១២ ក្រុមត្រៀមចូលប្រកួតលីកបាល់បោះរដូវកាល ២០១៥

2015-03-06 18:30:14
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហ៊ោចណាស់មានក្រុមបាល់បោះលក្ខណៈអាជីពចំនួន ១២ ក្រុមត្រៀមខ្លួនបង្ហាញសមត្ថភាពនៅក្នុងលីកបាល់បោះកម្ពុជា ឆ្នាំទី៣ Angkor Beer Basketball League 2015 ដែលគ្រោងចាប់ផ្ដើមនៅចុងខែមីនា នេះ ឆ្នាំ ២០១៥ នេះ។

សកម្មភាពប្រកួតបាល់បោះនៅលីកកម្ពុជា រដូវកាលមុន

នៅក្នុងសន្និសីទសារព័ត៌មានព្រឹកមិញថ្ងៃទី ៦ ខែ មីនា នេះ លោក អ៊ុង ខែននិត អគ្គលេខាធិការសហព័ន្ធកីឡាបាល់បោះបានស្វាគមន៍ក្រុមទាំងអស់ដែលបានធ្វើជាផ្នែកមួយជួយជម្រុះបាល់បោះជាតិឱ្យរីកចំរើន។

ដំណាលគ្នានេះឯកឧត្ដម អ៊ុក សិទ្ធិជាតិ អគ្គនាយកនាយកដ្ឋានកីឡានៃក្រសួងអប់រំយុវជននិងកីឡា លើកឡើងថា ការប្រកួតនេះជាការកម្ដៅសាច់ដុំសម្រាប់ក្រុមបាល់បោះជម្រើសជាតិកម្ពុជា ដើម្បីត្រៀមទៅចូលរួមប្រកួតក្នុងព្រឹត្តិការណ៍កីឡាស៊ីហ្គេមឆ្នាំ ២០១៥ ខាងមុខ។

លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា រំពឹងថាប្រសិនការរៀបចំនៅឆ្នាំនេះជោគជ័យ នោះកម្ពុជា អាចនឹងបង្កើតលីកបាល់បោះ សម្រាប់ឈុតយុវជនវិញម្ដង (ក្រោមអាយុ ១៨ ឆ្នាំ)។

គណៈកម្មការរៀបចំការប្រកួតបានកំណត់ថាក្រុមនីមួយអាចសុំធ្វើការចុះឈ្មោះកីឡាករបានចំនួន ១៦ នាក់ ហើយនៅគ្រប់ពេលប្រកួតត្រូវបំពេញឈ្មោះកីឡាករ ក្នុងបញ្ជីរាយនាមចំនួន ១២ នាក់ផ្ដល់ឲ្យគណៈកម្មការប្រកួត សម្រាប់ក្រុមកីឡាបាល់បោះបរទេសត្រូវមានកីឡាករកម្ពុជាយ៉ាងតិច ០៣ នាក់ហើយម្នាក់ត្រូវលេងនៅលើទីលានប្រកួតគ្រប់វគ្គទាំងអស់។

សហព័ន្ធត្រៀមប្រាក់រង្វាន់ចំនួន ៣០០០$ ពាន ១ និងមេដៃមាស ១៥ គ្រឿង ដល់ក្រុមដែលដណ្ដើមបានជើងឯកនៅរដូវកាលថ្មីនេះ។ ចំពោះក្រុមចំណាត់ថ្នាក់លេខ ២ បានទឹកប្រាក់ ២០០០$ មេដៃប្រាក់ ១៥ គ្រឿង និងក្រុមចំណាត់ថ្នាក់លេខ ៣ ត្រូវទទួលបានប្រាក់ ១០០០$ និងមេដៃសំរឹទ្ធ១៥ គ្រឿង។

ការប្រកួតចាប់ពីថ្ងៃទី ២១ ខែ មីនា ដល់ ២៦ ខែ កញ្ញា ឆ្នាំ ២០១៥ នៅពហុកីឡដ្ឋានជាតិ រៀងរាល់ចុងសប្ដាហ៍ ព្រមទាំងបើកឱ្យចូលទស្សនាដោយសេរី៕

អត្ថបទ៖ ម៉ឺន រស្មី