ក្រសួងថាមពលសហរដ្ឋអាមេរិក (DOE) កំពុងប្រញាប់ប្រញាល់ជួលបុគ្គលិករាប់សិបនាក់ឡើងវិញពីរដ្ឋបាលសន្តិសុខនុយក្លេអ៊ែរជាតិ (NNSA) បន្ទាប់ពីកំហុសដ៏ធំមួយរបស់នាយកដ្ឋានប្រសិទ្ធភាពរដ្ឋាភិបាល (DOGE) បាននាំឱ្យមានការបណ្តេញចេញដោយមិននឹកស្មាន ដែលបង្កឱ្យមានក្តីបារម្ភអំពីសន្តិសុខជាតិ។ ហេតុការណ៍នេះបានកើតឡើងនៅពាក់កណ្តាលខែកុម្ភៈ ហើយបានលាតត្រដាងពីចន្លោះប្រហោងនៅក្នុងយុទ្ធសាស្ត្រកាត់បន្ថយការចំណាយដ៏ខ្លាំងក្លារបស់ DOGE និងជំរុញឱ្យមានសកម្មភាពបន្ទាន់ដើម្បីស្តារជំនាញសំខាន់ៗឡើងវិញ។

ការបណ្តេញចេញបានកើតឡើងនៅថ្ងៃទី ១៣ ខែកុម្ភៈ ឆ្នាំ២០២៥ ជាផ្នែកមួយនៃគំនិតផ្តួចផ្តើមដ៏ធំរបស់ DOGE ក្នុងការកាត់បន្ថយការចំណាយសហព័ន្ធក្រោមរដ្ឋបាលលោក ដូណាល់ ត្រាំ។ ការកាត់បន្ថយនេះបានរួមបញ្ចូលរដ្ឋបាលសន្តិសុខនុយក្លេអ៊ែរជាតិ NNSA ដែលទទួលខុសត្រូវលើការគ្រប់គ្រងឃ្លាំងអាវុធនុយក្លេអ៊ែររបស់ប្រទេស។ នេះជាកំហុសមួយដែលប្រភពនានាបាននិយាយថា DOGE ធ្វើឡើងដោយសារខ្វះការយល់ដឹងអំពីតួនាទីសំខាន់របស់ភ្នាក់ងារនេះ។

របាយការណ៍ដំបូងបង្ហាញថា បុគ្គលិក NNSA រហូតដល់ ៤០០ នាក់ត្រូវបានបណ្តេញចេញ ទោះបីជា ក្រសួងថាមពលសហរដ្ឋអាមេរិក ក្រោយមកបានអះអាងថា ចំនួននេះនៅជិត ៥០ នាក់ប៉ុណ្ណោះ ដែលភាគច្រើនជាតួនាទីរដ្ឋបាល។ ទោះបីចំនួនពិតប្រាកដជាអ្វីក៏ដោយ ការបណ្តេញនេះបានបង្កឱ្យមានការវឹកវរ នៅក្នុងក្រសួង។ អ្នកជំនាញបានព្រមានថា ការបាត់បង់អ្នកឯកទេសទាំងនេះ អាចបង្កគ្រោះថ្នាក់ដល់សុវត្ថិភាព និងសន្តិសុខនៃឃ្លាំងអាវុធនុយក្លេអ៊ែរ សហរដ្ឋអាមេរិក។

“វាជាកំហុសដ៏គួរឱ្យភ័យខ្លាច” អតីតមន្ត្រី NNSA ម្នាក់ដែលមិនបញ្ចេញឈ្មោះបាននិយាយ។ “នេះមិនមែនជាការងារធម្មតាទេ ពួកគេជាឆ្អឹងខ្នងនៃការទប់ស្កាត់នុយក្លេអ៊ែររបស់យើង។ ភាពចលាចលនៃការបណ្តេញ និងការហៅពួកគេត្រឡប់មកធ្វើការវិញអាចប៉ះពាល់ដល់ប្រតិបត្តិការនៅពេលដែលភាពជាក់លាក់មិនអាចចរចាបាន” ។ មន្ត្រីរូបនេះបានចង្អុលបង្ហាញពីតួនាទីរបស់ រដ្ឋបាលសន្តិសុខនុយក្លេអ៊ែរជាតិ ក្នុងការរចនា ថែទាំ និងត្រួតពិនិត្យអាវុធនុយក្លេអ៊ែរ ព្រមទាំងការងារប្រឆាំងភេរវកម្ម។

