ក្លិប ត្រាយអាស៊ី ដូរឈ្មោះជា Cambodian Tiger FC

2015-03-24 13:08:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបបាល់ទាត់ត្រាយអាស៊ីភ្នំពេញបានសម្រេចដូរឈ្មោះជាផ្លូវការថា «Cambodian Tiger Football Club»ហើយ បន្ទាប់ពីទទួលបានម្ចាស់គ្រប់គ្រងថ្មី និងក្រោយពេលចូលលេងនៅលីកបាល់ទាត់កំពូលកម្ពុជាបានមួយរដូវកាល។

លោក Akihiro Kato ប្រធានក្រុមហ៊ុន Forward និងជាម្ចាស់ក្លិបថ្មីរបស់ត្រាយអាស៊ីបានផ្ដល់បទសម្ភាសន៍ដល់ Sabay ថា ក្លិបត្រាយអាស៊ីភ្នំពេញបានសម្រេចដូរឈ្មោះជា Cambodian Tiger FC ហើយបន្ទប់ពីលោកបានចូលមកដឹកនាំក្រោយពានរង្វាន់សម្តេច ហ៊ុន សែន ចប់កាលពីពេលនេះថ្មីៗនេះ។

លោកពន្យល់ថា ៖«ខ្លាជាសត្វមានអំណាចដែលមានកម្លាំងខ្លាំង ហើយសត្វដទៃខ្លាចសត្វខ្លា អីចឹងយើងចង់ឲ្យក្លិបរបស់យើងខ្លាំងដូចខ្លាដែរ។ គោលដៅរបស់យើងគឺចង់ឲ្យក្លិបរបស់យើងឈានមុខគេ និងជាប់លេខ១នៅអាស៊ី។ នៅលើឡូហ្គោ យើងបានបង្ហាញពីទង់ជាតិខ្មែរ និងបង្ហាញពីភាពស្មោះត្រង់ ស្លូតបូតរបស់ប្រជាជនខ្មែរ»។

លោកបានបន្ថែមថា ក្លិបរបស់លោកនឹងមិនដូចក្លិប Albirex Niigata ភ្នំពេញដែលបានដកខ្លួនចេញពីលីកបាល់ទាត់កំពូលកម្ពុជាឡើយ។ Albirex Niigata ភ្នំពេញបានដកខ្លួនចេញពីលីកបាល់ទាត់កម្ពុជាដោយសារក្លិបមួយនេះមានវិបត្តិហិរញ្ញវត្ថុ ប៉ុន្តែក្លិបរបស់លោកមានប្រាក់គ្រប់គ្រាន់សម្រាប់ទ្រទ្រង់បានយូរអង្វែង។ លោកបាននិយាយថា ៖«កីឡាករទាំងអស់នៅក្លិប Cambodian Tiger FC កុំបារម្ភ ក្លិបយើងគ្មានបញ្ហាអ្វីឡើយ ហើយពេលនេះយើងទទួលបានក្រុមហ៊ុនឧបត្ថម្ភមកពីជប៉ុនមួយទៀតហើយ»។

លោក Akihiro Kato ធ្លាប់បានប្រាប់ Sabay ថា សម្រាប់រយៈពេល៣ឆ្នាំគឺពីឆ្នាំ២០១៥ដល់ឆ្នាំ២០១៧ ក្លិបរបស់លោកគ្រោងចំណាយប្រាក់ប្រហែលជា២៨ម៉ឺនដុល្លារអាមេរិកក្នុងមួយឆ្នាំ។ គោលដៅសំខាន់របស់លោកមានពីរគឺទីមួយត្រូវយកពានរង្វាន់បាល់ទាត់លីកកំពូលកម្ពុជាឲ្យបានក្នុងរយៈពេល៣ឆ្នាំខាងមុខ និងទីពីរធ្វើសកម្មភាពនានាដើម្បីផ្តល់ឱកាសដល់ក្មេងកម្ពុជាបានលេងបាល់ គ្រប់បណ្ដាខេត្តក្រុង៕

អត្ថបទ៖ ជាន ចាន់រ៉ា