Sabayប្រកាសជួយអង្គការខ្មែរដែលមានសកម្មភាពល្អៗ តែការផ្សព្វផ្សាយនៅមានកម្រិត
- 2016-02-13 15:51:01
- ចំនួនមតិ 0 | ចំនួនចែករំលែក 0
Sabayប្រកាសជួយអង្គការខ្មែរដែលមានសកម្មភាពល្អៗ តែការផ្សព្វផ្សាយនៅមានកម្រិត
ចន្លោះមិនឃើញ
ក្រុមហ៊ុនSabay ឌីជីថលថ្មីៗនេះ បានប្រកាសចេញនូវជំហររបស់ខ្លួន បង្កើនការគាំទ្រដល់បណ្ដាអង្គការមិនមែនរដ្ឋាភិបាលដែលកំពុងដើរតួនាទីក្នុងការរួមចំណែកលើកកម្ពស់វិស័យ អប់រំ ផ្នែកសុវត្ថិភាពតាមដងផ្លូវនិង សុខភាពសាធារណៈ តាមរយៈការផ្ដល់ជូនដោយឥតគិតថ្លៃ នូវកិច្ចសហប្រតិបត្តិការ ឃោសនាផ្សព្វផ្សាយគ្រប់យុទ្ធនាការ ក៏ដូចជាផលិតផលអប់រំនានា ។
ឆ្លើយតបនឹងការផ្សាយជូនដោយមិនគិតថ្លៃសម្រាប់បណ្ដាអង្គការចាប់តាំងពីថ្នាក់សហគមន៍រហូតដល់ អង្គការជាតិនិងអន្តរជាតិ គឺSabayនិងប្រើប្រព័ន្ធផ្សព្វផ្សាយអនឡាញធំជាងគេរបស់ខ្លួន (sabay.com) ដែលមានយុវវ័យចូលអានប្រមាណជា ១លានដងរៀងរាល់ថ្ងៃ។
ការផ្ដល់ជូននេះ រួមមានការសរសេរអត្ថបទ ផលិតបទសម្ភាសន៍ ឬដាក់ជាផ្ទាំងផ្សព្វផ្សាយ(Banner) អប់រំស្របតាមប្រធានបទខាងដើម។ល។
ខាងក្រោមជាប្រសាសន៍ខ្លីៗដែលលោក នាយកប្រតិបត្តិ ជី សិលាលើកឡើង៖
សំនួរ៖ តើសកម្មភាពសង្គមណាខ្លះ ដែលSabay មានគម្រោងជួយគាំទ្រនិងផ្សព្វផ្សាយ? ជី សិលា៖ ការអប់រំ!ខ្ញុំចង់សំដៅដល់ឱកាសរៀនសូត្រនិងការជំរុញឲ្យគ្រប់គ្នាបានទទួលការអប់រំព្រមទាំងមិនបោះបង់ចោលការសិក្សាមុនបញ្ចប់ថ្នាក់ទី១២។ សម្រាប់ខ្ញុំ នេះគឺនៅតែជាការងារអាទិភាព។ នៅពេលដែលមនុស្សចេះអាន មនុស្សរមែងចេះគិតច្រើនជាងមុន មានប្រភពចំណេះដឹងកាន់តែសម្បូរ ចេះគិតថ្លឹងថ្លែង ចេះសម្រេចចិត្តហើយនៅពេលដែលគាត់សម្រេចចិត្តត្រូវ វានឹងជះឥទ្ធិពលល្អដល់ទាំងសេដ្ឋកិច្ចគ្រួសារ និងសេដ្ឋកិច្ចជាតិ។ តែបើគាត់អត់ចេះអក្សរ គាត់នឹងសម្រេចចិត្តពេលខ្លះទាំងងងឹតងងល់...ចឹងលទ្ធផលក៏ទៅតាមហ្នឹងដែរ។ រឿងបន្ទាប់គឺការយល់ដឹងចំពោះសុខភាព។
សំនួរ៖ តើSabay ជួយដល់NGO ទាំងនោះដោយរបៀបណា? ជី សិលា៖ វ៉ិបសាយ Sabay ជាវ៉ិបសាយក្នុងស្រុកធំជាងគេ មានអ្នកអានច្រើនបំផុតក្នុងមួយថ្ងៃៗ។ ចឹងបើយើងជួយផ្សាយបន្ត រឿងវិជ្ជមាន ដើម្បីកែលំអដូចជា បញ្ហាចរាចរណ៍ មិនថាការកកស្ទះឬការកាត់បន្ថយគ្រោះថ្នាក់លើដងផ្លូវ... ផ្ដល់ការអប់រំផ្នែកសុខភាពបន្តពូជ ឬអនាម័យនៃការរស់នៅប្រចាំថ្ងៃអីជាដើមខ្ញុំយល់ថានឹងរួមចំណែកបានខ្លះ ក្នុងការផ្លាស់ប្ដូរ ឥរិយាបថអវិជ្ជមានប្រចាំថ្ងៃ ដូចជាដឹងច្បាប់ តែនៅតែបំពានច្បាប់ អត់ពាក់មួកសុវត្ថិភាព ជិះបញ្ច្រាសអីជាដើម របស់មនុស្សមួយចំនួនតូច។ ខ្ញុំដឹងថាអង្គការខ្មែរច្រើនណាស់គាត់មានសកម្មភាពល្អៗច្រើន តែមិនមានឱកាសផ្សព្វផ្សាយឲ្យបានទូលំទូលាយនៅក្នុងបណ្ដាញផ្សព្វផ្សាយដែលពេញនិយមទេ ព្រោះឧបសគ្គរឿងតម្លៃ ដូច្នេះBanner និង ផលិតផលឃោសនាទំាងនោះត្រូវបានកប់ទុកក្នុងដែនកំណត់មួយគួរឲ្យសោកស្ដាយ។ ចំពោះរឿងនេះខ្ញុំយល់ថា មនុស្សជាច្រើនបានពលិកម្ម ការងារប្រចាំថ្ងៃគាត់សម្រាប់ការងារសង្គម ដែលទទួលបានកម្រៃតិចតួច ហើយហត់នឿយច្រើន ចុះហេតុអ្វីយើងជាអ្នកសារព័ត៌មានមិនអាចរួមចំណែកយកស្នាដៃគាត់ទៅផ្សាយបន្តឲ្យទៅដល់ក្រុមគោលដៅ?
