ក្មេងកំព្រាធ្លាប់នៅមណ្ឌល ក្លាយជាម្ចាស់អាជីវកម្ម ៣ រកចំណូលសន្ធឹកសន្ធាប់

2015-05-11 16:55:48
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក កុយ ស៊ីឌឿន ក្មេងកំព្រាធ្លាប់រស់នៅក្នុងជីវភាពខ្សត់ខ្សោយ រកតែអង្ករច្រកឆ្នាំងពុំបាន តែពេលនេះជីវិតលោកបានប្រែក្លាយទាំងស្រុង មករស់ក្នុងវិឡាស្កឹមស្កៃ មានរថយន្តទំនើប និង ថែមទាំងជាម្ចាស់អាជីវកម្ម ៣ ដែលរកប្រាក់បានរាប់ពាន់ដុល្លារ។

ភាពជោគជ័យរបស់ម្ចាស់អាជីវកម្មស្ថានីយវិទ្យុ ក្លឹបសិល្បៈ និង ហាងកែសម្ផស្សរូបនេះ បានប្រាប់ Sabay ថា បានហែឆ្លងគ្រប់ឧបសគ្គទម្រាំមានថ្ងៃនេះ សូម្បីរឿងដែលអ្នកដទៃគិតថា ជារឿងគួរឲ្យខ្មាសគេ ក៏លោកជម្នះពុះពារដែរ ។

ចេញពីផ្ទះមករស់នៅមណ្ឌល ជួនគ្មានបាយហូប រកពេលសម្រាកគ្មាន

ដោយសារម្ដាយជាស្ត្រីមេម៉ាយ ក្រីក្រ រកព្រឹកខ្វះល្ងាច មិនអាចរ៉ាប់រងចិញ្ចឹមបីបាច់កូនៗទាំងអស់បាន ម្ដាយរបស់លោកក៏សម្រេចចិត្តបញ្ជូនលោកមករស់នៅមជ្ឈមណ្ឌលមួយឈ្មោះថា កៀនឃ្លាំង។

ពេលមករស់នៅទីនេះ ខាងមជ្ឈមណ្ឌលបានផ្ដល់ឲ្យលោកនូវការសិក្សាក្នុងសាលាវិចិត្រសិល្បៈដោយរៀនផ្នែកល្ខោននិយាយនៅពេលព្រឹក ពេលរសៀលរៀនចំណេះដឹងទូទៅ និងពេលល្ងាចរៀនបំពេញវិជ្ជានៅឫស្សីកែវ។

កូនពៅក្នុងចំណោមបងប្អូន ៩ នាក់ រូបនេះ ត្រូវងើបពីព្រលឹមដើម្បីធាក់កង់ទៅសាលា ដែលមានចម្ងាយរាប់សិបគីឡូម៉ែត្រ ដោយឆ្លងដរទៅមក ជួនកាលពេលត្រលប់ពីរៀនវិញមិនទាន់ គេហូបបាយម្ហូបអស់ក៏មានដែរ។ ក្រោយមក នៅមណ្ឌលគេមានបើកសិប្បកម្មដេរមុង លោក ស៊ីឌឿន ក៏ឆ្លៀតដេរមុងឲ្យគេ។ បើទោះជាលោកខ្លួនឯងសឹងតែគ្មានពេលទំនេរស្រាប់ទៅហើយក្ដី ព្រោះរៀនដល់ទៅបីវេន តែដោយសារចង់យកប្រាក់បន្តិចបន្តួចនេះ គ្រាន់សន្សំផ្ញើទៅគ្រួសារ ក៏ឆ្លៀតពេលដេររហូតដល់យប់ជ្រៅម៉ោង ១ ម៉ោង២ ទើបឈប់ ដោយមុងមួយគេឲ្យថ្លៃឈ្នួល ៤ កាក់។

បន្ទាប់មកលោកក៏ទៅដេរខោអាវទាហានទៀត។ ដោយម្ចាស់គេអាណិតស្រលាញ់ គេក៏សុំក្មេងកំព្រាឪពុករូបនេះឲ្យទៅរស់នៅជាមួយ ព្រោះរស់នៅមណ្ឌលពិបាករឿងបាយទឹកពេក។ តែរស់នៅបានប្រហែល ៥ ឆ្នាំ លោកក៏ត្រលប់មកមណ្ឌលវិញ។

