នាយកប្រតិបត្តិរបស់ក្រុមហ៊ុន TikTok លោក Shou Chew បានបង្ហាញខ្លួននៅក្នុងពិធីស្បថ ចូលកាន់តំណែងរបស់ប្រធានាធិបតី អាមេរិក លោក Donald Trump ដែលបានធ្វើឡើងនៅ Washington។ ការបង្ហាញខ្លួន របស់ CEO TikTok នៅក្នុងពិធីស្បថចូលកាន់តំណែងរបស់ លោក Trump ហាក់ជាសញ្ញាបង្ហាញឱ្យឃើញថា ក្តីសង្ឃឹមរបស់ បណ្តាញសង្គមនេះ អាចនឹងមិនត្រូវបានបិទនោះទេ ក្នុងទឹកដីអាមេរិក។ យ៉ាងណា ចំពោះបញ្ហាអនាគត គឺនៅស្រពិចស្រពិល នៅឡើយ។

ចំពោះរឿងរ៉ាវចម្រូងចម្រាស់ ក្នុងការបន្តវត្តមាន TikTok ក្នុងទឹកដីសហរដ្ឋអាមេរិក លោក Donald Trump បាននិយាយថា លោកចង់ឱ្យមានភាគហ៊ុន អាមេរិក ៥០ ភាគរយ ក្នុងក្រុមហ៊ុនបណ្តាញសង្គមនេះ។ ការទិញភាគហ៊ុន ពាក់កណ្តាល ជាវិធីសាស្រ្ត ដែលប្រធានាធិបតីអាមេរិក ជឿជាក់ថា នឹងអាចសង្គ្រោះ TikTok ពីការបិទ ហើយអាចបន្តប្រតិបត្តិការរបស់ខ្លួន ក្នុងទឹកដីអាមេរិក បន្តទៅមុខទៀត។

ទំនាក់ទំនងល្អ រវាង CEO TikTok និង Donald Trump ជាកូនសោរ ដើម្បីចាក់ទៅរកដំណោះស្រាយដ៏សមប្រកបមួយ។ ជាក់ស្តែង កាលពីថ្ងៃអាទិត្យកន្លងទៅ ពោលគឺនៅថ្ងៃទី ១៩ ខែមករា ឆ្នាំ ២០២៥ កម្មវិធីបណ្តាញសង្គមនេះ ត្រូវបានបិទ នៅអាមេរិក ដោយអនុវត្តតាមច្បាប់ស្តីពី ការគំរាមកំហែងផ្នែកសន្តិសុខជាតិ។ ប៉ុន្តែ ការបិទនេះ ធ្វើឡើងបានតែមួយថ្ងៃប៉ុណ្ណោះ ហើយដោយសារតែឥទ្ធិពលរបស់ Trump កម្មវិធីបណ្តាញសង្គមនេះ បានបើកដំណើរការឡើងវិញ ជាធម្មតា។ មកទល់ពេលបច្ចុប្បន្ននេះ TikTok មានអ្នកប្រើជាជនជាតិអាមេរិក ប្រមាណ ១៧០លាននាក់៕

ប្រភព ៖ Financial Post