ម្ចាស់ក្លិបត្រាយអាស៊ីថ្មី ចំណាយ២៨ម៉ឺនដុល្លារមួយឆ្នាំ ក្នុងពេល៣ឆ្នាំឈ្នះជើងលីកកម្ពុជាឲ្យបាន

2015-02-16 16:13:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ក្លិបថ្មីរបស់ត្រាយអាស៊ីភ្នំពេញក្រុមហ៊ុន Forward គ្រោងចំណាយថវិកាយ៉ាងហោចណាស់២៨ម៉ឺនដុល្លារអាមេរិកក្នុងមួយឆ្នាំ និងគ្រោងចំណាយពេល៣ឆ្នាំដើម្បីយកជើងឯកលីកបាល់ទាត់កំពូលកម្ពុជាឲ្យបាន បន្ទាប់ពីក្រុមហ៊ុនម្ចាស់ក្លិបចាស់ជួបវិបត្តិហិរញ្ញវត្ថុ ហើយលក់ឲ្យអ្នកផ្សេងក្រោយពាន Hun Sen Cup ឆ្នាំ២០១៥នេះចប់។

លោក Akihiro Kato ប្រធានក្រុមហ៊ុន Forward បានផ្ដល់បទសម្ភាសន៍ពិសេសមួយដល់ Sabay កាលពីពេលថ្មីៗនេះថា ក្រុមហ៊ុនរបស់លោកបានសម្រេចទិញយកក្លិបត្រាយអាស៊ីភ្នំពេញមកគ្រប់គ្រង បន្ទាប់ពីចប់ពានសម្តេច ហ៊ុន សែន។ ក្រុមហ៊ុនរបស់លោកធ្វើអាជីវកម្មផ្សេងនៅប្រទេសជប៉ុន ហើយនៅកម្ពុជាមិនមែនផ្តោតលើសេវាកម្មបាល់ទាត់ទេ ប៉ុន្តែដោយសារលោកចង់ជួយដល់វិស័យបាល់ទាត់កម្ពុជាទើបលោកសម្រេចយកក្លិបត្រាយអាស៊ី។

លោកប្រធានក្រុមហ៊ុនបានរំលឹកថា កាលពីជាង១៥ឆ្នាំមុន លោកបានមកប្រទេសកម្ពុជាម្តងក្នុងគោលបំណងដើរកម្សាន្តប៉ុណ្ណោះ។ ពេលនោះលោកបានដើរកម្សាន្តនៅភ្នំពេញ ខេត្តសៀមរាប និងបាត់ដំបង។ លោកថា ៖«ពេលខ្ញុំទៅដល់បាត់ដំបង ខ្ញុំបានជួបក្មេងប្រុសម្នាក់ ហើយខ្ញុំលេងជាមួយគេ។ ខ្ញុំសួរគេថា ផ្ទះនៅណា? ក្មេងនោះប្រាប់ថា គេអត់មានផ្ទះនៅទេ គេរស់នៅតាមចិញ្ចើមថ្នល់។ ខ្ញុំខ្លោចចិត្តយ៉ាងខ្លាំង រកអីនិយាយមិនចេញទេ... ខ្ញុំសួរគេថា ប្អូនចង់បានអី គេប្រាប់ថា គេចង់បានបាល់»។

ភាសារបស់ក្មេងប្រុសខាងលើបានដិតជាប់ក្នុងខួរក្បាលរបស់លោកជានិច្ច ហើយតែងតែគិតថា ថ្ងៃណាមួយមានឱកាស លោកនឹងមកធ្វើសកម្មភាពបាល់ទាត់នៅកម្ពុជា និងអាចផ្តល់បាល់ឲ្យក្មេងកម្ពុជាបានលេងកម្សាន្ត។ ដូច្នេះហើយទើបបានជាលោកសម្រេចទិញយកក្លិបត្រាយអាស៊ីភ្នំពេញនៅពេលនេះ។

