ប្រវត្តិមជ្ឈមណ្ឌល ធនធានសោតទស្សន៍ "បុប្ផាណា"
- 2015-11-06 16:10:01
- ចំនួនមតិ 0 | ចំនួនចែករំលែក 0
ប្រវត្តិមជ្ឈមណ្ឌល ធនធានសោតទស្សន៍ "បុប្ផាណា"
ចន្លោះមិនឃើញ
លោក ជា សុភាព អនុប្រធានមជ្ឈមណ្ឌល បានរៀបរាប់ប្រាប់ Sabay ថា មជ្ឈមណ្ឌលសោតទស្សន៍ បុប្ផាណា ត្រូវបានបង្កើតឡើងកាលពីឆ្នាំ ២០០៦ ក្រោមគំនិតផ្ដួចផ្ដើមរបស់សមិទ្ធិករភាពយន្ត ប៉ាន រិទ្ធី ជាមួយនឹងសមិទ្ធិករល្បីល្បាញម្នាក់ទៀតឈ្មោះ អ៊ី ប៉ាណ្ណាកា ដែលជាមនុស្សមាននិស័្សយស្រឡាញ់ភាពយន្តដូចគ្នា និងមានការគាំទ្រដោយក្រសួងវប្បធម៌ និងវិចិត្រសិល្បៈ ព្រមទាំងរាជរដ្ឋាភិបាល។ មជ្ឈមណ្ឌល ធនធានសោតទស្សន៍ បុប្ផាណា មានអាសយដ្ឋានអាគារ ៦៤ ផ្លូវ ២០០ សង្កាត់បឹងរាំង ខណ្ឌដូនពេញ។
លោកបានបន្តទៀតថាការបង្កើត បុប្ផាណា នេះឡើងគឺដើម្បីប្រមែប្រមូលបណ្ណាសារសោតទស្សន៍ទាំងអស់ទាក់ទងទៅនឹងប្រទេសកម្ពុជា ទាំងក្នុង និងក្រៅប្រទេស ដូចជា បារាំង សហរដ្ឋអាមេរិក ជប៉ុន និងអូស្ត្រាលី។ ដោយដាក់នៅក្នុងកន្លែងមួយ ដើម្បីឲ្យសាធារណជនទូទៅ ជាពិសេសយុវជនជំនាន់ក្រោយ បានស្វែងយល់ពីបេតិកភណ្ឌភាពយន្តទាំងអស់នោះ។ បុប្ផាណា មានដៃគូធំនៅក្នុងស្រុកខ្មែរគឺនាយកដ្ឋានភាពយន្ត និងផ្សព្វផ្សាយវប្បធម៌ ហើយនៅបារាំងមានឈ្មោះថា INA ឬក្រសួងការបរទេសបារាំង និង ECPAD ដែលមានឈ្មោះល្បីល្បាញនៅបារាំង។
"តាំងពីបង្កើតមក មជ្ឈមណ្ឌល ធនធានសោតទស្សន៍ នេះបានប្រមែប្រមូលទាក់ទងនឹងប្រទេសកម្ពុជាច្រើនមែនទែនដែលរួមមានបណ្ណាសារវីដេអូជាង ២០០០ ចំណងជើងដែលទស្សនិកជនអាចទស្សនាបានដោយសេរី ហើយយើងមានបណ្ណាសារជារូបថតរាប់ម៉ឺនសន្លឹកដែលខ្ញុំមិនអាចចាំចំនួនបាន និងមានបណ្ណាសារជាខ្សែអាត់សំឡេងរាប់រយម៉ោងទៀត។”
បច្ចុប្បន្នមានកំណើនបណ្ណាសារជាច្រើន ដែលបង្កភាពងាយស្រួលដល់និស្សិត ក៏ដូចជាយុវវ័យដែលចង់សិក្សាអាចមកទីនេះស្វែងរកបាន នេះជាសមិទ្ធផលដែលយើងសម្រេចបាន ហើយអ្នកសិក្សានេះទៀតសោត មិនត្រឹមតែជាជនជាតិខ្មែរប៉ុណ្ណោះទេ មានទាំងអ្នកស្រាវជ្រាវមកពីបរទេសទៀត។
សម្រាប់ផលលំបាកលោក ជា សុភាព បានបញ្ជាក់ថា "ជាធម្មតាទេកន្លែងណាក៏ដូចកន្លែងណាពេលបង្កើតដំបូងតែងជួបបញ្ហាតិចតួចហើយ ដោយកន្លែងសោតទស្សន៍នោះដំបូងត្រូវជួបបញ្ហាហិរញ្ញវត្ថុ ព្រោះមិនសូវមានកាគាំទ្រច្រើនទេ ថ្វីត្បិតវាមានសារសំខាន់ក៏ដោយ តែពួកយើងអាចជម្នះការលំបាកនេះបាន។”
បុរសវ័យ ៣០ ឆ្នាំរូបនេះបានបន្តទៀតថា បញ្ហាលំបាកមួយទៀតគឺបង្កើតទំនុកចិត្តដល់សាធារណជនថា កន្លែងនេះគឺសម្រាប់តម្កល់ និងថែរក្សាបណ្ណាសារសោតទស្សន៍សម្រាប់ប្រទេសកម្ពុជា ហើយបណ្ដាស្ថាប័នមួយចំនួនមិនទាន់ទុកចិត្តថា អាចមិនធ្វើឲ្យបែកធ្លាយវីដេអូ ឬអ្វីផ្សេងទៀត តែឥឡូវនេះគាត់ទុកចិត្តហើយ។
អនុប្រធានមជ្ឈមណ្ឌល ខាងលើបានសង្កត់ធ្ងន់ថា បុប្ផាណា ជាកន្លែងប្រមូលផ្ដុំបណ្ដាសារទាំងឡាយដោយអាចឲ្យទស្សនិកជនមកទស្សនានៅទីនេះផ្ទាល់ មិនអាចថតចម្លងបានទេ ព្រោះដែលពិសេស គឺមជ្ឈមណ្ឌលលោកមានគោលការណ៍មួយគឺគោរពកម្មសិទ្ធិបញ្ញា៕
អត្ថបទ៖ទ្រី រ៉ាវី
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