ឈប់រៀនចេញច្រៀង តែប៉ះការងារល្អ ក្រោយមកមណ្ឌលសុំឲ្យចេញ

អ្នកមានស្រុកកំណើតនៅភូមិដើមជ្រៃ ឃុំរកាកោង ២ ស្រុកមុខកំពូល ខេត្តកណ្ដាលរូបនេះ បានបន្តការសិក្សារបស់ខ្លួនត្រឹមឆ្នាំទី ១ ផ្នែកអក្សរសាស្ត្រខ្មែរនៅសាកលវិទ្យាល័យភូមិន្ទភ្នំពេញ ព្រោះគ្មានថវិកាគ្រប់គ្រាន់។ ដូច្នេះហើយ លោកក៏ទៅសុំគេធ្វើការនៅមណ្ឌលអូស្ត្រាលីមួយ ផ្នែកសិល្បៈសម្រាប់ក្មេងពិការ គរ ថ្លង់នៅពេលថ្ងៃ ឯពេលយប់លោកចេញច្រៀងតាមហាងដល់ពាក់កណ្ដាលអាធ្រាត្រ។

មួយឆ្នាំក្រោយមក គាប់ជួននៅមណ្ឌលដែលលោកស្នាក់នៅ ខាងម្ចាស់ស្ថានីយវិទ្យុមួយគេបានមកលេង ហើយប្រាប់ថា ខាងគេនឹងបើកឱកាសការងារសម្រាប់អ្នករស់នៅមណ្ឌលជាពិធីករវិទ្យុ។ លឺដូចនេះ លោក ស៊ីឌឿន រំភើបជាខ្លាំង ព្រោះជាក្ដីប្រាថ្នាតាំងពីតូចៗមក ដោយសារឲ្យតែពេលទំនេរពីឃ្វាលគោម្ដងៗ លោកតែងនិយាយធ្វើជាពិធីករវិទ្យុត្រាប់លេងជាមួយក្មេងៗដទៃទៀត។

ពេលចូលដំបូង លោកបានត្រឹមជាយន្តការី (Operator) ប៉ុណ្ណោះ លុះក្រោយៗមកពិធីករវិទ្យុម្នាក់រវល់ឧស្សាហ៍សុំច្បាប់ពេក លោកស៊ីឌឿនក៏សុំគេសាកល្បង។ ពេលជំនួស ស្រាប់តែខាងម្ចាស់ស្ថានីយភ្ញាក់ផ្អើល មិននឹកស្មានថា លោកអាចធ្វើបានល្អយ៉ាងនេះ គេក៏យកលោកជាពិធីករតែម្ដង។

ដោយសារមានទេពកោសល្យពីកំណើត បូករួមធ្លាប់បានហាត់រៀននៅសាលាវិចិត្រសិល្បៈផង ពិធីកររូបនេះទទួលបានការចូលចិត្តពីសំណាក់អ្នកស្ដាប់យ៉ាងខ្លាំង។ លោកបានទាក់ទាញឲ្យខាងក្រុមហ៊ុនផ្សេងៗឧបត្ថម្ភ (Sponsor) កម្មវិធីវិទ្យុ ដែលធ្វើឲ្យលោកទទួលបានចំណូលច្រើនគួរសម។ ដោយឡែក ក្នុងឆ្នាំ ២០០២ ខាងមណ្ឌលដែលលោកស្នាក់នៅគេតម្រូវឲ្យលោកចាកចេញព្រោះគេយល់ថា លោកមានការងារ និង រស់នៅមណ្ឌលយូរហើយ។

ធ្លាក់ខ្លួនក្រ សូម្បីប្រពន្ធឆ្លងទន្លេក៏គ្មានប្រាក់

ដោយសារគ្មានទីជម្រកស្នាក់នៅដូចមុន លោកក៏ទៅជួលផ្ទះគេតម្លៃ ២៥$ ក្នុង ១ ខែ ហើយការងារជាពិធីករវិទ្យុនៅបន្តធ្វើដដែរ។ ២ឆ្នាំក្រោយមក លោក ស៊ីឌឿន ក៏រៀបអាពាហ៍ពិពាហ៍ ដោយបង្កើតរបរលក់ដូរមួយនៅផ្សារនាគមាសជាមួយប្រពន្ធ។ តែជាអកុសល លោកត្រូវខាតលុងចុងអស់ប្រាក់ពីខ្លួន ដោយសារការលក់ដូរនោះមិនទៅមុខនិងគ្មានបទពិសោធន៍ ។

