ក្រុមហ៊ុនតាក់ស៊ី Xanh SM ដែលត្រូវបានបង្កើតឡើងដោយលោក Pham Nhat Vuong មហាសេដ្ឋីទី២នៅអាស៊ីអាគ្នេយ៍ បានបង្កើនដើមទុនរបស់ខ្លួនដល់ ៣៥,៥ទ្រីលានដុងវៀតណាម (ស្មើនឹង១,៣៥ពាន់លានដុល្លារអាមេរិក)។ ការបង្កើននេះត្រូវបានធ្វើឡើងកាលពីថ្ងៃទី៨ ខែមករា ឆ្នាំ២០២៦ ដោយកើនឡើង៤២ភាគរយ។

ក្រុមហ៊ុន Xanh SM ត្រូវបានបង្កើតឡើងក្នុងឆ្នាំ២០២៣ ដោយលោក Vuong ដែលជាប្រធានក្រុមហ៊ុន Vingroup ដែលជាក្រុមហ៊ុនឯកជនធំបំផុតនៅវៀតណាម។ ដើមទុនដំបូងគឺ៣ទ្រីលានដុង ដោយលោក Vuong រួមចំណែក៩៥ភាគរយដោយផ្ទាល់។ ដំបូងឡើយ អាជីវកម្មស្នូលផ្តោតលើសេវាកម្មតាក់ស៊ី និងការហៅឡាន ដោយប្រើប្រាស់តែរថយន្តផលិតដោយក្រុមហ៊ុន VinFast ដែលជាក្រុមហ៊ុនផលិតរថយន្តអគ្គិសនីឈានមុខគេនៅវៀតណាម និងក៏ត្រូវបានគ្រប់គ្រងដោយលោក Vuong ផងដែរ។

បន្ទាប់មក ក្រុមហ៊ុនបានពង្រីកទៅវិស័យផ្សេងទៀតដូចជា ការដឹកជញ្ជូនអាហារ កញ្ចប់ និងការជួលរថយន្ត។ បច្ចុប្បន្ន Xanh SM មានវត្តមាននៅក្នុងខេត្ត និងទីក្រុងចំនួន៣៤នៅវៀតណាម រួមទាំងប្រទេសឡាវ ឥណ្ឌូនេស៊ី និងហ្វីលីពីន។ ក្រុមហ៊ុនមានផែនការពង្រីកទៅកាន់ទីផ្សារថ្មី១០ទៀតនៅឆ្នាំនេះ។

យោងតាមរបាយការណ៍ពី Mordor Intelligence គិតត្រឹមខែមិថុនា ឆ្នាំ២០២៥ Xanh SM គឺជាក្រុមហ៊ុនឈានមុខគេនៅទីផ្សារតាក់ស៊ីវៀតណាម ដោយមានចំណែកទីផ្សារ៤៤,៦៨ភាគរយ លើសពីក្រុមហ៊ុន Grab របស់សិង្ហបុរីដែលមាន៣៦ភាគរយ។ Grab ក៏បានចូលទៅក្នុងទីផ្សារហៅឡានអគ្គិសនី ដែលពីមុនត្រូវបានគ្រប់គ្រងដោយ Xanh SM។

លោក Pham Nhat Vuong បានប្រើប្រាស់ភាគហ៊ុនជាង៥៣៥លាននៅក្នុងក្រុមហ៊ុន Vingroup ក្នុងរយៈពេល៣ឆ្នាំចុងក្រោយនេះ ដើម្បីផ្តល់មូលនិធិដល់អាជីវកម្មថ្មីៗនៅក្នុងវិស័យអចលនទ្រព្យ, App ហៅឡានតាក់ស៊ី, វិស័យថាមពល និងផ្លូវដែក។