នារសៀលថ្ងៃសុក្រ ទី០១ ខែវិច្ឆិកា ឆ្នាំ២០២៤ យុទ្ធនាការភ្នំពេញស្អាតត្រូវបានប្រកាសបើកជាផ្លូវការ នៅសកលវិទ្យាល័យភ្នំពេញអន្តរជាតិ (PPIU) ក្រោមអធិបតីភាពដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្រ្តីក្រសួងមុខងារសាធារណៈ និងជាប្រធានក្រុមប្រឹក្សាភិបាលនៃគម្រោងស្អាត មានការចូលរួមពី ឯកឧត្តម ហួត ហៃ អភិបាលរងតំណាងឯកឧត្តម ឃួងស្រេង អភិបាលនៃគណះអភិបាលរាជធានីភ្នំពេញ និងឯកឧត្តម សាបូ អូហ្សាណូ រដ្ឋលេខាធិការ ក្រសួងបរិស្ថានតំណាង ឯកឧត្តម អ៊ាង សុផល្លែត រដ្ឋមន្រ្តីក្រសួងបរិស្ថាន ព្រមទាំងមានការចូលរួមពីសំណាក់ ឯកឧត្តមលោកជំទាវ ថ្នាក់ដឹកនាំក្រសួង ស្ថាប័នរដ្ឋ ក្រុមហ៊ុនឯកជន សិល្បករ influencer អ្នកសារព័ត៌មាន និងយុវជនសុឆន្ទៈស្អាតជាច្រើនរូបផងដែរ។

ចក្ខុ​វិស័យថ្មី​នៃយុទ្ធនាការភ្នំពេញស្អាត​សម្រាប់ឆ្នាំ២០២៤ បានដាក់ចេញឡេីងក្រោមទិសស្លោកថ្មី "ខ្មែរស្អាត” ដែលជាការវិវត្តបន្ថែមថ្មី​ ផ្ដោតលេីការបញ្ជ្រាបសារអប់រំ ដេីម្បីលេីកកម្ពស់វប្បធម៌​ និងសីលធម៌​នៃការរស់នៅស្អាត​ ស្របតាមយន្តការ​ ចិត្តស្អាត​ អាកប្បកិរិយាស្អាត​ ប្រតិបត្តិស្អាត​។

គួរបញ្ជាក់ផងដែរថា​ ក្រោមទិសស្លោកថ្មីនេះគម្រោងស្អាតបានដាក់ចេញនូវផែនការយុទ្ធសាស្រ្តធំៗ​ ចំនួនបី រួមមាន​ “ចិត្តខ្ញុំស្អាត​ ខ្មែរស្អាត” “ជុំរុំស្អាត ខ្មែរស្អាត” និង“ធុរកិច្ចយេីងស្អា​ត​ ខ្មែរស្អាត" ដែលយេីងជឿជាក់យ៉ាងមុតមាំថា ខ្មែរស្អាតគឺ​​ផ្តើមចេញពីការមានផ្នត់គំនិតវិជ្ជមាន​ក្នុងនាមជាខ្មែរមួយរូប ការរួបរួមសាមគ្គីក្រោមទង់ជាតិខ្មែរតែមួយ ឥរិយាបទថ្លៃថ្នូរ​របស់ប្រជាជនខ្មែរគ្រប់រូប និងការប្រតិបត្តិស្អាតប្រកបទៅដោយសេចក្តីថ្លៃថ្នូរក្នុងនាមជាកូនខ្មែរនិងជាប្រជាជនខ្មែរមួយរូបនៅក្នុងសង្គម។

ក្រុមការងារប្រតិបត្តិនៃគម្រោងភ្នំពេញ​ស្អាត​ សូមថ្លែងអំណរគុណយ៉ាងជ្រាលជ្រៅចំពោះវត្តមាន​ ឯកឧត្តមលោកជំទាវ​ អ្នក​ឧកញ៉ា​ លោកឧកញ៉ា លោក​ លោកស្រីតំណាងក្រសួង ស្ថាប័នរដ្ឋ ឯកជន អង្គការសង្គមស៊ីវិល​ក្រុមហ៊ុនឧបត្ថម្ភ ភ្ញៀវកិត្តិយសទាំងអស់ដែលបានចំណាយពេលវេលាដ៏មានតម្លៃអញ្ជើញចូលរួម​ ពិធីបើកជាផ្លូវការ​ “យុទ្ធនាការភ្នំពេញស្អាតឆ្នាំ២០២៤”៕