គ្រានោះសូម្បីភរិយាជិតឆ្លងទន្លេក៏គ្មានប្រាក់ រហូតដាច់ចិត្តទៅខ្ចីបុលគេ។ ភាពធ្លាក់ខ្លួនក្រម្ដងនេះ លោកស្ទើរតែគ្មានអ្វីសេសសល់ជាដុំកំភួន ម្ល៉េះហើយលោកប្រឹងប្រែងបន្ថែមការងារជាពីរជាបីទៀតដើម្បីផ្គត់ផ្គង់គ្រួសារ។ លោកចាប់ផ្ដើមចេញច្រៀងនៅពេលយប់ឡើងវិញ ងើបពីព្រឹកម៉ោង៥ ទៅអានព័ត៌មាននៅវិទ្យុ សន្សំប្រាក់ល្អិតៗ ហើយទិញខោអាវជជុះឲ្យប្រពន្ធអង្គុយលក់នៅតាមចិញ្ចើមថ្នល់។ កាលពេលនោះ ប្រពន្ធលោកមិនចង់លក់ឡើយព្រោះខ្មាសគេ តែលោកពន្យល់ណែនាំថា ៖ "យើងត្រូវតែធ្វើ ព្រោះគ្មានអ្នកណាមកជួយយើងក្រៅពីយើងខ្លួនឯងនោះឡើយ" ទើបប្រពន្ធលោកយល់ព្រមទៅលក់តាមប្ដី។

ចាប់ផ្ដើមមានប្រាក់រាប់ពាន់ដុល្លារដោយសារប្រព័ន្ធផ្សព្វផ្សាយ

មិនយូរប៉ុន្មាន ហាក់បីដូចជាមានអ្វីមកជួយ។ លោកចេះតែរកចំណូលបានពីការដើររកម្ចាស់ឧបត្ថម្ភផ្សាយពាណិជ្ជកម្មវិទ្យុបានច្រើនហូរហែ រហូតមានប្រាក់សល់បើកបានក្លឹបបណ្ដុះបណ្ដាលផ្នែកសិល្បៈមួយ។ លុយដែលបានពីការបង្រៀន និង ចំណូលពីការរកបាននៃការផ្សាយពាណិជ្ជកម្មនៅវិទ្យុ លោកយកទៅទិញម៉ោងទូរទស្សន៍មួយ ដែលអាចរកចំណេញពីការផ្សាយពាណិជ្ជកម្មនោះបានថែមទៀត ។

លោក ស៊ី ឌឿន បញ្ជាក់ថា ភាពមានបាននៅពេលនោះជាការប្រថុយប្រថានខ្ពស់ តែជោគជ័យ ធ្វើឲ្យលោកត្រូវប៉ាន់មានប្រាក់ចូលហូរហៀរស្ទើរមិននឹកស្មានដល់ រហូតសល់ប្រាក់ទិញបានរថយន្តមួយគ្រឿងទៀតផង។

ចេះតែត្រូវប៉ាន់នេះនោះមិនដាច់ រហូតក្លាយជាម្ចាស់អាជីវកម្ម៣

ក្រោយពីសល់ប្រាក់ពីការចំណេញនៃការបើកក្លឹបសិល្បៈ លោកក៏បែកគំនិតពង្រីកខ្ទង់ចំណូលបន្ថែមទៀត ដោយបើកហាងកែសម្ផស្សមួយដាក់ថា DP Beauty ។ មិនយូរប៉ុន្មាន លោកមានគេមកទាក់ទងធ្វើអាវយឺត ចំណេញប្រាក់កប់ក្ដោង ព្រមទាំងត្រូវប៉ាន់ដី និង អចលនទ្រព្យផ្សេងៗទៀតថែមទៀត រហូតមានលុយទិញវិឡា ដូររថយន្ត និង ពង្រីកសាខាបាន ២ កន្លែងបន្ថែម ព្រមទាំងបង្កើតស្ថានីយវិទ្យុផងដែរ។ មិត្តភ័ក្ដិ គ្រួសារ និង សូម្បីតែខ្លួនលោកផ្ទាល់ក៏សឹងមិនជឿថា លោកមានបានយ៉ាងលឿនបែបនេះដែរ។

នៅពេល Sabay សួរថាអ្វីជាគន្លឹះសំខាន់នៅពីក្រោយដែលចេះតែនាំលោកឲ្យជោគជ័យមានប្រាក់បង្កើតអាជីវកម្មបន្តបន្ទាប់ដូចនេះ?

