ចំណុចពិសេសៗទាំងនេះហើយដែលធ្វើឲ្យតេក្វាន់ដូ ITF ទទួលបានការទុកចិត្ត និងសម្ដែងស្ទើរគ្រប់កម្មវិធី

2024-05-27 08:08:45
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប៉ាល់ ជីវ័ន គ្រូបង្វឹកជម្រើសជាតិតេក្វាន់ ITF កម្ពុជា ថារាល់ការទទួលចេញសម្ដែងក្នុងកម្មវិធីកីឡាតូច-ធំ គឺតែងតែគិតគូរកគំនិតថ្មីប្លែកបូកបញ្ចូលជាមួយស្នៀតពិសេសៗ និងមានការហាត់សមត្រឹមត្រូវទើបទទួលបានជោគជ័យជាបន្តបន្ទាប់ និងមានការទុកចិត្តខ្លាំងពីថ្នាក់ដឹកនាំផ្នែកកីឡារហូតមក។

លោក ប៉ាល់ ជីវ័ន

ថ្លែងក្រោយពិធីបិទបញ្ចប់ការប្រកួតកីឡាសិស្សឧត្ដមសិក្សា និងមធ្យមសិក្សាបច្ចេកទេស ឆ្នាំ២០២៤ ម្សិលមិញនេះលោក ប៉ាល់ ជីវ័ន គ្រូបង្វឹកជម្រើសជាតិតេក្វាន់ដូ ITF កម្ពុជាបានឲ្យដឹងថា ការសម្ដែងក្នុងពិធីបិទនេះក្រុមតេក្វាន់ដូទាំងជម្រើសជាតិ និងយុវជនថ្នាលមានសរុប ១០០នាក់។

ទិដ្ឋភាពរៀបជាអក្សរ ITF

ការសម្ដែងម្សិលមិញនេះគឺជាគំនិត និងរូបភាពថ្មីទៀតហើយ ពោលកន្លងទៅសម្ដែងត្រឹមគ្នា ២០-៣០នាក់ប៉ុណ្ណោះ ប៉ុន្តែលើកនេះមានចំនួនច្រើន និងរៀបចេញជាអក្សរ ITF ទៀតផង។ ការសម្ដែងប្រសិនបើធ្វើដដែលៗនោះអ្នកមកចូលរួមក៏មានការធុញទ្រាន់ដែរ ដូច្នេះរាល់ការសម្ដែងម្ដងៗលោកតែងផ្លាស់ប្ដូរបន្តិចបន្តួចជានិច្ចតែមិនចោលក្បាច់ស្នៀតមេគុន ស្នៀតប្រយុទ្ធរបស់ ITF នោះទេ។

ទិដ្ឋភាពសម្ដែងចប់

អតីតម្ចាស់មេដាយមាសពិភពលោក និងជាគ្រូជម្រើសជាតិខាងលើនេះថ្លែងអំណរគុណថ្នាក់ដឹកនាំក្រសួងអប់រំយុវជន និងកីឡា ចំពោះការទុកចិត្ត និងបានផ្ដល់ឱកាសជានិច្ចដល់ក្រុមតេក្វាន់ដូ ITF សម្ដែងក្នុងកម្មវិធីបើក-បិទកីឡាផ្សេងៗកន្លងមក។ ជាមួយគ្នានេះដែរលោកថ្លែងអំណរគុណដល់ប្រធានសហព័ន្ធតេក្វាន់ដូ ITF ឯកឧត្ដម កែវ រ៉េមី ឯកឧត្ដម ប៊ួន ហ៊ីងសុធីយ៉ា អគ្គលេខាធិការ ដែលតែងតែយកចិត្តទុកដាក់ និងចំណាយទាំងថវិកា ពេលវេលា ជាច្រើនពិសេសរាល់ការហ្វឹកហាត់សម្ដែងម្ដងៗ។

រូបភាពអគ្គនាយកដ្ឋានកីឡា

បញ្ជាក់ដែរថា ពិធីបិទការប្រកួតកីឡាសិស្សឧត្ដមសិក្សា និងមធ្យមសិក្សាបច្ចេកទេស ឆ្នាំ២០២៤ កាលពីថ្ងៃទី២៦ ខែឧសភា ម្សិលមិញនេះមានការអញ្ជើញចូលរួមពីឯកឧត្ដម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា។ ក្នុងនោះដែរគឺមានការសម្ដែងរបស់ក្រុមល្បុក្កតោ ក្រុមតេក្វាន់ដូ ITF និងការសម្ដែងសិល្បៈកម្សាន្តផងដែរ។ ការប្រកួតកីឡាសិស្សឧត្ដមនេះធ្វើឡើងចាប់ពីថ្ងៃទី១៨ ដល់ ២៧ ឧសភា ឆ្នាំ២០២៤។ ជាមួយគ្នានោះដែរសកលវិទ្យាល័យអាស៊ីអឺរ៉ុប ជាប់ចំណាត់ថ្នាក់លេខ១ ឈ្នះមេដាយមាស ២៨ ប្រាក់ ១៨ សំរឹទ្ធ ១៥ សរុប ៦១គ្រឿង វិទ្យាស្ថានខេមអេដ ជាប់ចំណាត់ថ្នាក់លេខ២ ឈ្នះមេដាយមាស ១៩ ប្រាក់ ១០ សំរឹទ្ធ ១៦ សរុប ៤៥គ្រឿង សកលវិទ្យាល័យវេស្ទើន ជាប់ចំណាក់ថ្នាក់លេខ៣ ឈ្នះមេដាយមាស ១៦ ប្រាក់ ១៦ សំរឹទ្ធ ១៨ សរុប ៥០គ្រឿង៕