បង្ហាញមុខប្រធានសមាគមសិល្បករខ្មែរទាំង ៦ អាណត្តិ

2024-05-03 09:37:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ការបោះឆ្នោតជ្រើសរើសប្រធានសមាគមសិល្បៈបានប្រព្រឹត្តិដោយជោគជ័យ ដោយមានការចូលរួមពីសិល្បករ សិល្បការិនីជាច្រើនក្នុងប្រទេសកម្ពុជា។ តំណែងប្រធានសមាគមសម្រាប់អាណត្តិថ្មីក៏ត្រូវបានរកឃើញ នោះគឺលោកជំទាវអ្នកឧកញ៉ា ម៉ៅ ចំណាន។

សមាគមសិល្បករខ្មែរ ត្រូវបានបង្កើតឡើងតាំងពីឆ្នាំ ២០០៦ រហូតមកដល់ឆ្នាំ ២០២៤នេះ មានរយៈពេល ១៨ឆ្នាំហើយ។ ដោយឡែកជាការសរុប ចាប់តាំងពីបង្កើតសមាគមនេះមក តើតារារូបណាខ្លះដែលបានជាប់ឈ្មោះជាប្រធាន? ពេលនេះ Sabay សូមបង្ហាញជូនតទៅ៖

១. លោក អៀង ស៊ីធុល - ជាប់ជាប្រធានសមាគមអាណត្តិទី១ (ចាប់ពីឆ្នាំ ២០០៦-២០០៩)

សមាគមសិល្បករខ្មែរត្រូវបង្កើតឡើងក្នុងឆ្នាំ២០០៦ ក្រោមស្ថាបនិកផ្តួចផ្តើមដោយឯកឧត្តម ខៀវ តុលា ឯកឧត្តម ជុំ កុសល លោកសយ សុភាព និងលោកអៀង ស៊ីធុល ហើយបានកោះអញ្ជើញសិល្បករសិល្បការិនី ចូលរួមប្រជុំ និងបោះឆ្នោតជ្រើសរើសប្រធាន។ ដោយពេលនោះ លោក អៀង ស៊ីធុល បានជាប់ឆ្នោតជាមួយសំឡេងគាំទ្រភាគច្រើនឲ្យជាប់ជាប្រធានអាណត្តិដំបូង។

២. លោក ម៉ិញ សុធីវណ្ណ - ជាប់ជាប្រធានសមាគមអាណត្តិទី២ (ចាប់ពីឆ្នាំ ២០០៩-២០១១)

យ៉ាងណាក្ដីសម្រាប់លោក ម៉ិញ សុធីវណ្ណ បានសុំលាលែងតំណែងកាលពីថ្ងៃទី២១ ខែមីនា ឆ្នាំ២០១១ ទាំងមិនទាន់បញ្ចប់អាណត្តិ ដោយសារតែលោកមមាញឹកជាមួយតួនាទី ជាប្រធានតន្ត្រីអង្គភាពនៅក្រសួងមហាផ្ទៃ និងមានតួនាទីជាអ្នកនិពន្ធនិងដឹកនាំ ក្រុមតន្ត្រីអង្គភាពក្រសួងមហាផ្ទៃដែលនឹងត្រូវទៅសម្តែងជូនកងទ័ពខ្មែរ ដែលឈរជើងនៅ តាមព្រំដែនខ្មែរ-សៀម។

៣. លោក សុះ ម៉ាច - ជាប់ជាប្រធានសមាគមអាណត្តិទី៣ និងទី ៤ (ចាប់ពីឆ្នាំ ២០១១-២០១៧)

