បច្ចុប្បន្ននេះ ក្រុមហ៊ុនរថយន្តធំៗក្នុងពិភពលោក បានទម្លាក់ទំហំម៉ាស៊ីនរថយន្តឱ្យកាន់តែតូចជាងមុន ដើម្បីឆ្លើយតបនឹងច្បាប់កម្រិតនៃការបញ្ចេញផ្សែង និងការសន្សំសំចៃ តាមរយៈការបំពាក់ប្រព័ន្ធជំនួយតូបូជាដើម។

កាន់តែគួរឱ្យកត់សម្គាល់នោះ នៅក្នុងប្រទេសកម្ពុជា ការប្រើប្រាស់រថយន្តថ្មីៗដែលមានទំហំម៉ាស៊ីនក្រោម 2.0L គឺមានការពេញនិយមខ្លាំងបំផុត ជាពិសេសរថយន្តម៉ាស៊ីនទំហំ 1.5L និងជាប្រភេទ SUV កំពុងក្លាយជាទីផ្សារគោលដៅដ៏មានប្រជាប្រិយភាព ដោយសារតែភាពទាន់សម័យ លក្ខខណ្ឌក្នុងការបើកបរល្អ និងភាពទាក់ទាញនៃការរូបរាង។

រថយន្តទំហំម៉ាស៊ីន 1.5L (ប្រភេទតួបូ) គឺជាជម្រើសដ៏ល្អនៃតុល្យភាពថាមពលបើកបរប្រសើរជាងប្រភេទម៉ាស៊ីនទូទៅ ហើយមានប្រសិទ្ធភាពនៃការសន្សំសំចៃប្រេងឥន្ធនៈបានល្អ និងមានតម្លៃសមរម្យ។

តើហេតុអ្វីបានជារថយន្តម៉ាស៊ីន 1.5L តួបូក្លាយជាជម្រើសល្អ?

ជាមួយនឹងជម្រើសម៉ាស៊ីនចំណុះ 1.5L តួបូ លោកអ្នកនឹងទទួលបានថាមពលខ្លាំងគ្រប់គ្រាន់សម្រាប់ការបើកបរទូទៅនៅប្រទេសកម្ពុជា ហើយវាក៏មានប្រសិទ្ធភាពសន្សំសំចៃប្រេងឥន្ធនៈប្រសើរជាងធម្មតា និងមានតម្លៃសមរម្យ។ លក្ខណៈពិសេស3ធំៗរបស់ម៉ាស៊ីនចំណុះ 1.5L តួបូ រួមមានដូចខាងក្រោម៖

1. ប្រសិទ្ធភាពនៃការស៊ីប្រេងឥន្ធនៈទាប

តម្លៃប្រេងឥន្ធនៈនៅប្រទេសកម្ពុជាមានការឡើងចុះប្រែប្រួលមិនទៀត ដូច្នេះរថយន្តដែលស៊ីប្រេងឥន្ធនៈទាប គឺជាកត្តាសំខាន់បំផុតនៅពេលជ្រើសរើសទិញរថយន្តថ្មី ហើយជម្រើសរថយន្តប្រភេទ SUV ដែលមានម៉ាស៊ីនចំណុះ 1.5L តួបូពិតជាជម្រើសដ៏គួរឱ្យទាក់ទាញទាំងការបើកបរក្នុងទីក្រុង និងការធ្វើដំណើរផ្លូវឆ្ងាយដែលស៊ីប្រេងឥន្ធនៈចន្លោះពី 6-9L/100Km។

2. ដំណើរការបើកបរ

បើទោះបីជាម៉ាស៊ីនមានទំហំតូចក៏ពិតមែន ប៉ុន្តែរថយន្តដែលមានម៉ាស៊ីនចំណុះ 1.5L ហើយបន្ថែមដោយតួបូគឺអាចផ្តល់ថាមពលខ្លាំងគ្រប់គ្រាន់ និងមានដំណើរការបើកបរល្អប្រសើរ។ រថយន្តប្រភេទSUV ដែលបំពាក់ដោយម៉ាស៊ីន 1.5L តួបូភាគច្រើនគឺផ្តល់កម្លាំងសេះចន្លោះពី 120 ទៅ 180 HP និងផ្តល់នូវសំទុះនៃការបង្កើនល្បឿនបានខ្លាំងល្អដោយមិនបាត់បង់ប្រសិទ្ធភាពនៃការបើកបរ។

3. តម្លៃសមរម្យ

ប្រសិនបើប្រៀបធៀបទៅនឹងម៉ូដែលផ្សេងៗដែលមានម៉ាស៊ីនធំ នោះរថយន្តប្រភេទ SUV ដែលបំពាក់ដោយម៉ាស៊ីន 1.5L ច្រើនតែមានតម្លៃសមរម្យ ព្រមទាំងផ្តល់នូវតម្លៃលក់ចេញបានខ្ពស់ និងងាយស្រួលថែទាំ។ សម្រាប់អ្នកបើកបរនៅកម្ពុជាអាចរីករាយជាមួយនឹងភាពប្រណិតនៃរថយន្តSUV និងសមត្ថភាពនៃការបើកបរកាន់តែខ្លាំង ដោយមិនបាច់ចំណាយថវិកាច្រើនទេ តម្លៃមានចាប់ពី $30,000 ទៅ $50,000 ប៉ុណ្ណោះ។

យើងសូមបង្ហាញពីរថយន្តប្រភេទ SUV 3ម៉ូឌែល ដែលមានម៉ាស៊ីនចំណុះ 1.5L និងពេញនិយមនៅលើទីផ្សារកម្ពុជា៖

