ចាន់ ពិចិត្រ កំពូលនិទ្ទេស A ឆ្នាំមុនចែករំលែកបទពិសោធន៍រៀនសម្រាប់អ្នកត្រៀមបាក់ឌុប

2015-04-09 19:02:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់ផ្ដើមបន្តឹងការប្រលងបាក់ឌុបឆ្នាំដំបូងឆ្នាំមុន គឺមានតែបេក្ខជន ២៥,៧២% ប៉ុណ្ណោះ ចំណោមសិស្សប្រលងសរុប ៨៩៩៣៧ នាក់ ដែលរួចផុតពីធ្លាក់ក្នុងការប្រលងលើកទី១។ ឆ្នាំនេះវិញសិស្សានុសិស្សខ្លះកាន់តែខ្វល់ ព្រោះក្រសួងបានប្រកាសថានឹងពុំផ្ដល់ឱកាសឲ្យមានការប្រលងលើកទី២ដូចឆ្នាំមុនឡើយ អីចឹងហើយតាមរយៈ Sabay អតីតសិស្សនិទ្ទេសA លេខលំដាប់ពិន្ទុកំពូលគេកាលឆ្នាំមុន (១០០,០០) ចាន់ ពិចិត្រ បានចូលខ្លួនមកចែករំលែកបទពិសោធន៍រៀនខ្លះៗ សម្រាប់អ្នកត្រៀមបាក់ឌុប។

ចែកពេលអនុវត្តមេរៀន

អតីតសិស្សវិទ្យាល័យព្រះបាទព្រះសុរាម្រិត ក្រុងកំពង់ឆ្នាំង ចាន់ ពិចិត្រ ថាការបែកចែកពេលវេលាអនុវត្តនិងទន្ទេញមេរៀននៅផ្ទះ ជារឿងសំខាន់។ ពិចិត្រ តែងចំណាយពេលជាង១ម៉ោងពេលទៀបភ្លឺដើម្បីទន្ទេញ និងរំលឹកមេរៀន។ ពិចិត្រថា នៅពេលព្រឹកខួក្បាលស្រលះល្អ អាចចងចាំបានច្រើនជាងពេលណាទាំងអស់។

ឯពេលយប់វិញក្រោយញ៉ាំបាយ និងសម្រាក យុវជនវ័យ១៨ឆ្នាំ ចំណាយពេលរាប់ម៉ោងដើម្បីស្រាវជ្រាវ និងអនុវត្តលំហាត់នានា។ «យើងរៀនពេញមួយថ្ងៃហើយ អីចឹងបើទន្ទេញមេរៀនគឺមិនចាំឡើយ ដូច្នេះការធ្វើលំហាត់គឺល្អបំផុត វាមិនចាំបាច់ផ្ដោតយកចាំ»។

ទប់ទល់ស្ត្រេស្ត

ជាសិស្សលេចធ្លោម្នាក់ ពិចិត្រដែលបច្ចុប្បន្នកំពុងរៀនថ្នាក់មូលដ្ឋានត្រៀមចូលសាកលវិទ្យាល័យវិទ្យាសាស្ត្រសុខាភិបាល ថាពុំសូវជួបស្ត្រេសខ្លាំងទេកាលនៅទី១២ ទោះដឹងថានឹងប្រឈមការប្រលងគ្មានការបើកចាក់ ដែលសិស្សរាប់ម៉ឺននាក់ទូទាំងប្រទេសភ័យបុកពោះ។ យុវជនមុខកូនកាត់ចិនរៀបរាប់ថា៖ «ម្ដងម្កាលតិចតួចទេបង បើថាស្ត្រេស្ត ខ្ញុំចេញក្រៅញ៉ាំអី ជជែកជាមួយពួកម៉ាក ស្ដាប់ភ្លេង គឺធ្វើនេះធ្វើនោះមិនរៀនទេ ព្រោះស្ត្រេស្តរៀនម៉េចក៏មិនចូល កុំចង់ឈ្នះកុំគិតតែពីរៀន»។

កុំទុកចោលនូវមេរៀនដែលមិនយល់

មិនថាម៉ោងគួរ ឬម៉ោងរដ្ឋទេ ពិចិត្រ ត្រូវចេះច្បិចយកនូវអ្វីដែលជាចំណុចខ្លឹមៗ កុំព្យាយាមចងចាំប៉ាតណាប៉ាតណី។ ការរៀនមុខវិជ្ជាវិទ្យាសាស្ត្រដាច់ខាតត្រូវចេះចាំនិងយល់ឲ្យច្បាស់ នូវធាតុស្នូលរួមមាន រូបមន្ត ការស្រង់សម្មតិកម្ម និងយល់ឲ្យច្បាស់ថាសំនួរត្រូវការអី។ ម្យ៉ាងទៀត ទៅរៀនសាលាដាច់ខាតកុំទុកចោលរាល់ចំណុច ឬមេរៀនណាដែលមិនយល់ឲ្យសោះ។ «បើខ្ញុំចាប់វាមិនបាន មកដល់ផ្ទះខ្ញុំស្រាវជ្រាវនិងរកដោយខ្លួនឯង។ បើនៅតែមិនកើត ទៅរៀនវិញខ្ញុំពិភាក្សាជាមួយមិត្តភ័ក្តិស្វែងយល់ពីវា តែបើថាយើងធ្វើមិនកើតទៀតអាហ្នឹងបានទៅរកគ្រូ គឺមិនត្រូវទៅរកគ្រូភ្លាមៗទេ យើងធ្វើវាឲ្យអស់សមត្ថភាពយើងសិន»។

ការជ្រើសរើសមិត្តភ័ក្តិខុសក្លាយជាអ្នកដើរ ត្រូវក្លាយជាអ្នករៀន

ការបង្កើតក្រុមដើម្បីជជែកមេរៀម ជាវិធីធ្វើឲ្យរៀនពូកែ។ ការវែកញែកគ្នាជាក្រុម អាចទទួលបានបទពិសោធន៍ល្អៗច្រើន របៀបរៀនល្អៗទៅវិញទៅមក ពិសេសការរៀនបែបនេះងាយចងចាំ ជាជាងរៀនតែឯង ឬស្ដាប់គ្រូ។ ប៉ុន្តែការជ្រើសរើសមិត្តភ័ក្ដិត្រូវពិចារណាដើម្បីការសិក្សាជោគជ័យ។ បើរើសយកអ្នករៀនជាគ្នា នឹងក្លាយសាសិស្សពូកែ តែបើរើសអ្នកពូកែដើរនឹងក្លាយជាអ្នកលេង។ «រើសមិត្តក៏ត្រូវរើសអ្នករៀន បើគេមានសមត្ថភាពប្រកួតប្រជែងនឹងយើង គឺយើងអាចចែករំលែកគ្នា រៀនប្រកួតគ្នា រីកចម្រើនទាំងអស់គ្នា»។

ការប្រលងសញ្ញាប័ត្រមធ្យមសិក្សាទុតិយភូមិទូទាំងប្រទេសនឹងចាប់ផ្ដើមនៅខែ២៤សីហា ដែលក្រសួងបានប្រកាសថាគ្មានទេការប្រលងលើកទី២ដូចឆ្នាំមុន សម្រាប់អ្នកធ្លាក់ពីការប្រលងគ្មានការបើកចម្លងឬសូកប៉ាន់នេះ ដរាបណាមិនមានរឿងដែលមិនអាចគិតទុកមុនបានកើតឡើង [ប្រធានសក្តិ]។

អត្ថបទ៖ ប៉ែន សុផាន់ណា