ទូតសុច្ឆន្ទៈយីហោរថយន្តប្រណិត Jaguar Land Rover ជានរណា?

2015-07-06 15:41:10
ចំនួនមតិ 0 | ចំនួនចែករំលែក 0

ចន្លោះមិនឃើញ

Jaguar Land Rover កំពុងពិចារណាក្នុងការស្វែងរកតារាល្បីក្នុងពិភពសិល្បៈ ធ្វើជាទូតសុឆន្ទៈ (Brand Ambassador) ដើម្បីផ្សព្វផ្សាយយីហោរថយន្តប្រណិត Jaguar Land Rover ក្នុងប្រទេសកម្ពុជា។

លោក មាស តុលា ប្រធានប្រតិបត្តិ Jaguar Land Rover បានឲ្យដឹងថា ទូតសុច្ឆន្ទៈរថយន្ត Jaguar Land Rover ជាសិល្បករដែលមានកេរ្តិ៍ឈ្មោះល្បីល្បាញក្នុងពិភពសិល្បៈ និងដែលមានសមត្ថភាពចំណេះដឹងខ្ពស់លើការប្រើប្រាស់រថយន្តយ៉ាងស្ទាត់ជំនាញ។

“ពួកគេក្រៅពីមានរូបសម្បត្តិស្រស់ស្អាត មានកេរ្តិ៍ឈ្មោះក្នុងពិភពសិល្បៈ ប៉ុន្តែក៏ត្រូវមានសមត្ថភាព ចំណេះដឹងលើការប្រើប្រាស់រថយន្តដោយឆ្លងកាត់សាលាបណ្ដុះបណ្ដាលយ៉ាងត្រឹមត្រូវ ដើម្បីទទួលតួនាទីដ៏ពិសេសនេះ"។

លោកថា ទូតសុច្ឆន្ទៈរថយន្ត Jaguar Land Rover នឹងមានឱកាសប្រើប្រាស់រថយន្តដ៏ប្រណិត ជាមួយការផ្តល់ជូនអត្ថប្រយោជន៍ជាច្រើនទៀត។

កន្លងទៅនេះ Jaguar Land Rover បានជ្រើសរើសកំពូលកីឡាករបាល់ទាត់ David Backhem ធ្វើឲ្យជាទូតសុឆន្ទៈដើម្បីផ្សព្វផ្សាយយីហោរថយន្ត Jaguar Land Rover នៅប្រទេសអង់គ្លេស។

លោកថា ការជ្រើសរើសតារាល្បីៗដែលមានកេរ្តិ៍ឈ្មោះជាយុទ្ធសាស្ត្រ ដើម្បីជួយលើកស្ទួយស្លាកយីហោរថយន្ត Jaguar Land Rover ឲ្យកាន់តែមានភាពល្បីល្បាញ និងការគាំទ្រពីអ្នកប្រើប្រាស់។

យ៉ាងណាលោកមិនទាន់បង្ហើបថាជាតារាកម្ពុជារូបណា ដែលនឹងត្រូវបានជ្រើសរើសធ្វើជាទូតសុច្ឆន្ទៈប្រចាំប្រទេសកម្ពុជា ដោយសារលោកថាការងារនេះកំពុងស្ថិតនៅក្នុងការពិចារណានៅឡើយ។

អត្ថបទ៖ ប៊ុណ្ណារ៉ា

វិដេអូ៖ បុប្ឆា