ក្រោយការលាលែងពីតំណែងរបស់លោក ម៉ិញ សុធីវណ្ណ មក នៅថ្ងៃទី០៤ ខែកក្កដា ឆ្នាំ២០១១ សមាគមសិល្បករខ្មែរ បានរៀបចំការប្រជុំជ្រើសរើសប្រធានសមាគមថ្មី នៅសណ្ឋាគារ ណាហ្គាវើល ដែលមានសិល្បករ សិល្បការិនីចូលរួមជាង ៨០នាក់។ នៅក្នុងការប្រជុំជ្រើសរើសប្រធានថ្មីនៅពេលនោះ គឺមានក្រុមប្រឹក្សាភិបាលចំនួន ១១នាក់ ហើយក្រោយពីមានការពិភាក្សាជ្រើសរើស អ្នកទាំង១០រូប បានធ្វើការសម្រេចចិត្ត ប្រគល់តំណែងជាប្រធានសមាគមសិល្បករខ្មែរ ឲ្យលោក សុះ ម៉ាច ព្រោះជឿជាក់ថា លោកប្រាកដជាអាចគ្រប់គ្រងសមាគមនេះ បានល្អ និងមានការរីកចម្រើនជាងមុន។

៤. អ្នកនាង ចនច័ន្ទ លក្ខិណា - ជាប់ជាប្រធានសមាគមអាណត្តិទី៥ (ចាប់ពីឆ្នាំ ២០១៧-២០២៤)

សម្រាប់អាណត្តិរបស់អ្នកនាង ចនច័ន្ទ លក្ខិណា មានរយៈពេលវែងជាងគេ ដោយសារតែវិបត្តិកូវីដ ១៩ និងអូសបន្លាយឈានចូលអាណត្តិថ្មី រហូតដល់ពេលប្រធានសមាគមរូបនេះ ប្រកាសបើកការបោះឆ្នោតជ្រើសរើសប្រធានសមាគមថ្មី។ ក្នុងអាណត្តិនោះ អ្នកនាងបានចូលរួមយ៉ាងសស្រាក់សស្រាំក្នុងការខ្នះខ្នែងជួយសិល្បករបានច្រើនបំផុត។

៥. លោកជំទាវអ្នកឧកញ៉ា ម៉ៅ ចំណាន - ជាប់ជាប្រធានសមាគមអាណត្តិទី ៦ (ចាប់ពីឆ្នាំ ២០២៤ តទៅ)

ក្នុងចំណោមបេក្ខភាព ៣ រូប លោកជំទាវ ម៉ៅ ចំណាន បានក្លាយជាបេក្ខភាពលេចធ្លោ ដែលទទួលបានសំឡេងឆ្នោតគាំទ្រច្រើនលើសលប់ ផ្អែកលើការទុកចិត្តលើសមត្ថភាពទាំងបញ្ញាស្មារតី និងធនធាន ដែលរំពឹងថាជាជន្ទល់ដ៏រឹងមាំបំផុតសម្រាប់សិល្បករសិល្បការិនីទាំងអស់។ ក្រៅយឡើងកាន់តំណែងភ្លាម លោកជំទាវផ្ទាល់ក៏បានបង្ហាញនូវការប្ដេជ្ញាចិត្តជួយមិត្តសិល្បករ និងលើកស្ទួយវិស័យសិល្បៈខ្មែរឲ្យអស់ពីលទ្ធភាព និងកម្លាំងកាយចិត្តដែរ។

បញ្ជាក់ផងដែរថា គោលបំណងរបស់សមាគមសិល្បករខ្មែរ គឺអភិរក្ស អភិវឌ្ឍន៍ លើកស្ទួយវិស័យសិល្បៈជាតិ និងជួយដោះស្រាយរាល់បញ្ហារបស់អ្នកសិល្បៈ ជាពិសេសជួយដល់អ្នកសិល្បៈចាស់ជរា ពិការបាត់បង់សមត្ថភាព និងបាត់បង់ជីវិត និងរួមចំណែកជួយដល់សង្គមជាតិជាដើម ។ នៅក្នុងលក្ខន្តិកៈរបស់សមាគមសិល្បករខ្មែរ គឺឈរលើជំហរអព្យាក្រឹតមិនលំអៀងទៅលើគណបក្សនយោបាយណាមួយឡើយ តែគោរពតាមរដ្ឋធម្មនុញ្ញ និងគោលនយោបាយរបស់រាជរដ្ឋាភិបាល៕

អត្ថបទ៖ ធារី