កិច្ចខិតខំប្រឹងប្រែង ហៅបុគ្គលិកមកធ្វើការឡើងវិញរបស់ ក្រសួងថាមពលសហរដ្ឋអាមេរិកបានជួបបញ្ហាប្រឈមផ្នែកភស្តុភារ។ បុគ្គលិកបានរាយការណ៍ថាពួកគេបាត់បង់សិទ្ធិក្នុងការចូលប្រើ E-mail និងប្រព័ន្ធរដ្ឋាភិបាល ដែលធ្វើឱ្យការទំនាក់ទំនងមានភាពស្មុគស្មាញ។ “ពួកគេមិនអាចទាក់ទង មកយើងដើម្បីប្រាប់ថា យើងត្រូវបានហៅឱ្យត្រឡប់មកធ្វើការឡើងវិញទេ” បុគ្គលិកម្នាក់ដែលរងផលប៉ះពាល់បានប្រាប់អ្នកសារព័ត៌មាន ដោយបង្ហាញពីភាពច្របូកច្របល់។ ក្រសួងបានទទួលស្គាល់តម្រូវការក្នុងការធានាថា បុគ្គលិកដែលត្រូវបានជួលឱ្យធ្វើការឡើងវិញទាំងអស់ត្រូវបានរំលឹកអំពីកាតព្វកិច្ចសុវត្ថិភាពរបស់ពួកគេ ដែលជាជំហានមួយដែលអ្នកជំនាញនិយាយថាមានសារៈសំខាន់ដើម្បីកាត់បន្ថយហានិភ័យនៃការលេចធ្លាយព័ត៌មានសម្ងាត់។

ហេតុការណ៍នេះបានទាញការរិះគន់យ៉ាងខ្លាំងពីសមាជិកសភា និងសហជីព។ តំណាង Marcy Kaptur (គណបក្សប្រជាធិបតេយ្យ-រដ្ឋ Ohio) និងសមាជិកព្រឹទ្ធសភា Patty Murray (គណបក្សប្រជាធិបតេយ្យ-វ៉ាស៊ីនតោន) បានទាមទារឱ្យមានការប្រជុំសភា ដោយហៅការបណ្តេញនេះថា “មិនប្រុងប្រយ័ត្ន” និងជាការគំរាមកំហែងដល់សន្តិសុខជាតិ។ សហព័ន្ធបុគ្គលិករដ្ឋាភិបាលអាមេរិក ដែលតំណាងឱ្យបុគ្គលិកសហព័ន្ធជាង ៨០០,០០០ នាក់ បានហៅចលនានេះថា “ភាពឆ្កួតលីលាដោយគ្មានការវិនិច្ឆ័យ” ដោយចោទប្រកាន់ DOGE ថាផ្តល់អាទិភាពដល់ការកាត់បន្ថយជាងសមត្ថភាព។

DOGE ដែលត្រូវបានបង្កើតឡើងនៅថ្ងៃទី ២០ ខែមករា ឆ្នាំ២០២៥ ត្រូវបានចាត់តាំងឱ្យធ្វើទំនើបកម្មបច្ចេកវិទ្យាសហព័ន្ធ និងកាត់បន្ថយការចំណាយ។ លោក Elon Musk រួមជាមួយលោក Vivek Ramaswamy បានការពារគំនិតផ្តួចផ្តើមនេះ ដោយទទួលស្គាល់កំហុសប៉ុន្តែសន្យាថានឹងកែតម្រូវយ៉ាងរហ័សបំផុត។ “យើងកំពុងធ្វើការយ៉ាងលឿនដើម្បី ប៉ះប៉ូវកំហុសដែលបានបង្កឡើង” លោក Elon Musk បាននិយាយនៅក្នុងសេចក្តីថ្លែងការណ៍ កាលពីខែកុម្ភៈ កន្លងទៅ៕

ប្រភព៖ Yahoo   អត្ថបទ ៖ គីម ណារ៉ាក់