សំនួរ៖ ជាទស្សនៈលោកផ្ទាល់ តើយល់យ៉ាងណាចំពោះសកម្មភាពសង្គមនានាកន្លងមកនៅក្នុងប្រទេសយើង? ជី សិលា៖ ខ្ញុំកោតសរសើរ។ ប៉ុន្តែអ្វីដែលខ្ញុំចង់ឃើញបន្តទៀតនោះគឺ ពួកគាត់នៅតែបន្តធ្វើ និងធ្វើឲ្យកាន់តែសកម្មលើ វិស័យអាទិភាព។ វិនិយោគិន ដែលមានMediaធំនៅក្នុងដៃ ខ្ញុំដឹងថាមិនមែនគាត់មិនចង់ផ្សាយពីការអប់រំទេ តែបើគេមិនមករកយើង យើងទៅរកគេ!ចំណែកSabayយើងស្វាគមន៍អោយតែស្របទៅនឹងប្រធានបទខាងដើម។
សំនួរ៖ សព្វថ្ងៃបើទោះជាមមាញឹកច្រើនជាមួយជំនួញបែបណាក្ដីក៏លោកឆ្លៀតចូលរួមការងារសង្គម ចុះប្រសិនបើថ្ងៃណាមួយ លោកចូលនិវត្តរឺស្កប់ស្កល់ពីរបររកស៊ីដ៏ប្រកួតប្រជែងទាំងនោះ ហើយមានពេលវេលាគ្រប់គ្រាន់ក្នុងការធ្វើការងារសង្គម តើវិស័យណាមួយដែលលោកចង់ធ្វើបំផុត? ជី សិលា៖ ដូចខ្ញុំនិយាយតាំងពីដើមអ៊ីចឹង គឺការអប់រំ។ ការបំបាត់អនក្ខរភាពជាកត្តាចម្បងដែលមិនអាចមើលរំលងបាន ព្រោះគុណភាពជីវិតកើតចេញពីការចេះអក្សរ ចេះអាន ទទួលព័ត៌មាន ចេះថ្លឹងថ្លែង និងការសម្រេចចិត្ត ទាំងនេះមិនមែនផ្ដោតសំខាន់លើថាតើគាត់រៀនសូត្របានខ្ពស់ ឬទាបកម្រិតណាទេ ប៉ុន្តែយ៉ាងហោចណាស់រុញច្រានឲ្យពួកគេចេញផុតពីអនក្ខរកម្មកាន់តែខ្ពស់កាលណាល្អកាលហ្នឹង។ Sabay ក៏ឈរលើគោលការណ៍ជំរុញការអាន និងការសរសេរ(Sabay Write/E-Novel) ដល់សាធារណជនដែរ រហូតយើងមានអ្នកអានច្រើនបំផុតបើធៀបទៅប្រព័ន្ធផ្សព្វផ្សាយអនឡាញនានា។
សំនួរ៖ តើលោករំពឹងថា ការរួមចំណែករបស់Sabay ចំពោះបណ្ដាអង្គការ ស្ថាប័ន ក្រៅរដ្ឋាភិបាលដែលស្ថិតនៅក្នុងវិស័យរបស់លោករៀបរាប់ខាងលើទទួលបានជោគជ័យកម្រិតណាដែរ? ជី សិលា៖ ទោះបីជាSabay ជាវ៉ិបសាបមួយធំក៏ពិតមែន ប៉ុន្តែបើនិយាយពីជោគជ័យកម្រិតណា ខ្ញុំអត់ហ៊ាននិយាយទេ ព្រោះអ្វីដែលយើងអាចធ្វើបានគឺ ជំរុញឲ្យសកម្មភាពនានាដែលNGO ទាំងនោះឲ្យបានដល់សាធារណជនទូទៅគាត់បានដឹង បានលឺ បានឃើញ ហើយពួកគាត់យកទៅថ្លឹងថ្លែង និងអនុវត្តបន្ត។ ដូច្នេះជោគជ័យកម្រិតណានោះ ទាល់តែពួកគាត់យល់សិន បន្ទាប់មកទាមទារឲ្យមានការចូលរួម។ ជោគជ័យកម្រិតណា វាអាស្រ័យលើការចូលរួមកម្រិតណា។
ថ្វីត្បិតតែជាក្រុមហ៊ុនឯកជន ប៉ុន្តែកន្លងទៅ Sabay បានរួមចំណែកក្នុងការងារសង្គមជាច្រើនដូចជា សង់សាលារៀន ផ្ដល់សម្ភារៈសិក្សាដល់សិស្សានុសិស្សក្រីក្រ ក្មេងកំព្រា យុទ្ធនាការសំអាតទីក្រុង ដាំកូនឈើ ជិះកង់រៃអង្គាសថវិកាជួយមន្ទីរពេទ្យគន្ធបុប្ផាជាដើម។
ដោយ៖ ចិត្ត