1. រថយន្ត MG RX5 ៖ MG បានបង្កើតភាពលេចធ្លោយ៉ាងខ្លាំងនៅក្នុងប្រទេសកម្ពុជាជាមួយនឹងម៉ូដែលដែលលក់ដាច់ខ្លាំងរបស់ខ្លួនគឺរថយន្ត MG RX5 ដោយបំពាក់ម៉ាស៊ីនចំណុះ 1.5L តួបូ 4ស៊ីឡាំង។ ការរចនារួមបញ្ចូលគ្នានូវសោភ័ណ្ឌភាពបែបស្ព័រនៃរូបរាង និងដំណើរការបើកបរដ៏អស្ចារ្យ ដោយផ្តល់នូវកម្លាំងសេះ 171hp និងកម្លាំងរមួល 250Nm។ រថយន្ត MG RX5 ក៏មានលក្ខណៈពិសេសដ៏សំបូរបែប និងបំពាក់ដោយបច្ចេកវិទ្យាសុវត្ថិភាពស្តង់ដារ ដែលធ្វើឱ្យវាក្លាយជារថយន្តSUV ប្រភេទម៉ាស៊ីន 1.5L តួបូដែលមានតម្លៃល្អជាងគេ និងមានប្រសិទ្ធភាពស៊ីប្រេងឥន្ធនៈទាបដែលអាស្រ័យទៅលើលក្ខខណ្ឌនៃការបើកបរ។ តម្លៃរថយន្ត MG RX5 គឺចាប់ពី $36,000 ជាមួយការធានា 5ឆ្នាំ ឬ 150,000Km។

2. រថយន្ត Ford Territory ៖ ភាពជឿជាក់នៃការបើកបររថយន្ត Ford Territory ដែលបំពាក់ដោយម៉ាស៊ីនចំណុះ 1.5L Eco Boost គឺផ្តល់នូវបទពិសោធន៍នៃការបើកបរដ៏ល្អ ជាមួយនឹងការផ្តល់កម្លាំងសេះ 163hp និងកម្លាំងបង្វិល 225Nm។ តាមរយៈមុខងារប្រើប្រាស់ដែលជាជំនួយការបើកបរដ៏ល្អ និងភាពស្រស់ស្អាតនៃរថយន្ត Ford Territory បានបង្កើតជាជម្រើសដ៏ប្រកួតប្រជែងសម្រាប់ប្រជាជនកម្ពុជាដែលស្វែងរករថយន្តប្រភេទSUVទំនើប ប៉ុន្តែមានតម្លៃខ្ពស់រហូតដល់ $48,900 និងមានការធានារយៈពេល 3ឆ្នាំ ឬ 100,000Km។

3. រថយន្ត Mitsubishi XForce ៖ ជាម៉ូដែលថ្មីទើបតែបង្ហាញខ្លួននៅលើទីផ្សារប្រទេសកម្ពុជា។ រថយន្ត Mitsubishi XForce បំពាក់ដោយម៉ាស៊ីនចំណុះ 1.5L ផ្តល់កម្លាំងសេះត្រឹមតែ 104hp និងកម្លាំងរមួល 141Nm។ រថយន្ត Mitsubishi XForce ត្រូវបានរចនាដោយផ្នែកខាងក្នុងពណ៌ខ្មៅ មានលក្ខណៈពិសេសច្រើន និងផ្នែកខាងក្រៅគួរឱ្យទាក់ទា ដែលធ្វើឱ្យវាក្លាយជាជម្រើសបន្ថែមមួយនៅក្នុងទីផ្សាររថយន្ត SUV ជាមួយតម្លៃ $39,900 និងមានការធានារយៈពេល 3ឆ្នាំ ឬ 100,000Km។

សរុបមក តើរថយន្តប្រភេទSUV មួយណាដែលមានតម្លៃល្អគួរតែវិនិយោគ?

នៅពេលប្រៀបធៀបរថយន្ត MG RX5, Ford Territory និង Mitsubishi XForce យើងឃើញថារថយន្ត MG RX5 និង Mitsubishi XForce គឺលេចធ្លោជាងគេសម្រាប់អ្នកដែលកំពុងស្វែងរករថយន្តមានតម្លៃសមរម្យ ព្រោះវាមានតម្លៃទាបជាង Ford Territory។ ខណៈដែល Mitsubishi XForce និង MG RX5 មានតម្លៃប្រហាក់ប្រហែលគ្នាដែលជាជម្រើសសម្រាប់អ្នកប្រើប្រាស់ដែលចង់បានរថយន្តថ្មីមានតម្លៃល្អ ក៏ប៉ុន្តែ Mitsubishi XForce គឺមានកម្លាំងសេះទាបជាង MG RX5។ ម៉្យាងវិញទៀត Ford Territory គឺពិតជាល្អសម្រាប់អ្នកដែលផ្តល់អាទិភាពខ្ពស់ទៅលើបច្ចេកវិទ្យាប្រើប្រាស់ទំនើបនិងមានតម្លៃខ្ពស់។ សរុបមកជម្រើសរវាង MG RX5, Ford Territory និង Mitsubishi XForce គឺអាស្រ័យលើតម្រូវការប្រើប្រាស់របស់លោកអ្នក។ ប្រសិនបើអ្នកត្រូវការរថយន្តដែលមានកម្លាំងខ្លាំងហើយមានតម្លៃសមរម្យនោះរថយន្ត MG RX5 ជាជម្រើស ក៏ប៉ុន្តែ Ford Territory ក៏ជាជម្រើសដ៏ល្អសម្រាប់អ្នកដែលស្វែងរកបច្ចេកវិទ្យាថ្មី គ្រាន់តែតម្លៃក៏ខ្ពស់បន្តិចដែរ។