អតីតជយលាភីប្រជាប្រិយ Miss Grand International ចាប់ផ្ដើមកម្រើកទីផ្សារហើយ!

2015-02-17 17:39:56
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបាននាំកិត្តិយសជូនជាតិកាលពីចុងឆ្នាំ ២០១៤ តាមរយៈឈ្នះជយលាភីប្រជាប្រិយក្នុងកម្មវិធី Miss Grand International នៅប្រទេសថៃ ឥឡូវកញ្ញា នូ ទឹមស្រីនៀត ចាប់ផ្ដើមកម្រើកទីផ្សារហើយ។ នេះបើតាម លោក មែ វិចិត្របុត្រ អ្នកគ្រប់គ្រងក្រុម Freshie Girls & Boys បានប្រកាសក្នុងសន្និសីទសារព័ត៌មានម្សិលមិញ ឆ្លុះបង្ហាញពីឱកាសការងារ ក្រោយជាប់ជយលាភីរបស់កម្មវិធី។

"ក្រោយជាប់ បេក្ខជន បេក្ខនារីនឹងមានឱកាសទៅប្រកួតដកស្រង់បទពិសោធន៍នៅបរទេសទៀត ដូច ស្រីនៀត ដែលឈ្នះជយលាភីលេខ១ក្នុងកម្មវិធី Khmer Super Model គាត់បានទៅប្រកួតកម្មវិធី Miss Grand International នៅប្រទេសថៃ និងឈ្នះជយលាភីជាតារាដែលមានគេចូលចិត្តច្រើន។ ឥឡូវគាត់ត្រៀមថតស្ប៉តពាណិជ្ជកម្មទៀត"។

ទឹកមុខញញឹមញញែម នូ ទឹមស្រីនៀត ដែលចូលរួមជាកិត្តិយសកម្មវិធីម្សិលមិញ បានថ្លែងប្រាប់ Sabay ថា នេះជាការងារសិល្បៈទី១ ដែលនាងទទួលបានក្រោយត្រឡប់ពីកម្មវិធី Miss Grand International វិញ ហើយនោះជាស្ប៉តពាណិជ្ជកម្មរបស់ក្រុមហ៊ុន Honda។ "ជាការងារទី១ និយាយទៅមានអារម្មណ៍ថាសប្បាយចិត្តដែរបង ម្យ៉ាងបានក្រុមហ៊ុនធំទៀត"។

ផលិតផល Honda ដែល ស្រីនៀត ត្រៀមបង្ហាញខ្លួននេះ គឺម៉ូតូ Honda Click 2015។ យ៉ាងណាក៏ដោយ គិតត្រឹមម្សិលមិញនេះ មិនទាន់មានកាលបរិច្ឆេទច្បាស់លាស់ទេថា ស្ប៉តពាណិជ្ជកម្មមួយនេះ នឹងចាប់ផ្ដើមថតពេលណា។ "ខ្ញុំអត់ដឹងច្បាស់ទេបង ថាថតថ្ងៃណា ចប់ថ្ងៃណា ទាល់តែថ្ងៃស្អែក(ថ្ងៃនេះ) ខ្ញុំទៅជួបគេ បានដឹង ថាត្រូវចេញថតថ្ងៃណាអីថ្ងៃណា!”។

កញ្ញា នូ ទឹមស្រីនៀត ពេលបង្ហាញខ្លួនក្នុងសន្និសីទ Freshie Girls & Boys ម្សិលមិញ

បើទោះទើបព្រមព្រៀងគ្នាចំពោះស្ប៉តពាណិជ្ជកម្មខាងលើនេះមួយ ប៉ុន្តែតារាម៉ូដែលវ័យ ១៨ឆ្នាំរូបនេះ ប្រាប់ថា កន្លងមកនេះ ក៏មានក្រុមហ៊ុនជាច្រើនដែរបានទាក់ទង គ្រាន់តែមិនបានឈានដល់ចំណុចឯកភាពគ្នាប៉ុណ្ណោះ។

កញ្ញា នូ ទឹមស្រីនៀត អតីតបេក្ខភាពលេខ១ក្នុងកម្មវិធី Khmer Super Model ផ្នែកនារី ដែលរៀបចំដោយ BKA Entertainment។ កញ្ញា ត្រូវបានបញ្ជូនទៅប្រកួតក្នុងកម្មវិធី Miss Grand International នៅប្រទេសថៃ។ ជាលទ្ធផល កញ្ញា បានជាប់ជយលាភីផ្នែកប្រជាប្រិយ ដោយទទួលបានការបោះឆ្នោតគាំទ្រច្រើនលើសលុបពីប្រិយមិត្តទូទាំងពិភពលោក។ កញ្ញា បានឈ្នះលើបេក្ខភាព មកពីច្រើនប្រទេសទូទាំងពិភពលោក មានទាំងអាស៊ី អឺរ៉ុប អាហ្រិក និងអាមេរិកខាងត្បូងជាងដើម៕

អត្ថបទ៖ អស្ចារ្យ…ស្រីស្អាតកម្ពុជាទៅប្រកួតសម្រស់ជាមួយពិភពលោកក្នុងកម្មវិធី Miss Grand International

អត្ថបទ៖ ជយោ…! ទីបំផុត ស្រីនៀត យុវនារីរបស់កម្ពុជាលើកពានហើយ(វីដេអូ)

អត្ថបទ៖ ទារិកា