ចំនួនអ្នកស្លាប់ដោយសាររញ្ជួយដីដ៏ខ្លាំងក្លាមួយនៅប្រទេសមីយ៉ាន់ម៉ាបានបន្តកើនឡើងនៅថ្ងៃអាទិត្យនេះ ខណៈដែលក្រុមជួយសង្គ្រោះមកពីបរទេស និងជំនួយផ្សេងៗកំពុងប្រញាប់ប្រញាល់ចូលទៅកាន់ប្រទេសដែលក្រីក្រមួយនេះ។ មន្ទីរពេទ្យនានាកំពុងជួបបញ្ហាលើសចំណុះ ហើយសហគមន៍មួយចំនួនកំពុងតែព្យាយាមរៀបចំការជួយសង្គ្រោះជាមួយនឹងធនធានដែលមានកម្រិត។

រញ្ជួយដីកម្រិត ៧.៧ រ៉ិចទ័រដែលបានកើតឡើងនៅថ្ងៃសុក្រ ទី២៨ ខែមីនា នៅតំបន់សាកាយ (Sagaing) ជិតទីក្រុងម៉ាន់ដាឡេ (Mandalay) បានបណ្តាលឱ្យមានការបំផ្លិចបំផ្លាញយ៉ាងធ្ងន់ធ្ងរ។ យោងតាមរបាយការណ៍ពីរដ្ឋាភិបាលយោធាមីយ៉ាន់ម៉ា គិតត្រឹមថ្ងៃសៅរ៍ ចំនួនអ្នកស្លាប់បានកើនឡើងដល់ ១,៦៤៤ នាក់ និងមានអ្នករបួសជាង ៣,៤០០ នាក់ ខណៈ ១៣៩ នាក់ផ្សេងទៀតនៅតែបាត់ខ្លួន។ អ្នកជំនាញពីសហរដ្ឋអាមេរិក (U.S. Geological Service) បានព្យាករណ៍ថា ចំនួនអ្នកស្លាប់អាចនឹងកើនឡើងលើស ១០,០០០ នាក់ ដោយសារតែផលប៉ះពាល់ធ្ងន់ធ្ងរនៃគ្រោះមហន្តរាយនេះ។

ប្រទេសជិតខាងដូចជា ឥណ្ឌា ចិន ថៃ ម៉ាឡេស៊ី សិង្ហបុរី និងរុស្ស៊ី បានបញ្ជូនក្រុមជួយសង្គ្រោះ និងគ្រឿងផ្គត់ផ្គង់ជាបន្ទាន់ទៅកាន់មីយ៉ាន់ម៉ា។ ឥណ្ឌាបានចាប់ផ្តើមប្រតិបត្តិការ “Operation Brahma” ដោយបញ្ជូនកងកម្លាំងជួយសង្គ្រោះ ៨០ នាក់ និងគ្រឿងផ្គត់ផ្គង់ជាង ១៣៧ តោន តាមរយៈយន្តហោះយោធា និងនាវាចម្បាំង។ ចិនក៏បានជួយសង្គ្រោះស្ត្រីម្នាក់ដែលជាប់គាំងក្នុងសណ្ឋាគារមួយនៅទីក្រុងម៉ាន់ដាឡេអស់រយៈពេល ៦០ ម៉ោង។ ទន្ទឹមនឹងនេះ ថៃបានបញ្ជូនទាហាន ៥៥ នាក់ទៅជួយនៅទីក្រុងយ៉ាំងហ្គូន ខណៈចក្រភពអង់គ្លេសបានប្រកាសផ្តល់ជំនួយ ១៣ លានដុល្លារសម្រាប់ការងារសង្គ្រោះ។

ទោះជាយ៉ាងណា ការខូចខាតហេដ្ឋារចនាសម្ព័ន្ធ ដូចជាផ្លូវថ្នល់ ស្ពាន និងអាកាសយានដ្ឋាន បានធ្វើឱ្យការដឹកជញ្ជូនជំនួយជួបការលំបាក។ នៅទីក្រុងណៃពិដោ (Naypyidaw) ប៉មត្រួតពិនិត្យនៃអាកាសយានដ្ឋានអន្តរជាតិបានដួលរលំ ដែលបង្ខំឱ្យជើងហោះហើរជំនួយចុះចតនៅទីក្រុងយ៉ាំងហ្គូនជំនួសវិញ។ មន្ទីរពេទ្យនៅតំបន់ភាគកណ្តាល និងភាគពាយ័ព្យ រួមទាំងម៉ាន់ដាឡេ និងណៃពិដោ កំពុងតស៊ូដោះស្រាយជាមួយនឹងចំនួនអ្នករបួសដ៏ច្រើន ប៉ុន្តែជួបបញ្ហាខ្វះខាតគ្រឿងផ្គត់ផ្គង់វេជ្ជសាស្ត្រ ដូចជាថ្នាំស្ពឹក ថង់ឈាម និងឧបករណ៍ជំនួយ។

អង្គការសហប្រជាជាតិ (UN) បានព្រមានថា ការខូចខាតផ្លូវធ្វើចរាចរណ៍កំពុងរារាំងដល់កិច្ចខិតខំប្រឹងប្រែងសង្គ្រោះ ហើយសហគមន៍ជាច្រើននៅតែពឹងផ្អែកលើការជួយខ្លួនឯងដោយប្រើដៃ និងឧបករណ៍សាមញ្ញដើម្បីជីករកអ្នកនៅរស់រានក្រោមគំនរបាក់បែក។ លោក មីន អោង ឡាំង (Min Aung Hlaing) មេដឹកនាំយោធាមីយ៉ាន់ម៉ា បានអំពាវនាវឱ្យមន្ទីរពេទ្យទាំងអស់ធ្វើការសហការគ្នាដើម្បីឆ្លើយតបនឹងវិបត្តិនេះ និងបានស្នើសុំជំនួយអន្តរជាតិជាករណីកម្រមួយ។

គ្រោះមហន្តរាយនេះកើតឡើងចំពេលដែលមីយ៉ាន់ម៉ាកំពុងប្រឈមនឹងជម្លោះស៊ីវិល ដែលធ្វើឱ្យការចែកចាយជំនួយកាន់តែមានភាពស្មុគស្មាញ។ អង្គការមនុស្សធម៌អន្តរជាតិបានបង្ហាញក្តីបារម្ភថា តម្រូវការជំនួយនឹងកើនឡើងខ្លាំងនៅប៉ុន្មានថ្ងៃខាងមុខ ខណៈរដូវភ្លៀងខិតជិតមកដល់។