Lee Joon ដើរចេញពីក្រុម MBLAQ ក្រោយចប់កុងត្រា

2014-10-13 18:21:17
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Lee Joon សមាជិកក្រុមចម្រៀងកូរ៉េ MBLAQ នឹងដើរចេញពីក្រុមរបស់ខ្លួន ក្រោយពីចប់កុងត្រាជាមួយផលិតកម្ម ដើម្បីចង់ផ្ដោតលើអាជីពសម្ដែងវិញ។ នេះបើយោងតាមសារព័ត៌មានកូរ៉េជាច្រើន ចុះផ្សាយនៅព្រឹកនេះ។

កិច្ចសន្យារវាង Lee និងផលិតកម្ម J. Tune Camp ត្រូវបានបញ្ចប់ហើយ នៅពេលថ្មីៗនេះ ហើយតារារូបនេះបានសម្រេចចិត្តមិនបន្តកុងត្រាទៀតទេ ដើម្បីទុកពេលសម្រាប់អាជីពសម្ដែងវិញម្ដង។

បើទោះជាបានបញ្ចប់កិច្ចសន្យាហើយក៏ដោយ ប៉ុន្តែ Lee នឹងចូលរួមក្នុងការប្រគំតន្ត្រី “Curtain Call” របស់ក្រុម MBLAQ ដែលនឹងរៀបចំនៅថ្ងៃទី២៩ និង៣០ ខែវិច្ឆិកា ខាងមុខនេះ។ ក្រោយការប្រគំតន្ត្រីនេះ Lee នឹងលែងចូលរួមក្នុងសកម្មភាពរបស់ក្រុម MBLAQ ទៀតហើយ។

កន្លងមក តារាចម្រៀង Lee Joon ដែលបានលេចមុខក្នុងអាល់ប៊ុមដំបូងរបស់ MBLAQ “JUST BLAQ” កាលពីឆ្នាំ២០០៩ ធ្លាប់បញ្ចេញទេពកោសល្យសម្ដែងរបស់ខ្លួនក្នុងខ្សែភាពយន្តជាច្រើនដូចជា “Jungle Fish 2”, “Iris 2”, “Ninja Assassin” និង “Rough Play”។

ថ្មីៗនេះ Lee បានទទួលការកោតសរសើរជាច្រើនសម្រាប់ការសម្ដែងដ៏ប៉ិនប្រសប់ក្នុងរឿង “Gap-dong” ដែលជារឿងភាគថ្មីបំផុតរបស់គេលើកញ្ចក់ទូរទស្សន៍ tvN។ ឆាប់ៗនេះដែរ តារាវ័យ ២៦ឆ្នាំរូបនេះ នឹងសម្ដែងក្នុងរឿង “Mr. Baek” របស់ទូរទស្សន៍ MBC ជាបន្ត។

(Updated) បន្ទាប់ពីធ្លាយព័ត៌មានអំពីការចាកចេញរបស់ Lee Joon ចុងក្រោយនេះ សមាជិក Thunder ក៏ត្រូវបានគេដឹងថា នឹងដើរចេញពីក្រុម MBLAQ ដូចគ្នាដែរ ក្រោយពីចប់កុងត្រា ៕