គណៈកម្មការរៀបចំព្រឹត្តិការណ៍ បញ្ជាក់ថា ដោយមានការគាំទ្រពី សហភាពសហព័ន្ធយុវជនកម្ពុជា និងសហការរៀបចំដោយ សាលាទន្សាយ(RABBIT SCHOOL) ក្រុមការងារ Run with Sai នឹងរៀបចំព្រឹត្តិការណ៍ “រត់ដោយបេះដូង” លើកទី២ ឆ្នាំ២០២៥ “RUN BY HEART” 2025, 2ND EDITION” ។

ព្រឹត្តិការណ៍ “រត់ដោយបេះដូង” លើកទី២ ឆ្នាំ២០២៥ “RUN BY HEART” 2025, 2ND EDITION” គឺជាព្រឹត្តិការណ៍ រៀបចំរួមគ្នាដោយក្រុមការងារ Run With Sai និងសាលាទន្សាយ(RABBIT SCHOOL) គាំទ្រដោយសហភាពសហព័ន្ធយុវជនកម្ពុជា ឧបត្ថម្ភផ្ដាច់មុខដោយ ក្រុមហ៊ុនធានារ៉ាប់រង ដាយ អ៊ិឈិ ឡាយហ្វ៍ (Dai-ichi Life Cambodia) ជាក្រុមហ៊ុនធានារ៉ាប់រងអាយុជីវិតឈានមុខគេមួយរបស់ប្រទេសជប៉ុនដែលមានបទពិសោធន៍ជាង ១២២ឆ្នាំ ក្នុងការការពារហិរញ្ញវត្ថុជូនអតិថិជន។

ថវិកាទាំងអស់ទទួលបានពីការចុះឈ្មោះចូលរួមរត់ នឹងបរិច្ចាគទៅកាន់សាលាទន្សាយ ដែលជាសាលារៀនមួយ ទទួលការថែទាំ និងបង្ហាត់បង្រៀន ទៅដល់កុមារអូទីហ្សឹម(Autism) មានទីតាំងនៅរាជធានីភ្នំពេញ។

ព្រឹត្តិការណ៍ “រត់ដោយបេះដូង” លើកទី២ ឆ្នាំ២០២៥ “RUN BY HEART” 2025, 2ND EDITION” នឹងរៀបចំឡើងដោយ ធ្វើការបែងចែកជា ២ប្រភេទនៃកម្មវិធី ដែលមាន០៣វិញ្ញាសា ក្នុងនោះ កម្មវិធីរត់ពីចម្ងាយមាន ចំនួន ២វិញ្ញាសាគឺ វិញ្ញាសា ៦គីឡូម៉ែត្រ និង ២១គីឡូម៉េត្រ ដែលអ្នកចុះឈ្មោះអាចធ្វើការរត់នៅតាមទីតាំងដែលខ្លួនពេញចិត្តទៅតាមពេលវេលាកំណត់របស់គណៈកម្មការរៀបចំ ដោយប្រើប្រាស់កម្មវិធីទូរស័ព្ទដៃ វាស់នូវចំនួនគីឡូម៉ែត្រ និង ពេលវេលាដែលបានរត់ ហើយកត់ត្រាទុកជារបាយការណ៍ផ្ញើមកកាន់គណៈកម្មការរៀបចំដើម្បីទទួលមេដាយ។

ចំណែកទី២ គឺជាកម្មវិធីពិសេស មាន ០១វិញ្ញាសា មានឈ្មោះថា កម្មវិធីរត់ដោយបេះដូង-RUN BY HEART គឺជាប្រភេទកម្មវិធីរត់ពិសេស សម្រាប់ភ្ញៀវកិត្តិយសដែលទទួលបានការអញ្ជើញចូលរួម ដែលបានបរិច្ចាកចាប់ពី ២០០,០០០រៀល/៥០ដុល្លារ ឡើងទៅ នឹងត្រូវធ្វើការរត់ជាក្រុម ជាមួយកុមារអូទីហ្សឹម ក្នុងរយៈចម្ងាយ ៤០០ ម៉ែត្រ នៅក្នុងបរិវេណតម្រាយផ្លូវរត់ក្នុងតារាងបាល់ទាត់ នៃពហុកីឡដ្ឋានជាតិអូឡាំពិក។ ក្រុមដែលរត់ដល់ទីបានជោគជ័យ នឹងទទួលបានមេដាយអនុស្សាវរីយ៍ផលិតជាពិសេស សម្រាប់វិញ្ញាសានេះ។

តាមរយៈព្រឹត្តិការណ៍ “រត់ដោយបេះដូង” លើកទី២ ឆ្នាំ២០២៥ “RUN BY HEART” 2025, 2ND EDITION” នេះ គណៈកម្មការរៀបចំជឿជាក់ថាអ្នកចូលរួមនឹងទទួលបានការយល់ដឹងបន្ថែម ពីស្ថានភាព អូទីហ្សឹម ដែលកំពុងកើតមាននៅក្នុងព្រះរាជាណាចក្រកម្ពុជា ហើយនឹងបានស្វែងយល់ពីភាពលះបង់របស់អ្នកគ្រូ លោកគ្រូ ដែលបានតស៊ូព្យាយាម ក្នុងការថែទាំ និងបង្ហាត់បង្រៀន កុមារអូទីហ្សឹម ជាពិសេស ឳពុក ម្តាយ របស់កុមារអូទីហ្សឹមផ្ទាល់ ដែលជាកត្តាជម្រុញទឹកចិត្តទៅដល់មហាជន ឱ្យមានការគាំទ្រ ទៅកាន់អង្គការ សាលារៀន ស្ថាប័ននានា ដែលកំពុង បំពេញបេសកកម្ម ក្នុងការថែទាំ និងបង្ហាត់បង្រៀន ដល់កុមារអូទីហ្សឹម។

អាស្រ័យដូចបានជម្រាបជូនខាងលើ គណៈកម្មការរៀបចំ សូមគោរពជូន អស់លោក លោកស្រី អ្នកនាង កញ្ញា ជាអ្នកសារព័ត៌មាន ប្រព័ន្ធផ្សព្វផ្សាយទាំងអស់មេត្តាជ្រាបជាព័ត៌មាន និងចូលរួមផ្សព្វផ្សាយទៅកាន់សាធារណៈជនឱ្យបានទូលំទូលាយ ដើម្បីចូលរួមកម្មវិធី ដែលជាកិច្ចការមនុស្សធម៌មួយនេះឱ្យបានច្រើនកុះករ៕

សម្រាប់ព័ត៌មានបន្ថែម៖ កញ្ញា ឆាយ សុវណ្ណបញ្ញា / លោក ផុន ថាវីឌែន ០៩៨ ៥៣០ ១០៤ / ០៨១ ៨០០ ៩០០