លាង ឧត្ដម តូចចិត្តឡង់គ្រីស័របុកឡិចស៊ីសរបស់លោកវិលមួយជុំដាច់កង់បង់តែ ៥០០ដុល្លារ

2015-08-21 14:11:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង លាង ឧត្ដម បានត្អូញត្អែរថា លោកមានការតូចចិត្តណាស់ ព្រោះក្រោយជួបគ្រោះថ្នាក់ចរាចរណ៍ ដោយរថយន្តឡិចស៊ីសរបស់លោក ត្រូវរថយន្តឡង់គ្រីស័រមួយគ្រឿងបើកមកបុកដាច់កង់ក្រោយអស់មួយ ហើយភាគីបង្កឲ្យក្រុមហ៊ុនធានារ៉ាប់រងមកដោះស្រាយសងតែ ៥០០ដុល្លារ។

តារាសម្ដែងនិយមដើរតួឪពុករូបនេះថ្លែងថា សំណងដែលភាគីបង្កស្នើសង គឺតិចតួចពេកមិនអាចស៊ីសងនឹងការខូចខាតរបស់លោកឡើយ។ ឧត្ដម ថ្លែងថា "ពួកគេធ្វើអីចឹងដូចជាមើលងាយជីវិតមនុស្សណាស់ បងគិតមើលសំណងប៉ុណ្ណឹង ធ្វើអីកើត បើខ្ញុំសួរជាង គេថា អស់ ៦០០-៧០០ដុល្លារទៅហើយ មិនទាន់គិតអ្នករបួសរួមដំណើរជាមួយខ្ញុំ និងខាតពេលវេលាធ្វើការផង"។

លាង ឧត្តម បានជួបឧប្បត្តិហេតុខាងលើកាលពីរាត្រីថ្ងៃទី១៦ សីហា នៅភ្លើងស្តុបសាលាសន្ធរមុខ។ តារារូបនេះរៀបរាប់ថា ថ្ងៃនោះវេលាម៉ោងប្រមាណជា ១១យប់ ក្រោយថតរឿងរួច លោក និងបងប្រុសរបស់លោករួមដំណើរជាមួយគ្នាតាមរថយន្តចុះពីស្ពាន៧មករាតាមបណ្ដោយផ្លូវកម្ពុជាក្រោម ក្នុងបំណងទៅតំបន់ជ្រោយចង្វា តែពេលមកដល់ភ្លើងស្ដុបក៏ជួបឧប្បត្តិហេតុតែម្ដង។

តារាចម្រៀងដែលវិវត្តន៍ខ្លួនមកជាតារាសម្ដែងរូបនេះ បន្តថា ពេលនោះដោយសារយប់ជ្រៅភ្លើងចរាចរណ៍លែងមានទៅហើយ លោកក៏បើកឆ្លងស្តុបទៅមិនបានឈប់ទេ ហើយពេលកំពុងឆ្លងស្រាប់តែមានរថយន្តឡង់គ្រីស័រស៊េរី០៨មួយគ្រឿងបើកយ៉ាងលឿនក្នុងទិសដៅពីផ្សារឃ្លាំងរំសេវមកបុកផ្នែកខាងក្រោយរថយន្តរបស់លោកធ្វើឲ្យដាច់កង់មួយផ្នែកខាងក្រោយ និងក្រពឹតជញ្ជាំងក្រោយ។

"លោកខាងធានារ៉ាប់រងអ្ហើយ បុកឡានខ្ទេចប៉ុណ្ណឹងហើយ ចេញមុខមកដោះស្រាយសង 500$ ធ្វើតែឡានមិនគ្រាន់ផង ពួកនេះប្រមាថជីវិតគេគ្រប់គ្នាហ្មង។ ល្បឿនឡានមិនធម្មតា បុកឡានខ្ញុំឡើងវិលម៉ាជុំ និងដាច់កង់ បើម៉ូតូវិញចប់ តែសំណាងបានឡានខ្ញុំពាំង កុំអីអាយុជីវិតចំនួន៤នាក់ទៀតដែលជិះម៉ូតូត្រូវឡានឆក់យកទៅបាត់ជាមិនខាន"។ លាង ឧត្ដម ថ្លែង។

រូបភាព ៖ FB ឧត្តម

បងប្រុសរបស់លោកដែលរួមដំណើរ បានរងរបួសដោយបោកក្បាលនឹងជញ្ជាំងឡាន ហើយអ្នករងគ្រោះក៏បានដាក់ពាក្យបណ្ដឹងទារយកសំណងព្យាបាលខ្លួនដែរ។ ដំបូងលោកមិនចង់ឲ្យបែកចេញមកក្រៅទេ សុខចិត្តទុកពេលដោះស្រាយជាមួយគ្នា។ ប៉ុន្តែដោយការដោះស្រាយសំណងមានចំនួនតិចតូចពេក ទើបទប់ចិត្តលែងបានបញ្ចេញព័ត៌មានលើហ្វេសប៊ុកចែកប្រិយមិត្តពិចារណាតែម្ដង។

តារាសម្ដែង លាង ឧត្ដម គឺជាសិល្បករទី២ដែលជួបគ្រោះថ្នាក់ចរាចរណ៍គិតត្រឹមរយៈពេលតែ១ខែ។ មុននេះនៅថ្ងៃទី ៣១ កក្កដា អេនឌី ក៏បានជួបគ្រោះថ្នាក់នេះដែរនៅផ្ដុំផ្សារស៊ីលិប ដោយត្រូវម៉ូតូមួយគ្រឿងជិះមកបុករថយន្តលោកដែលបើកបញ្ច្រាសទិសបន្ទាប់ពីលោកចេញពីហាងកាត់ដេរសំលៀកបំពាក់មិត្តភក្ដិម្នាក់នៅក្បែរកន្លែងកើតហេតុ។ មកទល់នឹងពេលនេះ មិនទាន់ដោះស្រាយចប់ផង។

ងាកមកតារាសម្ដែង លាង ឧត្ដម ឯណេះវិញ ក្រោយពីចរចាដោះស្រាយលើកទី១មិនទាន់ត្រូវគ្នា លោកបញ្ជាក់ថា ភាគីទាំងពីរនឹងជួបដោះស្រាយគ្នាម្ដងទៀតនៅថ្ងៃទី២១ សីហា នេះ៕

អត្ថបទ៖ ទារិកា