ពាក់ព័ន្ធនឹងតម្លៃនៃការទិញយកក្លិបត្រាយអាស៊ី លោក Akihiro Kato មិនបានបញ្ជាក់ឲ្យដឹងនោះទេ ប៉ុន្តែលោកបានបង្ហើបឲ្យដឹងពីគម្រោងសម្រាប់រយៈពេល៣ឆ្នាំចាប់ពីឆ្នាំ២០១៥ដល់២០១៧។ លោកបាននិយាយថា ៖«សម្រាប់រយៈពេល៣ឆ្នាំគឺពីឆ្នាំ២០១៥នេះ ខ្ញុំគ្រោងចំណាយប្រាក់ប្រហែលជា២៨ម៉ឺនដុល្លារអាមេរិកក្នុងមួយឆ្នាំ។ គោលដៅសំខាន់របស់ខ្ញុំមានពីរគឺទីមួយត្រូវយកពានរង្វាន់បាល់ទាត់លីកកំពូលកម្ពុជាឲ្យបានក្នុងរយៈពេល៣ឆ្នាំខាងមុខ ហើយទីពីរ ធ្វើសកម្មភាពនានាដើម្បីផ្តល់ឱកាសដល់ក្មេងកម្ពុជាបានលេងបាល់គ្រប់បណ្ដាខេត្តក្រុង»។

ទោះបីជាយ៉ាងណាថវិការបស់លោកមិនមែនមកពីក្រុមហ៊ុនទាំងស្រុងនោះទេគឺបានមកពីប្រជាជនជប៉ុនមួយចំនួនដែលនាំគ្នាបរិច្ចាគដើម្បីទិញយកក្លិបត្រាយអាស៊ីភ្នំពេញនេះ។ លោកបញ្ជាក់ថា ៖«ខ្ញុំបានដើរប្រមូលថវិកាពីប្រជាជនជប៉ុនពីនេះបន្តិច ពីនោះបន្តិចដើម្បីយកមកធ្វើសកម្មភាពបាល់ទាត់នៅស្រុកខ្មែរនេះ។ ខ្ញុំនឹងព្យាយាមរកប្រាក់បន្ថែមទៀតដើម្បីយកមកធ្វើសកម្មភាពឲ្យបានច្រើននៅកម្ពុជា ជាពិសេសខ្ញុំនឹងរៀបចំគម្រោងមួយតាមបណ្ដាខេត្តដើម្បីចែកបាល់ដល់ក្មេងកម្ពុជា»។

ចំពោះកីឡដ្ឋានផ្ទាល់ខ្លួនសម្រាប់រៀបចំការប្រកួតក្នុងដី និងក្រៅដីវិញ ក្លិបរបស់លោកមិនទាន់បានគិតគូរនៅឡើយទេ ប៉ុន្តែនៅពេលខាងមុខលោកនឹងព្យាយាមធ្វើយ៉ាងណាឲ្យមានទីលានផ្ទាល់ខ្លួន ពីព្រោះទីលានជាកន្លែងដ៏សំខាន់សម្រាប់ស្វែងរកប្រាក់ចំណូល ខណៈពេលនេះក្លិបរបស់លោកគ្មានអ្វីសម្រាប់រកប្រាក់ចំណូលបន្តិចឡើយ។

ទន្ទឹមជាមួួយនេះ លោកគ្រោងដូរឈ្មោះក្លិបថ្មី ប៉ុន្តែមិនទាន់សម្រេចជាផ្លូវការនៅឡើយទេដោយស្ថិតនៅក្នុងការពិភាក្សា។

ក្លិបត្រាយអាស៊ីដែលដឹកនាំដោយម្ចាស់ក្លិបលោក Kenji Yoshida បានចាប់កំណើតនៅលើទឹកដីប្រទេសកម្ពុជាបានរយៈពេល៣ឆ្នាំហើយគិតត្រឹមឆ្នាំ២០១៥នេះ។ កាលពីឆ្នាំ២០១៣ក្លិបមួយនេះបានក្លាយជាជើងឯកសម្រាប់បាល់ទាត់ក្របខណ្ឌក១របស់កម្ពុជា ហើយក៏បានចូលលេងនៅលីកកំពូលកម្ពុជាកាលពីឆ្នាំ២០១៤ដោយបញ្ចប់ទៅក្នុងចំណាត់លេខ៥។ សម្រាប់ដើមឆ្នាំ២០១៥នេះត្រាយអាស៊ីទទួលបានចំណាត់ថ្នាក់លេខ៣នៃពានសម្តេច ហ៊ុន សែន មុនពេលធ្លាក់ទៅលើដៃម្ចាស់ក្លិបថ្មី៕