គួច ដានី ទៅធ្វើតេស្ដលេងហ៊្វូតសាល នៅលីកអាជីពជប៉ុន

2015-02-23 16:13:03
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករកូនខ្មែរ-បារាំង គួច ដានី របស់ក្រុមត្រាយអាស៊ី បានធ្វើដំណើរទៅកាន់ទីក្រុងតូក្យូកាលពីសប្ដាហ៍មុនដើម្បីធ្វើតេស្ដសមត្ថភាពជាមួយក្រុមបាល់ទាត់ហ៊្វូតសាលដែលជាសមាជិកលីកអាជីពជប៉ុន ក្រោយកិច្ចសន្យារបស់ខ្លួនជាមួយក្លិបនឹងត្រូវផុតកំណត់ចុងខែ កុម្ភៈ នេះ។

គួច ដានី (ក្រហម) បង្ហាញខ្លួនចុងក្រោយឱ្យក្រុមត្រាយអាស៊ីក្នុងវគ្គដណ្ដើមលេខ ៣ ពាន Hun Sen Cup 2015

ប្រាប់ Sabay តាមរយៈបណ្ដាញសង្គម ហ្វេសប៊ុក គួច ដានី ឆ្លើយថារូបគេបានធ្វើដំណើរទៅជប៉ុន តាំងពីថ្ងៃសុក្រ សប្ដាហ៍មុនមកម៉្លេះ ខណៈក្លិបត្រាយអាស៊ី ទើបតែជូនដំណឹងដល់អ្នកគាំទ្រនៅថ្ងៃសៅរ៍ ពោលគឺក្រោយមួយថ្ងៃ។ សាមីខ្លួនសុំមិនឆ្លើយចំពោះដំណើរទៅកាន់ទឹកដីប្រទេសជើងខ្លាំងបាល់ទាត់ប្រចាំទ្វីបអាស៊ី មួយនេះទេដោយទុកសិទ្ធិឱ្យ អ្នកចាត់ការទូទៅក្រុមត្រាយអាស៊ី ជាអ្នកឆ្លើយជំនួស។

លោក Kenji Yoshida អ្នកចាត់ការទូទៅរបស់ក្រុមត្រាយអាស៊ី បានប្រាប់ថា គួច ដានី ពិតជាទៅប្រទេសជប៉ុន ដើម្បីធ្វើតេស្ដសមត្ថភាពលេងហ៊្វូតសាលមែន ជាមួយក្លិបល្បីៗ ដូចជា Bardral Urayasu, Fugador Sumida ជាដើម។

លោកថាសមត្ថភាពរបស់ ដានី នៅត្រូវការកែប្រែបន្ថែមទៀតជាច្រើន ដើម្បីអាចចាប់អាជីពនៅជប៉ុនបាន ប៉ុន្ដែលោកជឿជាក់លើបច្ចេកទេស និង ឆន្ទៈរបស់កីឡាករខ្មែរ-បារាំងរូបនេះអាចនឹងធ្វើឱ្យជោគជ័យបាននៅទីនោះ។

គួច ដានី ជាកីឡាករខ្មែរម្នាក់ក្នុងចំណោម ៣ នាក់មកពីស្រុកបារាំង ដែលបានធ្វើដំណើរមកប្រកបរបបជាកីឡាករបាល់ទាត់នៅកម្ពុជា ដំណាលគ្នានៅឆ្នាំ ២០១២ ក្រោមការបណ្ដុះបណ្ដាលពីលោក ប៉ែន ផាត អតីតសមាជិកជម្រើសជាតិកម្ពុជា អំឡុងទសវត្សទី ៦០ ដោយក្នុងនោះមាន ធារី ចន្ថាប៊ីន និង កុក បូរីស នៅក្លិបភ្នំពេញក្រោន រួមទាំងកីឡាករ ប៉ែន ស្ទេហ្វេន អតីតកីឡាករណាហ្គាខប (ត្រឡប់ទៅបារាំងវិញ)។

កីឡាកររូបនេះចេះលេងបាល់ទាត់ដំបូងចេញពីប្រភពបាល់ទាត់ហ្វូតសាល រហូតអាចឱ្យរូបគេជាប់ក្នុងឈុតក្រុមជម្រើសជាតិហ៊្វូតសាលរបស់បារាំងអាយុក្រោម២១ឆ្នាំ (U-21) ថែមទៀតផង មុនធ្វើដំណើរមកកាន់ប្រទេសកម្ពុជា។

តើដានី អាចក្លាយជាកីឡាករខ្មែរដំបូងអាចប្រកបអាជីពនៅលើទឹកដីប្រទេសជប៉ុនបានដែរឬទេ?

អត្ថបទ៖ ម៉ឺន រស្មី