រដ្ឋាភិបាលសហរដ្ឋអាមេរិក បានដាក់ចេញនូវបម្រាមមួយ ដែលហាមឃាត់បុគ្គលិករដ្ឋាភិបាលអាមេរិកដែលបម្រើការនៅក្នុងប្រទេសចិន មិនឱ្យមានទំនាក់ទំនងស្នេហា ឬ ទំនាក់ទំនងផ្លូវភេទជាមួយពលរដ្ឋចិន។ ព័ត៌មាននេះត្រូវបានរាយការណ៍ដោយទីភ្នាក់ងារព័ត៌មាន Associated Press (AP) ដោយផ្អែកលើប្រភពដែលស្និទ្ធនឹងបញ្ហានេះ។

បម្រាមនេះត្រូវបានអនុវត្តចំពោះបេសកជនអាមេរិកទាំងអស់ នៅក្នុងប្រទេសចិន រួមមានស្ថានទូតនៅទីក្រុងប៉េកាំង និងស្ថានកុងស៊ុលនៅទីក្រុងក្វាងចូវ សៀងហៃ ស៊ីនយ៉ាង និង វូហាន ព្រមទាំងស្ថានកុងស៊ុលអាមេរិកនៅ ហុងកុង ផងដែរ។

យោងតាមប្រភពព័ត៌មាន ការសម្រេចចិត្តនេះបានកើតឡើងបន្ទាប់ពីសមាជិកសភាអាមេរិកមួយចំនួនបានលើកឡើងនូវក្តីបារម្ភកាលពីរដូវក្តៅឆ្នាំមុនថា ការរឹតត្បិតពីមុនមានលក្ខណៈធូររលុងពេក។ ដើមឡើយ បុគ្គលិកអាមេរិកត្រូវបានហាមឃាត់តែពីទំនាក់ទំនងជាមួយពលរដ្ឋចិនដែលធ្វើការជាអ្នកយាម ឬបុគ្គលិកជំនួយនៅស្ថានទូត និងស្ថានកុងស៊ុលអាមេរិកប៉ុណ្ណោះ។ ប៉ុន្តែនៅខែមករា មុនពេលលោកប្រធានាធិបតី ដូណាល់ ត្រាំ ចូលកាន់តំណែង ឯកអគ្គរដ្ឋទូតដែលចប់អាណត្តិ លោក Burns បានពង្រីកបទបញ្ជានេះឱ្យគ្របដណ្តប់លើពលរដ្ឋចិនទាំងអស់នៅក្នុងប្រទេសចិន។

គោលនយោបាយនេះផ្តល់ករណីលើកលែងតែចំពោះបុគ្គលិកដែលមានទំនាក់ទំនងជាមួយពលរដ្ឋចិនមុនពេលបទបញ្ជាត្រូវបានអនុម័តប៉ុណ្ណោះ។ អ្នករិះគន់បានលើកឡើងថា វិធានការនេះអាចប៉ះពាល់ដល់ទំនាក់ទំនងការទូត និងសេរីភាពផ្ទាល់ខ្លួន ខណៈអ្នកគាំទ្រយល់ឃើញថា វាជាជំហានចាំបាច់ដើម្បីការពារបុគ្គលិកអាមេរិកពីហានិភ័យសន្តិសុខ។

បម្រាមនេះបានធ្វើឡើងចំពេលដែលទំនាក់ទំនងរវាងសហរដ្ឋអាមេរិក និងចិនកំពុងស្ថិតក្នុងភាពតានតឹង ជាពិសេសទាក់ទងនឹងបញ្ហាសន្តិសុខជាតិ និងការប្រកួតប្រជែងផ្នែកបច្ចេកវិទ្យា៕