បុរសវ័យ៤៧ ឆ្នាំ បានប្រាប់ Sabay ថា ដោយសារបានផលពីវិទ្យុ។ លោកបន្តថា ជំនាន់នោះ វិទ្យុពេញនិយមណាស់ មនុស្សម្នាលចូលចិត្តបើកវិទ្យុស្ដាប់ តេចូលច្រៀងខារ៉ាអូខេ សំណូមពរបទចម្រៀងជាដើម។ ណាមួយលោកជាពិធីករវិទ្យុ នៅជាមួយប្រព័ន្ធផ្សព្វផ្សាយស្រាប់ គួបផ្សំនឹងលោកពាណិជ្ជកម្មលើវិទ្យុផង លោកផ្សព្វផ្សាយខ្លួនឯងផង ធ្វើឲ្យអ្នកស្ដាប់ គេលឺរាល់ថ្ងៃ នាំឲ្យអាជីវកម្មរបស់លោកអ្នកណាក៏ស្គាល់ បូករួមទាំងអ្នកស្ដាប់ពេញចិត្តសំឡេង ហើយមានហាងខ្លួនឯងទៀត គេមកជួយគាំទ្រ ។ លោកបន្តថា ពេលបើកក្លឹបសិល្បៈ មនុស្សចូលមកហាត់ច្រើនណាស់ ធ្វើឲ្យលោកសល់ប្រាក់រាប់ពាន់ មិនខុសពីសាលាកែសម្ផស្សដែរ នេះក៏ដោយសារប្រព័ន្ធផ្សព្វផ្សាយ។

“ឲ្យតែចូលវិទ្យុពេលណា ខ្ញុំមិនភ្លេចនិយាយផ្សព្វផ្សាយពីហាងខ្ញុំឡើយ ម្ល៉េះហើយ គេលឺគ្រប់ពេល ។ អ្នកស្ដាប់ពេញចិត្តទឹកដមសំឡេងពេលធ្វើអត្ថាធិប្បាយ គេចង់មកឃើញមុខផ្ទាល់ គួបផ្សំគេលឺឈ្មោះហាងយើងផ្សាយទៀត គេមកជួយគាំទ្រ ។ អ្នកភ្នំពេញមិនប៉ុន្មានទេ ភាគច្រើនអ្នកតាមខេត្ត គេចូលចិត្តយើង ដែលធ្វើឲ្យរបររកស៊ីលូតលាស់ឆាប់រហ័សដូចនេះ។ ដោយសារឃើញបានផ្លែផ្កាពីវិទ្យុអ៊ីចឹងហើយ ទើបខ្ញុំសម្រេចបើកស្ថានីយវិទ្យុខ្លួនឯងតែម្ដង។ ”។ លោក បន្ថែម។

អតីតក្មេងក្រីក្រ ក្លាយជាម្ចាស់អាជីវកម្ម ៣ និយាយថា ទម្រាំមានថ្ងៃនេះ លោកក៏ហែឆ្លងនូវរឿងកាត់ខ្មាសជាច្រើនមិនតិចដែរ ដូចជាគេថា លោកជាប្រុសតែបែរជារៀនកែសម្ផស្ស ចាស់ហើយនៅធ្វើកម្មវិធីច្រៀងខារ៉ាអូខេ ស្រែកឡូឡាសប្បាយ។ ប៉ុន្តែលោកតែងគិតថា មានតែខ្លួនយើងផ្ទាល់ទេ ទើបអាចជួយខ្លួនឯងបាន សុខចិត្តធ្វើល្ងង់ ធ្វើថោកជោគជ័យ ជាជាងឆ្លាតតែបរាជ័យ។

មួយវិញទៀត ប្រពន្ធលោកតែងផ្ដល់កម្លាំងចិត្តជួយជ្រោមជ្រែងតាំងពីដើមរៀងមក តាំងពីក្រមិនមានអ្វីសោះ រហូតដល់មានបាន ហើយលោកមិនដែលភ្លេចកំណើតខ្លួនឯងដែលធ្លាប់ជាក្មេងនៅមណ្ឌល គ្មានលុយទិញបាយហូប ពេលប្រពន្ធជិតឆ្លងទន្លេក៏គ្មានប្រាក់ ដែលទាំងអស់នោះចេះតែក្រើនរំលឹកលោកឲ្យប្រឹងប្រែង រហូតមានបានដល់សព្វថ្ងៃ៕

វីដេអូ