ការប្រកួតបាល់ទះដណ្ដើមពានរង្វាន់៤ស្មើ Wurkz Special Volleyball Cup 4x4 2024 តាមភូមិ​ភាគបានចាប់ផ្ដើមហើយកាលពីថ្ងៃទី២៤ ខែកុម្ភៈ ឆ្នាំ២០២៤ នៅខេត្តបាត់ដំបងដែល​ជាមណ្ឌល​បើក​ឆាក​​ដំបូងគេមុនឈានដល់៤មណ្ឌលផ្សេងទៀត។

ក្នុងពានរង្វាន់ភូមិភាគដ៏ធំនេះគេឃើញមានកីឡាករនិងក្រុមល្អៗជាច្រើនបានចុះឈ្មោះប្រកួត ដោយឡែកក្លឹបបញ្ជាការដ្ឋានអង្គរក្សដែលសំបូរធនធានកីឡាករល្អៗ មិនបានបញ្ជូនអត្តពលិកចូលរួមឡើយ ខណៈក្លឹបធំៗដូចជាសមាគមបាល់ទះក្រសួងមហាផ្ទៃ ក្លឹប​កងពលធំអន្តរាគមន៍លេខ៣ និងក្លឹប​ស្នងការដ្ឋាននគរបាលរាជធានីភ្នំពេញជា​ដើម​ បានបញ្ជូនកីឡាករខ្លួនចូលរួម​តាម​ភូមិភាគផ្សេងៗគ្នា។

ឃុន ម៉ាណត់ ដែល​ប្រិយមិត្តស្គាល់​ថា​ប៊ូខាវជា​សមាជិកដ៏សំខាន់របស់ក្លឹបបញ្ជាការដ្ឋានអង្គរក្ស ក៏មិនមានវត្តមានក្នុងព្រឹត្តិការណ៍មួយនេះដែរ។ ម៉ាណត់បានប្រាប់មូលហេតុថាដោយសារកីឡាករបញ្ជាការដ្ឋានអង្គរក្សជាប់ប្រកួតពានផ្ទៃក្នុងរបស់ឯកឧត្តម នាយឧត្តមសេនីយ៍កិត្តិសង្គហបណ្ឌិត ហ៊ីង ប៊ុនហៀង និងលោកជំទាវ ប៉ែន ចន្នី ដើម្បីអបអរសាទរឱកាសពិធីបុណ្យចូលឆ្នាំប្រពៃណីជាតិខ្មែរ ដែលការប្រកួតនឹងចាប់ផ្ដើមពីថ្ងៃទី២៦ ខែកុម្ភៈស្អែក​នេះ​ដល់ថ្ងៃទី១៣ ខែមីនា ឆ្នាំ២០២៤។ ដូច្នេះកីឡាករទាំងអស់ត្រូវប្រមូលផ្ដុំតាមក្រុមនីមួយៗ ហើយឃុនម៉ាណត់លេងឲ្យក្រុមទីស្ដីការគណៈរដ្ឋមន្ត្រី។

កីឡាករវ័យ២៤ឆ្នាំ ឃុន ម៉ាណត់ ជាកីឡាករល្អរបស់បញ្ជាការដ្ឋានអង្គរក្ស។ គេបានជួយ​ឱ្យ​ក្លឹប​ធំ​មួយ​នេះ​ទទួល​បាន​ចំណាត់​ថ្នាក់​លេខ​១​ពាន​រង្វាន់​តេជោលីគ​ រដូវ​ទី​១ ឆ្នាំ​២០២៣-២០២៤ ក្រោយ​យក​ឈ្នះ​វិសាខា​បី​សិត​ទល់​មួយ​សិត​នៅ​វគ្គ​ផ្ដាច់​ព្រ័ត្រ។

ងាកមកពានរង្វាន់ Wurkz Special Volleyball Cup ឯណេះវិញគឺមាន៥ភូមិភាគរួមមាន ខេត្ត​បាត់ដំបង សៀមរាប កំពង់ចាម ព្រៃវែង ព្រះសីហនុ។ ភូមិភាគខេត្តបាត់ដំបង បានចាប់ផ្ដើមកាលពីថ្ងៃទី២៤ ខែកុម្ភៈ ហើយថ្ងៃទី២៥ ខែកុម្ភៈនេះជាការប្រកួតវគ្គផ្ដាច់ព្រ័ត្ររវាងសមាគមក្រសួងមហាផ្ទៃ B និងក្លឹបកីឡាបាល់ទះបាត់ដំបង នៅម៉ោង៤រសៀល ចំណែកលេខ៣និងលេខ៤ប្រកួតនៅម៉ោង៣រសៀលនេះ នៅទីលានបាល់ទះវិទ្យាល័យ នេត យ៉ង់៕

អត្ថបទ៖ Um Sopheak