នេត សុចរិយា ងាកមកច្នៃម៉ូដខ្លួនឯង ឥឡូវក្រឡេកមើលស្នាដៃនាង
- 2015-09-15 21:09:35
- ចំនួនមតិ 0 | ចំនួនចែករំលែក 0
នេត សុចរិយា ងាកមកច្នៃម៉ូដខ្លួនឯង ឥឡូវក្រឡេកមើលស្នាដៃនាង
ចន្លោះមិនឃើញ
បន្ទាប់ពីសម្រេចថាពង្រីកអាជីព នេត សុចរិយា បានងាកមករៀនជំនាញពីរបន្ថែមលើអាជីពជាតារាសម្ដែង និងពិធីការិនី នោះគឺជំនាញឌីជេ និងរចនាម៉ូដ ដែលជំនាញចុងក្រោយនេះ ឥឡូវចេញលទ្ធផលហើយ។
លទ្ធផលសម្រេចពីការរៀនច្នៃម៉ូដសំលៀកបំពាក់នេះ ចរិយា បានច្នៃម៉ូដរ៉ូបមួយមានពណ៌ខ្មៅលាយពណ៌មាស ដែលនាងបានស្លៀកទៅចូលរួមកម្មវិធីសិល្បៈមួយកាលពីសប្ដាហ៍មុន។ តារាស្រីតូចច្រឡឹងរូបនេះ ថ្លែងថា នាងបានចំណាយពេលពេញមួយថ្ងៃដើម្បីធ្វើឲ្យរួចរាល់។ ដូច្នេះហើយធ្វើឲ្យនាងពេញចិត្តណាស់ ចំពោះផលដែលកើតចេញពីការខិតខំមួយនេះ។
“ខ្ញុំស្រឡាញ់ខ្លាំងណាស់ ព្រោះមួយឈុតនេះ ខ្ញុំបានខិតខំខ្លាំងណាស់ អត់ដេកអត់ពួនទេ គឺតាំងពីម៉ោង៣រសៀលរហូតដល់ម៉ោង២ទៀបភ្លឺឯណោះបានហើយបង។ ខ្ញុំនឹងព្យាយាមចងចាំចំពោះលទ្ធផលមួយនេះ"។ នេត សុចរិយា ថ្លែង។
យោងលើហេតុផលថា អ្នកសិល្បៈគួរមានសមត្ថភាពច្រើន តារាសម្ដែង និងពិធីការិនី នេត សុចរិយា បានងាកទៅសិក្សាជំនាញឌីជេ និងរចនាម៉ូដសំលៀកបំពាក់បន្ថែមពីលើអាជីពសិល្បៈ។ ជំនាញឌីជេ នាងទៅសិក្សានៅសាលា ដោយឡែកផ្នែករចនាម៉ូដសំលៀកបំពាក់ នាងជួលគ្រូមកបង្រៀនដល់ផ្ទះតែម្ដង។
នេត សុចរិយា និងណាថាន់ ជាសង្សារ(រូបភាព៖ផ្ដល់ដោយ ចរិយា)
ក្រោយការព្យាយាមសិក្សាជាច្រើនខែលើជំនាញរចនានេះ ចរិយា ទើបសម្រេចបានរ៉ូបខ្មៅលាយពណ៌មាសខាងលើ។ យ៉ាងណា នាងថា នេះមិនមែនជាសមិទ្ធផលទី១របស់នាងនោះទេ។
តារាស្រីដែលមានសង្សារជាជាតិសិង្ហបុរីរូបនេះថ្លែងថា រ៉ូបពណ៌សដែលនាងស្លៀកក្នុងថ្ងៃខួបកំណើតរបស់នាងកាលពីខែកក្កដាកន្លងទៅ ក៏នាងច្នៃម៉ូដដោយខ្លួនឯងដែរ។ យ៉ាងណា សមិទ្ធផលទាំងពីរនេះ នាងពេញចិត្តមួយឈុតចុងក្រោយជាង ដោយសារថា នាងបានចំណាយពេល និងកម្លាំងថាមពលច្រើនជាងដែរ។
អត្ថបទ៖ នេត សុចរិយា សម្ងំរៀនជំនាញថ្មីបន្ថែមលើសអាជីព២មុន
តោះ...ឥឡូវជួយមើលគ្នាមើល៍ ស្អាតទេមួយឈុតនេះ!!!
អត្ថបទ៖ ទារិកា