ស្អាតហើយចិត្តសប្បុរសធម៌ទៀត! រ៉េត សារីតា នឹងទៅលើកទឹកចិត្តក្មេងស្រីក្រីក្រក្នុងកម្មវិធីបាល់ទាត់របស់អង្គការ HFCA នៅសៀមរាប

2024-05-01 06:48:05
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងល្បីឈ្មោះរបស់កម្ពុជា កញ្ញា រ៉េត សារីតា នឹងទៅចូលរួមទស្សនាការប្រកួតបាល់ទាត់របស់អង្គការ HFCA នៅភូមិអូររូង ខេត្តសៀមរាប ថ្ងៃពុធ ទី០៨ ខែឧសភា ឆ្នាំ២០២៤ ខាងមុខនេះ។ កញ្ញា នឹងស្នាក់នៅមួយយប់នៅក្នុងភូមិ ហើយនឹងចូលរួមការហ្វឹកហាត់នៅព្រឹកថ្ងៃបន្ទាប់។

ភូមិអូររូង ជាភូមិមួយស្ថិតនៅចម្ងាយ ១២២គម ភាគឦសាន នៃក្រុងសៀមរាប ហើយអង្គការ HFCA រួមជាមួយអង្គការដៃគូដ៏ជិតស្និទ្ធដែលមានឈ្មោះ Build your Future Today បានឧបត្ថម្ភគាំទ្រក្មេងស្រីក្រីក្រនៅទីនោះដើម្បីចូលរួមកម្មវិធីបាល់ទាត់ជាមួយនឹងក្មេងប្រុស។

កញ្ញា រ៉េត សារីតា ៖ “ខ្ញុំគិតថា ការធ្វើទស្សនកិច្ចទៅកាន់អូររូង ពិតជារឿងមួយដ៏គួរឱ្យរំភើបជាខ្លាំងចំពោះខ្ញុំ និងជាការផ្សងព្រេងដ៏អស្ចារ្យផងដែរ! ខ្ញុំចង់ជួបជាមួយក្មេងស្រីទាំងអស់នៅទីនោះ ហើយលើកទឹកចិត្តពួកគេឱ្យចូលរួមក្នុងវិស័យកីឡាកាន់តែផុសផុលច្រើនឡើងថែមទៀត! អ្វីដែលសំខាន់បំផុតគឺដើម្បីធ្វើការប្រាស្រ័យទាក់ទង និងលេងកីឡាជាមួយពួកគេ”។

ចំណែកលោក Paraic Grogan ស្ថាបនិក HFCA៖ “អង្គការ HFCA មានក្តីសោមនស្សរីករាយណាស់ដែលតារាសម្តែងដ៏ល្បីល្បាញរូបនេះ អញ្ជើញមកជួបជាមួយកីឡាកររបស់យើងនៅភូមិអូររូង។ យើងសង្ឃឹមថា សារីតា នឹងជួយគាំទ្រកម្មវិធីបាល់ទាត់នារីតាមភូមិ និងជំរុញលើកទឹកចិត្តឱ្យកុមារីកម្ពុជាចូលលេងបាល់ទាត់កាន់តែផុសផុលច្រើនឡើងថែមទៀត” ។

បញ្ជាក់ដែរថា អង្គការ HFCA (អង្គការកម្ពុជាអូស្ត្រាលីបាល់ទាត់រីករាយ-Happy Football Cambodia Australia) គឺជាអង្គការមិនមែនរដ្ឋាភិបាលមួយ ដែលមានគោលបំណងផ្តល់ភាពអង់អាចដល់យុវជនក្រីក្រនៅកម្ពុជាតាមរយៈវិស័យកីឡាបាល់ទាត់។ អង្គការ HFCA ធានាផ្តល់លទ្ធភាពដល់យុវជនក្រីក្រទទួលបានឱកាសចូលរួមការហ្វឹកហាត់ប្រកបដោយគុណភាពខ្ពស់ ក្នុងការកសាងស្មារតីជាក្រុម និងការប្រមូលផ្តុំ។ កត្តានេះជួយគាំទ្រដល់សុខុមាលភាព សុខភាពផ្លូវចិត្ត ការជឿជាក់លើខ្លួនឯង ហើយជាសំខាន់ផ្តល់នូវវិថីឆ្ពោះទៅរកឱកាសបន្ថែមទៀតដោយអភិវឌ្ឍជំនាញទន់ដើម្បីទទួលបានភាពជោគជ័យក្នុងវិស័យអប់រំ និងការងារ៕

អត្ថបទ៖ នួន ស៊ីណា