ត្រាយអាស៊ី ត្រៀមជើងបិទ ប្រាក់ មុន្នីឧត្តម វគ្គពាក់កណ្តាលផ្តាច់ព្រ័ត្រ Hun Sen Cup

2015-02-06 17:40:05
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូបង្វឹកវ័យក្មេងបណ្តោះអាសន្នក្លិបត្រាយអាស៊ីព្រួយបារម្ភពេលក្លិបរបស់លោកប៉ះម្ចាស់ផ្ទះស្វាយរៀងក្នុងពាក់កណ្តាលផ្តាច់ព្រ័ត្រនៃពានសម្តេច ហ៊ុន សែន នាថ្ងៃពុធ ទី១១ ខែកុម្ភៈនេះនៅខេត្តស្វាយរៀង។

លោក ឈូក ពិសិទ្ធ (ឆ្វេង) និងម្ចាស់ក្លិប (ស្តាំ)

លោក ឈូក ពិសិដ្ឋ គ្រូបណ្ដោះអាសន្នរបស់ ត្រាយអាស៊ី បាននិយាយថា វគ្គពាក់កណ្តាលផ្តាច់ព្រ័ត្រនេះ ក្រុមរបស់លោកកំពុងព្យាយាមហ្វឹកហាត់យ៉ាងម៉ត់ចត់ និងរកវិធីសាស្ត្រការពារផ្នែកប្រយុទ្ធដ៏មុតស្រួចរបស់ស្វាយរៀង។ លោកបន្តថា ៖«អ្វីគួរឲ្យបារម្ភនោះគឺស្វាយរៀងលេងយល់ចិត្តគ្នា ហើយលឿន ជាពិសេសខ្សែប្រយុទ្ធពោរពេញដោយកម្លាំងដ៏គ្រោះថ្នាក់»។

ពិសិដ្ឋ និយាយទៀតថា កីឡាកររបស់ស្វាយរៀងអាចលេងយល់ចិត្តគ្នាបានយ៉ាងល្អ ដោយសារពួកគេហាត់និងលេងជាមួយគ្នាតាំងពីយុវជន។ កីឡាករខ្សែប្រយុទ្ធមួយរូបដែលគួរឲ្យចាប់អារម្មណ៍ និងគ្រោះថ្នាក់បំផុតនោះគឺ ប្រាក់ មុន្នីឧត្ដម ដែលតែងតែរកគ្រាប់បាល់បាន និងជាកីឡាករវ័យក្មេងកំពុងឡើងជើង។ ដូច្នេះក្រុមរបស់លោកត្រូវប្រុងប្រយ័ត្នចំពោះកីឡាកររូបនេះជានិច្ច។

ទោះជាយ៉ាងណា គ្រូបង្វឹកបណ្តោះអាសន្នដែលបានជួយឲ្យត្រាយអាស៊ីឡើងដល់វគ្គពាក់កណ្តាលផ្តាច់ព្រ័ត្រនេះនៅតែសង្ឃឹមខ្ពស់ដោយផ្អែកលើការសន្និដ្ឋាន និងសិក្សាស្វែងយល់ពីគូប្រកួតរបស់លោក។

ត្រាយអាស៊ីកំពុងហ្វឹកហាត់

លោកបាននិយាយថា ៖«កីឡាកររបស់ខ្ញុំល្អៗច្រើន ដូចជា សុខ ចាន់រស្មី សួង វិរៈ, តាំង សុភ័ក្ដ លេងជាខ្សែប្រយុទ្ធ និងប្រយុទ្ធស្លាប ហើយមួយទៀត គូច ដានី លេងជាខ្សែបម្រើស្លាប»។ រហូតដល់ពេលនេះសមាជិកក្រុមរបស់លោកគ្មានបញ្ហាអ្វី ឬអវត្តមាននរណាម្នាក់ឡើយ។

ស្របពេលដែលគូប្រកួតជាម្ចាស់ផ្ទះ និងមានអ្នកគាំទ្រច្រើន ប៉ុន្តែលោក ឈូក ពិសិទ្ធបានបញ្ជាក់ថា ក្រុមរបស់លោកមិនគិតរឿងអ្នកគាំទ្រច្រើនឬតិចនោះទេ ហើយក៏មិនតក់ស្លុតនៅលើទឹកដីរបស់គេដែរ។

មុនឈានវគ្គពាក់កណ្តាលផ្តាច់ព្រ័ត្រនេះ ត្រាយអាស៊ីបានយកឈ្នះ អាល់ប៊ីរ៉ីចនីហ្គាតាភ្នំពេញក្នុងលទ្ធផល ២-០៕ វីដេអូ៖ ត្រាយអាស៊ីហ្វឹកហាត់ http://youtu.be/0TVKcdPmP3M អត្ថបទ៖ ស្រី សុវណ្ណដារ៉ា