ទិញដី ឬផ្ទះត្រូវប្រុងប្រយ័ត្នអ្វីខ្លះបើមិនចង់ជំពាក់ជំពិននៅពេលក្រោយ?

2015-08-27 16:28:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ការទិញដី ឬផ្ទះដែលមិនមានលិខិតស្នាមផ្លូវការ ឬមានត្រឹមប្លង់ទន់អាចឲ្យអ្នកទិញក្លាយជាជនរងគ្រោះដោយមិនដឹងខ្លួន ហើយជនរងគ្រោះនេះភាគច្រើនគឺអ្នកមិនសូវធូរធារដែលចង់រកដី ឬផ្ទះដែលមានតម្លៃថោកសមរម្យនេះឯង។ លោក គីម ហ៊ាងម្ចាស់ក្រុមហ៊ុនខ្មែរ រៀល អ៊ីស្ទេត បានចែករំលែកឲ្យបានដឹងថា តើការទិញដី ឬផ្ទះត្រូវមានអ្វីដើម្បីបញ្ចៀសហានីភ័យទាំងឡាយ។

«អត់ប្លង់រឹង LMAPអត់មានការរកស៊ីដាច់ខាត» នេះជាការសង្កត់ធ្ងន់របស់ប្រធានក្រុមហ៊ុនអចលនទ្រព្យខាងលើ។ លោកបន្ថែមថា មុនទិញដី ឬផ្ទះរឿងដំបូងដែលលោកសួរគឺមានប្លង់រឹង (ប្លង់ LMAP) ឬអត់? បើអត់គឺលោកមិនរកស៊ីជាមួយទេ ព្រោះអាចមានរឿងជាប់វាក់វិនច្រើននៅពេលក្រោយ។

លោក គីម ហ៊ាងម្ចាស់ក្រុមហ៊ុនខ្មែរ រៀល អ៊ីស្ទេត

លោកលើកឧទាហរណ៍មួយថា បុគ្គល "ក" គាត់មានលុយ ៥០ ម៉ឺនដុល្លារគាត់ចង់ទិញគម្រោងដីឡូត៍មួយកន្លែងតម្លៃ ១ លានដុល្លារយកមកពុះលក់។ គាត់ត្រូវខ្ចីលុយធនាគារ ៥០ ម៉ឺនដុល្លារទៀតទើបគ្រប់អាចទិញដីបាន តែគាត់បានយកប្លង់រឹងទៅដាក់នៅធនាគារដើម្បីអាចខ្ចីលុយបាន។ ក្រោយមកគាត់ទៅសាលាខណ្ឌដើម្បីធ្វើលិខិតផ្ទេរសិទ្ធិ (ប្លង់ទន់) ហើយពុះដីឡូត៍នោះលក់។ ពេលលក់អស់ គាត់បានលុយ១,៥ លានដុល្លារ។ គាត់ចំណេញបាន ៥០ ម៉ឺនដុល្លារ តែគាត់យកលុយទាំងអស់រត់ទៅរស់នៅស្រុកក្រៅបាត់។ ដល់ពេលវេលាកំណត់ ធនាគារមិនឃើញអ្នកខ្ចីលុយមកសង ក៏រឹបអូសយកដីដែលមានប្រជាជនច្រើនគ្រួសាររស់នៅបាត់ទៅហើយ។

ដល់ពេលនោះមានបញ្ហាកើតឡើង ហើយជនរងគ្រោះយកប្លង់ទន់ (លិខិតផ្ទេរសិទ្ធិ) មកបង្ហាញថា ខ្លួនមានឯកសារត្រឹមត្រូវ។ សំណួរសួរថា តើនរណាឈ្នះ នរណាចាញ់? «បើតាមផ្លូវច្បាប់គឺធនាគារជាអ្នកឈ្នះ។ លិខិតផ្ទេរសិទ្ធិគឺគ្រាន់តែផ្ទេរសិទ្ធិទេ តែមិនមែនជាម្ចាស់ទេ។ ម្ចាស់គឺ អ្នកដែលមានប្លង់រឹង»។ នេះជាការបន្ថែមរបស់អ្នកជំនាញទិញលក់ដីធ្លីដដែល។

កន្លងមកករណីបែបនេះកើតមានច្រើនដែរនៅក្នុងប្រទេសកម្ពុជា។ អ្នកទិញលក់បន្ត (អ្នកគួកជេ) ភាគច្រើនធ្វើត្រឹមប្លង់ទន់ទេ ដើម្បីចំណេញបានច្រើន។ ទីមួយគឺ មិនចាំបាច់ចំណាយទៅលើការធ្វើប្លង់រឹង និងទីពីរមិនចាំបាច់បង់ពន្ធ ៤ ភាគរយនៃតម្លៃផ្ទះ។ តែអ្នកដែលចង់បានតម្លៃធូរថ្លៃច្រើនទិញយកដី ឬផ្ទះដែលមានប្លង់ទន់នេះដោយមិនបានគិតហានីភ័យពេលក្រោយ។

ចុះករណីបែបណាដែលអាចទិញដីដែលមានប្លង់ទន់បាន? លោក គីម ហ៊ាងប្រាប់ថា ករណីដែលអាចទិញដីមានត្រឹមប្លង់ទន់ ឬលិខិតផ្ទេរសិទ្ធិបាន លុះត្រាតែអតិថិជនស៊ើបបានច្បាស់ពីប្រវត្តិតំបន់ដែលចង់ទិញនោះថា កន្លងមកតំបន់នោះមិនធ្លាប់មានគេធ្វើប្លង់រឹងទេពីមុនមក។ បើតំបន់នោះមានប្រជាជនរស់នៅច្រើនយូរឆ្នាំ និងមិនដែលមាននរណាធ្វើប្លង់រឹងពីមុនមកទេនោះមានត្រឹមប្លង់ទន់អាចទុកចិត្តបាន។

ចំពោះការទិញបុរី 

លោកឲ្យដំបូន្មានថា គួរទិញពីបុរីណាដែលមានប្រវត្តិល្អ មិនធ្លាប់ជំពាក់វាក់វិនលើបញ្ហាអ្វី។ ចំណុចដែលត្រូវចងចាំបំផុតគឺត្រូវមានប្លង់រឹងសម្រាប់បញ្ជាក់ពីកម្មសិទ្ធិជាផ្លូវការ។ លោកថា កុំប្រថុយចង់បានតម្លៃថោកតែអាចបង្កជាបញ្ហានៅពេលក្រោយ៕

អត្ថបទ៖ ប្រាក់ ចាន់សីហា