ស្ថិតនៅចំកណ្ដាលហ្វូងមនុស្សដែលភាគច្រើនជាអ្នកគាំទ្រចង់ប៉ះដៃ និងទទួលផ្កាកុលាបពីIDOLរបស់ខ្លួនដោយផ្ទាល់ កំពូលតារាចម្រៀង ព្រាប សុវត្ថិ ត្រូវបានអ្នកគាំទ្រដណ្ដើមគ្នាប៉ះដៃ និងទទួលផ្កាស្ទើរដើរទៅមុខមិនរួច។

វីដេអូមួយបង្ហាញចេញពីទីតាំងព្រឹត្ដិការណ៍ប្រគុំតន្ដ្រីនៅខេត្ដព្រៃវែង កាលពីថ្ងៃទី២៣ ខែធ្នូ ឆ្នាំ២០២៤ ថ្ពក់ចិត្ដអ្នកគាំទ្របានកាន់តែច្រើនតាមរយៈសកម្មភាពសាមញ្ញៗរបស់លោក។

ស្របពេលដែលMV បទ”កុលាបមានបន្លា” ផ្ទុះការគាំទ្រខ្លាំង គេសង្កេតឃើញផ្កាកុលាបតែងតែមាននៅក្នុងដៃអ្នកគាំទ្រ និងម្ចាស់បទផ្ទាល់។ ជាក់ស្ដែងតារាប្រុសរូបនេះ បានកាន់ផ្កាកុលាបមួយបាច់ធំ ដើរចែកជូនអ្នកគាំទ្រនៅមុនឡើងឆាកចម្រៀង ដោយអ្នគាំទ្រខ្លះប្រឹងរុលទៅមុខ ដើម្បីចាប់ដៃ និងទទួលផ្កាកុលាប ហើយនិយាយថា៖ “ស្រឡាញ់ពេញបេះដូងហើយ Idol”។

បង្ហាញវត្ដមានជាមួយតារាចម្រៀងល្បីៗជាច្រើនដួង ក្នុងព្រឹត្ដិការណ៍ប្រគុំតន្ដ្រីតាមខេត្ដក្នុងរយៈពេលប៉ុន្មានថ្ងៃចុងក្រោយនេះ ធ្វើឲ្យមហាជន ជាពិសេសអ្នកខេត្ដដែលទទួលបានធ្វើជាម្ចាស់ផ្ទះក្នុងការរៀបចំប្រគុំតន្ដ្រីទាំងនោះពេញចិត្ដយ៉ាងខ្លាំង។កំពូលតារាចម្រៀង ព្រាប សុវត្ថិ បានបង្ហាញសកម្មភាពលេចធ្លោរជាងគេ ក្នុងចំណោមតារាផ្សេងៗ រាប់ចាប់តាំងពីចុះពីលើរថយន្ដសេរីទំនើប រហូតចូលដល់ហ្វូងអ្នកគាំទ្រនៅខាងមុខឆាក។

ចំពោះមតិរបស់មហាជន លើការបង្ហាញខ្លួនជាសាធារណៈតាមឆាកប្រគំតន្ដ្រីនានា ក៏ដូចជាការបញ្ចេញបទចម្រៀងថ្មីៗមួយរយៈចុងក្រោយនេះ គឺទទួលបានការគាំទ្រខ្លាំង ហើយត្រូវបានពួកគេផ្ដល់ពិន្ទុពេញៗ បើទោះបីជាឈុតសម្ដែងក្នុងMV នៅមានការឆកល្វែងដោយពួកគេនិយាយថា អ្នកនិពន្ធ និងដឹកនាំសម្ដែងឲ្យប្រើស្ដាយ និងប្លង់ថតមិនសូវខុសបទមុនៗ ប៉ុន្ដែបើនិយាយពីសមត្ថភាព និងទេពកោសល្យរបស់IDOL ព្រាប សុវត្ថិ វិញ គឺនៅពេញប៊ឹប៕