បឺត ខាំ គ្មានសង្ឃឹមឈ្នះ ឡៅ ស៊ីណាត យកខ្សែក្រវាត់ជើងឯកខារ៉ាបាវ

2015-11-05 15:43:04
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ជើងចាស់ បឺត ខាំ បាននិយាយពីអារម្មណ៍ក្នុងចិត្តខ្លួនឯងថាមិនមានសង្ឃឹមថានឹងអាចយកឈ្នះខ្លាចាស់ ឡៅ ស៊ីណាត ក្នុងការប្រកួតវគ្គផ្ដាច់ព្រ័ត្រដណ្ដើមខ្សែក្រវាត់ជើងឯកខារ៉ាបាវរដូវកាលទី២នៅថ្ងៃអាទិត្យទី៨ខែវិច្ឆិកាឆ្នាំ២០១៥ ខាងមុខនេះទេ។

បឺត ខាំ កំពុងហ្វឹកហាត់ជារៀងរាល់ថ្ងៃ ដើម្បីបង្កើនសមត្ថភាពរបស់ខ្លួនត្រៀមប្រកួតជាមួយជើងខ្លាំង ឡៅ ស៊ីណាត។ ទន្ទឹមនឹងការហ្វឹកហាត់នេះដែរ កីឡាករមកពីខេត្តកំពង់ឆ្នាំងរូបនេះ បាននិយាយថា ខ្លួនអត់មានសង្ឃឹមច្រើនក្នុងការប្រកួតនេះទេ ដោយអ្វីគ្រប់យ៉ាងពឹងទៅលើព្រះជាម្ចាស់ និងចប់ការប្រកួតទើបអាចដឹងច្បាស់ នរណាជាម្ចាស់ខ្សែក្រវាត់ប្រាក់រង្វាន់៥ពាន់ដុល្លារនេះ។

“ខ្ញុំអត់អាចថាឈ្នះឬចាញ់ពេលនេះបានទេ ហើយខ្ញុំក៏មិនប្រាថ្នាអីនោះដែរ... មានតែព្រះទេទើបដឹង។ ដូចដឹងហើយ ខ្ញុំកាន់សាសនាគ្រីស្ដ ដូច្នេះខ្ញុំអត់និយាយអីច្រើនទេ។ ចប់ការប្រកួត លទ្ធផលនឹងដឹងទាំងអស់គ្នា”។

ងាកទៅខាង ឡៅ ស៊ីណាតវិញ រូបគេមានសង្ឃឹមច្រើន ដោយសារមើលឃើញចំណុចអាចវាយយកពិន្ទុពី បឺត ខាំ បាន ដោយចូលឱបអុកជង្គង់ ណាមួយអ្នកប្រដាល់ជើងចាស់រូបនេះក៏មិនអាចទាត់បានខ្លាំងដូចកាលពីមុនដែរ បន្ទាប់ពីមានរបួសជើងទៅព្យាបាលដល់ជប៉ុនមក។

ចំពោះប្រវត្តិជួបគ្នារវាងកីឡាករទាំងពីរខាងលើគឺ៣ដងចុងក្រោយ ឡៅ ស៊ីណាត ឈ្នះម្ដង (បឺត ខាំ សន្លប់ទឹកទី៤) , បឺត ខាំឈ្នះម្ដងដោយពិន្ទុ និងម្ដងទៀតស្មើគ្នា ៕

អត្ថបទ៖ មុន្នី រម្យ