ចង្វាក់ម៉ាឌីហ្សុន ដែលកម្ពុជា ទើបបំបែកកំណត់ត្រា មានប្រភពពីណា?
- 2015-04-21 18:22:34
- ចំនួនមតិ 0 | ចំនួនចែករំលែក 0
ចង្វាក់ម៉ាឌីហ្សុន ដែលកម្ពុជា ទើបបំបែកកំណត់ត្រា មានប្រភពពីណា?
ចន្លោះមិនឃើញ
ម៉ាឌីហ្សុន គឺជា ចង្វាក់រាំមួយប្រភេទដែលទទួលបានការពេញនិយមណាស់តាំងពីទសវត្សរ៍ ៥០-៦០ នៅអឺរ៉ុប។ តែមិនមែនមានតែអឺរ៉ុបទេ ដែលចូលចិត្តរាំនោះ ប្រជាជនកម្ពុជាក៏ចូលចិត្តរាំលេងចង្វាក់នេះដែរ នៅតាមកម្មវិធីផ្សេងៗ រហូតដល់កាលពីថ្ងៃទី១៥ ខែមេសា ឆ្នាំ ២០១៥ កន្លងទៅថ្មីៗនេះ មនុស្សចំនួន ២០១៥ នាក់ បានចូលរួមរាំចង្វាក់ម៉ាឌីហ្សុនក្នុងព្រឹត្តិការណ៍អង្គរសង្ក្រាន្ត នាខេត្តសៀមរាប ដើម្បីបំបែកកំណត់ត្រាពិភពលោកចាស់ ដែលកាន់កាប់ដោយប្រទេសអូស្ត្រាលីកាល ពីឆ្នាំមុនក្នុងចំនួនអ្នកចូលរួម ១១៥០នាក់។ ប៉ុន្តែមនុស្សភាគច្រើនមិនបានដឹងថា ក្បាច់នេះមានប្រភពមកពីណាទេ?
សូមចុចអាន៖ ជយោ! កម្ពុជាជាប់ម៉ាឌីហ្សុន ២០១៥ ក្នុងកំណត់ត្រាពិភពលោក Guinness World Records ហើយ
ដើម្បីស្រាយចម្ងល់ថ្ងៃនេះ Sabay សូមបង្ហាញពីដើមកំណើតរបស់នៃចង្វាក់ម៉ាឌីហ្សុននេះ។ យោងតាមឯកសាររបស់ ឯកឧត្ដម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និង សម្ដីរបស់បណ្ឌិត សម សំអាង ទីប្រឹក្សាអមក្រសួងវប្បធម៌ បានឲ្យដឹងដូចគ្នាថា ម៉ាឌីហ្សុន គឺជា ក្បាច់រាំថ្មីមួយដែលមានការពេញនិយមណាស់នៅចុងទសវត្សឆ្នាំ ១៩៥០ ដល់ពាក់កណ្ដាលទសវត្សឆ្នាំ ១៩៦០ ។ វាត្រូវបានបង្កើតឡើង និង រាំលើកដំបូងនៅទីក្រុង Columbus រដ្ឋ Ohio សហរដ្ឋអាមេរិកនៅឆ្នាំ ១៩៥៧។
បណ្ឌិត សម សំអាង បានមានប្រសាសន៍ប្រាប់ Sabay ថា ដំបូងឡើយ គឺមានផ្លូវមួយក្នុងសហរដ្ឋអាមេរិកមានឈ្មោះ " ម៉ាឌីហ្សុន" ហើយអ្នករុករកផ្លូវនេះឃើញ គឺមានពីរនាក់ជាមិត្តភ័ក្ដិនឹងគ្នា ដោយម្នាក់ទៀតសួរថា ផ្លូវនោះនៅខាងណា ហើយម្នាក់ទៀតបានប្រាប់ថា នៅខាងឆ្វេង។ ដូចនេះហើយទើបរបាំមួយនេះ ពេលចាប់ផ្ដើមដំបូងត្រូវបោះជើងឆ្វេង និង ត្រូវរាំជាជួរ។
សំណួរមួយទៀតថា តើចង្វាក់នេះ បាននាំចូលមកប្រទេសកម្ពុជាតាំងពីឆ្នាំណានោះ លោកបណ្ឌិត បានឆ្លើយថា មិនដឹងពីពេលវេលាច្បាស់លាស់ទេ គ្រាន់តែគាត់ដឹងថា មុនសម័យ ប៉ុល ពត គឺមានការរាំចង្វាក់នេះហើយ និង លោកដាក់ការសន្និដ្ឋានជាជំហានដំបូងថា ប្រហែលក្នុងអំឡុងទសវត្សរ៍ឆ្នាំ ១៩៦០។ លោក សំអាង បន្ថែមទៀតថា ប្រទេសនៅអាស៊ីអាគ្នេយ៍នេះ មានការពេញនិយមណាស់ ជាពិសេស គឺប្រទេសកម្ពុជា ឡាវ និង ថៃ។
ទាក់ទងទៅនឹង ម៉ាឌីហ្សុន ២០១៥ ដែលបានជាប់ក្នុងកំណត់ត្រាពិភពលោក Guinness World Record នៅក្នុងព្រឹត្តិការណ៍អង្គរសង្ក្រាន្ដ នាខេត្តសៀមរាប កាលពីថ្ងៃទី ១៥ ខែ មេសា កន្លងទៅនេះ លោក បណ្ឌិត សម សំអាង បានបញ្ជាក់ថា "ខ្ញុំយល់ថា វាជារឿងដ៏ល្អសម្រាប់ប្រទេស ក៏ដូចជា ប្រជាជនកម្ពុជា"៕
អត្ថបទ៖ទ្រី រ៉ាវី
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
