យោងតាមការចុះផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី០៩ ខែកក្កដា ឆ្នាំ២០២៦ នេះ ក្រុមហ៊ុនផលិតរថយន្តយក្សរបស់អាល្លឺម៉ង់ Volkswagen កំពុងឈានចូលដល់ចំណុចរបត់ដ៏សំខាន់ និងតានតឹងបំផុតមួយ ក្នុងខណៈពេលដែលភាគហ៊ុននិកសំខាន់ៗ ថ្នាក់ដឹកនាំក្រុមហ៊ុន និងតំណាងសហជីពកម្មករ ត្រូវជួបប្រជុំគ្នាដើម្បីសម្រេចអំពីផែនការកែទម្រង់រចនាសម្ព័ន្ធដ៏ធំមួយ ដើម្បីស្រោចស្រង់អនាគតរបស់ក្រុមហ៊ុន។

កិច្ចប្រជុំកំពូល និងការប្រឈមមុខដាក់គ្នានេះ កើតឡើងចំពេលដែលក្រុមហ៊ុនរថយន្តយក្សមួយនេះកំពុងរងសម្ពាធយ៉ាងខ្លាំងពីការធ្លាក់ចុះនៃប្រាក់ចំណេញ ការប្រកួតប្រជែងយ៉ាងស្វិតស្វាញក្នុងទីផ្សាររថយន្តអគ្គិសនី (EV) ជាពិសេសពីសំណាក់ក្រុមហ៊ុនចិន និងបញ្ហាថ្លៃដើមផលិតកម្មខ្ពស់នៅក្នុងប្រទេសអាល្លឺម៉ង់។

របៀបវារៈចម្បងនៃកិច្ចប្រជុំនេះ គឺការពិភាក្សាលើវិធានការកាត់បន្ថយចំណាយយ៉ាងគំហុក ដែលអាចរួមបញ្ចូលទាំងផែនការមិនធ្លាប់មានពីមុនមកក្នុងប្រវត្តិសាស្ត្រក្រុមហ៊ុន នោះគឺការបិទរោងចក្រចំនួនបួននៅក្នុងប្រទេសអាល្លឺម៉ង់ និងការកាត់បន្ថយបុគ្គលិកប្រហែល១សែននាក់។ ផែនការនេះបាននិងកំពុងជួបប្រទះនឹងការប្រឆាំងយ៉ាងខ្លាំងក្លាពីសំណាក់សហជីពកម្មករដ៏មានឥទ្ធិពល និងក្រុមប្រឹក្សាការងាររបស់ក្រុមហ៊ុន (Work Council) ដែលប្តេជ្ញាការពារការងាររបស់កម្មករដាច់ខាត។

ក្រុមអ្នកវិភាគបានលើកឡើងថា លទ្ធផលនៃជំនួបនេះនឹងកំណត់វាសនា និងទិសដៅអនាគតរបស់ Volkswagen ថាតើក្រុមហ៊ុនរថយន្តយក្សដែលធ្លាប់តែរឹងមាំមួយនេះ អាចកែទម្រង់ខ្លួនឱ្យទាន់សភាពការណ៍ទីផ្សារទំនើប ឬត្រូវបន្តធ្លាក់ដុនដាបនៅក្នុងវិបត្តិដ៏រ៉ាំរ៉ៃនេះបន្តទៀត។

ស្ថានភាពបច្ចុប្បន្នរបស់ Volkswagen ក៏កំពុងត្រូវបានតាមដានយ៉ាងយកចិត្តទុកដាក់ពីសំណាក់រដ្ឋាភិបាលអាល្លឺម៉ង់ និងវិស័យឧស្សាហកម្មយានយន្តសកលផងដែរ ព្រោះវាអាចជារលកជះឥទ្ធិពល ដល់សេដ្ឋកិច្ចអឺរ៉ុបទាំងមូល៕

ប្រភព៖ Reuters