គ្មានផលិតកម្មហៅច្រៀង បញ្ញាសក្តិ ប្រមូលលុយសន្សំទាំងអស់ធ្វើបទ Original ខ្លួនឯង

2015-08-25 16:56:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ធ្វើការនៅនគរបាលជាតិផ្នែកដន្ត្រីប្រមាណជាង៣ឆ្នាំក្នុងនាមជាអ្នកចម្រៀងប្រចាំនៅទីនោះបញ្ញាសក្តិ បានប្រាប់ថាលោកយកប្រាក់ខែក្នុង១ខែ៥០$ឥឡូវនេះ លោកយកប្រាក់ខែដែលសន្សំរយៈពេល៣ឆ្នាំ មកចំណាយផលិតជាបទចម្រៀងទាំងអស់។

អតីតតារាចម្រៀងប្រចាំ Spark Music អះអាងពីឆន្ទៈដែលបណ្ដាលឲ្យលោកធ្វើបែបនេះព្រោះតែការស្រលាញ់យ៉ាងជ្រាលជ្រៅលើវិស័យនេះ។ ដូច្នេះទោះបីជាគ្មានផលិតកម្មណាផ្តល់ឱកាស ក៏លោកត្រូវតែផលិតបទ Original នេះឡើងដោយខ្លួនឯងទាល់តែបាន។

ជីវិតតែលតោលគ្មានផលិតកម្មជ្រកកោនដូចគេ បានធ្វើឲ្យ ម្ចាស់បទ "សមុទ្រស្ងប់ខ្យល់" ម្នាក់នេះមិនអស់សង្ឃឹមនោះឡើយ។ លោកបានតាំងចិត្តថា ដរាបណាមានជីវិត ត្រូវតែតស៊ូឲ្យដល់ទីបញ្ចប់។

“ដូចអូនដឹងស្រាប់ហើយពីភាពបរាជ័យរបស់បងក្នុងវិស័យសិល្បៈប៉ុន្មានឆ្នាំចុងក្រោយនេះ ដែលមើលទៅ គឺដូចបងនៅឃ្លាតឆ្ងាយពីគេទាំងនោះខ្លាំងមែនទែន។ អីចឹងបងនឹងជំនះ។ បញ្ញាសក្តិថ្លែង។

វិលមកគម្រោងផលិតបទចម្រៀង Original Song នាពេលនេះ។ បញ្ញាសក្ដិ អះអាងថា នឹងធ្វើជាអាល់ប៊ុមតែម្ដង ប៉ុន្តែទាំង១០បទហ្នឹងមិនមែនក្នុងមួយអាល់ប៊ូមនោះទេ គឺមានការបែងចែកគ្នាទៅតាមប្រភេទបទចម្រៀងផ្សេងៗ។

"ចំពោះបទទាំងអស់នោះបន្តិចទៀតបងចេញជាអាល់ប៊ុមហើយរាល់ថវិកាដែលបងយកមកធ្វើបទចម្រៀងOriginalនេះបងមិនដឹងថាត្រូវបានចំណូលមកវិញយ៉ាងណានោះទេ គ្រាន់តែបងមានមិត្តភក្តិគេដឹងថាអាចយកចម្រៀងទៅដាក់ជារីងធូនសម្រាប់ដោនឡូនអីចឹងណាអូន"។

រូបភាព៖ FB បញ្ញាសក្ដិ

បញ្ញាសក្តិ បញ្ជាក់ទៀតថា ផែនការថ្មីរបស់លោកនេះ មានការចូលរួមពីសំណាក់ប្អូនជំនាន់ក្រោយមួយចំនួន ដែលពួកគេចេះធ្វើភ្លេងចូលរួមជួយ។ បន្ថែមពីលើនេះ ក៏មានការជួយច្រើនពីសំណាក់ខាង ស្ទូឌីយ៉ូ និង Fans ដែលធ្លាប់តែគាំទ្ររូបលោក ដោយពួកគេយោគយល់ មិនយកតម្លៃថ្លៃពីលោកនោះទេ។

អតីតអ្នកចម្រៀងនៅផលិតកម្ម Spark Music រូបនេះបានបន្តទៀតថា លោកមិនទាន់ហ៊ានរំពឹងទៅលើភាពជោគជ័យនោះទេ ប៉ុន្តែអ្វីដែលច្បាស់នោះ គឺលោកមិនបោះបង់ ធ្វើរហូតទាល់តែអស់ពីលទ្ធភាព៕

អត្ថបទ៖ ថា ម៉ាលីដា