម៉ាក ត្រូវ​គ្រប់គ្រងដោយអាល្លឺម៉ង់ ក្នុង​សង្គ្រាម​លោកលើកទី២ ប៉ុន្តែ​អាមេរិក បាន​បន្ត​ការពារ​កោះនេះ។

• ឆ្នាំ​១៩៥៣៖ កោះ Greenland ចាប់ផ្តើមក្លាយ​ជាផ្នែកមួយ​នៃប្រទេសដាណឺម៉ាក។

• ឆ្នាំ១៩៧៩៖ ដាណឺម៉ាក បាន​គ្រប់គ្រងកោះនេះ​ដោយពេញលេញ តាមរយៈការបោះឆ្នោតប្រជាមតិ។

• ឆ្នាំ​២០០៨៖ ប្រជាជនកោះ Greenland បានធ្វើការបោះឆ្នោតប្រជាមតិ ដើម្បី​ទាមទារស្វ័យភាព​បន្ថែម​ទៀតពី​ដាណឺម៉ាក។

គួរ​រំលឹកថា កាលពីឆ្នាំ​២០២០ លោក ដូណាល់ ត្រាំ អតីតប្រធានាធិបតីអាមេរិក ក៏ធ្លាប់មានបំណង​ស្នើសុំទិញកោះ​ Greenland នេះផងដែរ ដើម្បីទប់ទល់​ឥទ្ធិពល​របស់​រុស្ស៊ី និងចិន នៅ​តំបន់នោះ។ ប៉ុន្តែបំណងនេះ ត្រូវបានខកខាន ដោយរដ្ឋបាល​របស់លោក បែរ​ជាសម្រេច​ផ្តល់​ជំនួយ ១២លានដុល្លារ ដើម្បីអភិវឌ្ឍសេដ្ឋកិច្ចកោះ Greenland ទៅវិញ៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB

អត្ថបទ៖ សំភី