«យើង​គ្រប់​គ្នា​​នៅ​ទី​នេះ​ពិត​ជា​ចង់​ឈ្នះ​ពាន​ Premier League ខ្លាំង​ណាស់​ឆ្នាំនេះ»​។ នេះ​ជា​ការ​លើក​ឡើង​របស់ Mo Salah ក្រោយ​ពេល​ជួយ​ក្រុម​ឲ្យ​ឈ្នះ​ទៅ​លើ​ Leicester City ៣-១ កាល​ពី​យប់មិញ​ក្នុង​ជំនួប​នៃ​ English Premier League ​សប្ដាហ៍​ទី​១៨​។

គិត​មក​ដល់​ពេលនេះ​ Liverpool បាន​​ដាច់​ពិន្ទុ​​ពី​ក្រុម​លេខ​២​កាន់​តែ​ឆ្ងាយ​៧​ពិន្ទុ​ទៅ​ហើយ បន្ថែម​​ពី​នេះ​កំពុង​តែ​សល់​១​ប្រកួត​ក្នុង​ដៃ​បន្ថែម​ទៀត​។ ​មិន​ថា​ក្នុង​ EPL និង UEFA Champions League ​ហង្ស​ក្រហម​កំពុង​តែ​ជោគជ័យ​ខ្លាំង​។

​ក្រោយ​ការ​ប្រកួត​យប់មិញ​នេះ​ខ្សែ​ប្រយុទ្ធ​ Salah បាន​និយាយ​បែបនេះ​ថា «​ឆ្នាំ​នេះ​​ពិត​ជា​មាន​ភាព​ខុស​ប្លែក​​ពី​ឆ្នាំមុន​​សម្រាប់​ក្រុម​របស់​​យើង​។....ឆ្នាំ​នេះ​ខ្ញុំ​ពិត​ជា​ចង់​ឃើញ​ក្រុម​របស់​យើង​ឈ្នះ​ពាន​ EPL ខ្លាំង​ណាស់​ ពិសេស​សម្រាប់​ខ្ញុំ​ផ្ទាល់​​តែម្ដង​។ អារម្មណ៍​របស់​ខ្ញុំ​ចង់​ឈ្នះ​ពាន​នេះ​ខ្លាំង​...ដូច្នេះ​យើង​ត្រូវ​តែ​ធ្វើ​វា​ទាំង​អស់​គ្នា​ដើម្បី​សម្រេច​គោលដៅ​នេះ​»។​

ខ្សែ​ប្រយុទ្ធ​វ័យ​៣២​ឆ្នាំ​បាន​លើក​ឡើង​ទៀត​ថា «​ប៉ុន្តែ​យើង​ត្រូវ​តែ​ចាំ​វា​ឲ្យ​ច្បាស់​ អ្វី​ដែល​សំខាន់​​ខ្លាំង​បំផុត​នោះ​​គឺ​​យើង​នៅ​បន្ត​ប្រឹង​​ប្រែង​ធ្វើ​វា​ឲ្យ​ដូច​ពេលនេះ​ ហើយ​ដាក់​ខ្លួន​ឲ្យ​បាន​ខ្លាំង​បំផុត​»៕ ​